ރާއްޖެއަށް ބޮޑު ބައެއް ލިބޭގޮތަށް އިން ކަނޑައެޅުމުގައި ލިބުނު ކާމިޔާބީއަށް އެމްޑީޕީން މަރުހަބާ ދަންނަވައިފި
29 އެޕްރީލު 2023 | ހޮނިހިރު 03:20އިޓްލޮސްގައި ކުރިއަށްދިޔަ މައްސަލާގައި ދިވެހި ސަރުކާރުން ނަގަހައްޓާފައިވަނީ ރާއްޖޭގެ އެންމެ މަތީ މަސްލަހަތު
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
ރާއްޖެއާ ޗާގޮސްއާ ދެމެދުގައިވާ ކަނޑުގެ ފުށުއަރާ ސަރަހައްދުގެ މައްސަލަ، ދިވެހި ދައުލަތުން ވަކާލާތުކުރިގޮތަށް، ރާއްޖެއަށް ބޮޑު ބައި ލިބޭގޮތަށް އިން ކަނޑައެޅިގެން ދިއުމާގުޅިގެން، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށާއި އިޓްލޮސްގައި ރާއްޖެ ތަމްސީލްކުރެއްވި އެޓަރނީ ޖެނެރަލްގެ ލީގަލް ޓީމަށް ސަރުކާރު ހިންގާ މައި ޕާޓީ އެމްޑީޕީން މަރުހަބާ ދަންނަވައިފިއެވެ.
މަރުހަބާ ދަންނަވާކަން ހާމަކޮށް އެމްޑީޕީން ނެރުނު ބަޔާނުގައި ވަނީ؛ އިޓްލޮސްގައި ކުރިއަށްދިޔަ މައްސަލާގައި ދިވެހި ސަރުކާރުން ނަގަހައްޓާފައިވަނީ ރާއްޖޭގެ އެންމެ މަތީ މަސްލަހަތުކަމަށެވެ.
ރާއްޖޭގެ އިގްތިސާދީ އަދި ސަލާމަތީ މަސްލަހަތު ބެލެހެއްޓުމުގެ ފުރިހަމަ އިޚްތިޔާރާއި ގާނޫނީ ބާރު ދިވެހި ދައުލަތަށް ލިބި، ބައިނަލްއަގުވާމީ ހަމަތަކުގެ މަތިން އިން ވަކިކުރެވިފައިވާ ފުރިހަމަ ގައުމެއްގެ ގޮތުގައި ރާއްޖެ ކަނޑައެޅިގެން ދިއުމަކީ ދިވެހި ރައްޔިތުންނަށް ލިބުނު ވަރަށް ބޮޑު ކާމިޔާބީއެއް ކަމަށެވެ.
މި މައްސަލާގައި ސަރުކާރުން ރާއްޖޭގެ މަސްލަހަތު ދިފާއުކުރަމުން ދިޔައިރު، ސިޔާސީ އިދިކޮޅު ފަރާތްތަކުން ދިޔައީ ހަގީގަތާ ޚިލާފު، އަސްލެއް ނެތް، އަދި ރާއްޖޭގެ ތާރީޚުންވެސް ފެންނަން ނެތް ވާހަކަތައް ފަތުރައި، ފިތުނަ އުފައްދައި، މަސްލަހަތު ނަގާލަން މަސައްކަތްކުރަމުން ކަމަށެވެ.
ދިވެހިރާއްޖޭގެ ސަރަހައްދު ބައިނަލްއަގުވާމީ ހަމަތަކާއި މިންތަކާއި އެއްގޮތަށް ކަނޑައަޅައި، ފުރިހަމަވެ މިއަދު މި ނިމުނީއެވެ. ބައި ގަރުނަށްވުރެ ގިނަ ދުވަސްވީ މި މައްސަލަ ނިމި ދިވެހިރާއްޖޭގެ ސަރަހައްދު ކަނޑައެޅިގެން ދިއުމަކީ މިއަދު އެ ޕާޓީން އުފާވެރިކަމާއެކު ބަލައިގަންނަ ކަމެއް ކަމަށްވެސް ބުނެފައިވެއެވެ.
