ބާބީ ޑޯލްއެކޭ ބުނުމުން އިތުރު ތައާރަފަކަށް ބޭނުންވެދާނެ މީހުން މަދުވާނެއެވެ. މާރޗް 9، 1959 ވަނަ ދުވަހު، އެމެރިކާގެ މަޓެލް ކުންފުނިން ތަޢާރަފުކުރި ބާބީ ޑޯލްއަކީ، މިއަދާ ޖެހުނު އިރުވެސް ގިނަ އަދަދެއްގެ ކުޑަކުދިންގެ ކުޅޭ ސާމާނު ބަހައްޓާ ހަރުތަކާއި ވަށިގަނޑުތަކުން ޖާގަ ހޯދާ، ކުޅޭކުޅޭ ބުދެކެވެ. ޖަރުމަނުވިލާތުގެ ބުދެއް އަސްލަކަށް ބަލައިގެން ރޫތު ހޭންޑްލަރ ފަރުމާކުރި ބާބީ ޑޯލްއަކީ، ރީތިކަމާއި ފެޝަންގެ ލާމަސީލު މިސާލެއް ކަމުގައި ގިނަ ބަޔަކު އިއްތިފާގުވެއެވެ. ޒަމާނަށް އަންނަމުންދާ ބަދަލާއެކު ކަންކަމަށް މީހުންގެ ލޯތައް ހުޅުވެމުންދާ ވަރަކަށް، ބާބީގެ ނަލަނަލަ ދުނިޔޭގައި، ހުރިހާ އެންމެންގެ ޝާމިލުވުން ހިމެނެންޖެހޭކަމަށް އެތައް ބަޔަކު ބުނަން ފެށިއެވެ. މަޓެލް ކުންފުނިން އެ އަޑު އަހަންވެސް އެހިއެވެ.

ބާބީ ކަލެކްޝަނަށް އެކި ކަހަލަ ބުދުތައް އިތުރުކުރަމުން ގޮސް، މަޓެލް ކުންފުނިން އެންމެ ފަހުން ތައާރަފު ކޮށްފައި މި ވަނީ ޑައުން ސިންޑްރޯމް ހުންނަ ބާބީއެކެވެ. އެއީ، މުޖުތަމައުގައި ދިރިއުޅޭ އެކި ކަހަލަ މީހުން ޝާމިލުކުރުމުގެ ރޫހުގައި އެކުންފުނިން ކުރި ކަމެކެވެ.

މަޓެލް ކުންފުނިން އާންމުކުރި ބަޔާނެއްގައި ބުނެފައިވާގޮތުގައި، މި ބާބީ ތައްޔާރުކުރުމަށްޓަކައި އެކުންފުނިން ވަނީ، އެމެރިކާގެ ނޭޝަނަލް ޑައުން ސިންޑްރޯމް ސޮސައިޓީއާއެކު މަސައްކަތްތަކެއް ކޮށްފައެވެ. ޖިސްމާނީ ގޮތުންވެސް ތަފާތުތަކެއް ފާހަގަވާ ޑައުން ސިންޑްރޯމް ބާބީ ފަރުމާކޮށްފައިވަނީ އެހެން ބުދުތަކަށްވުރެ އިސްކޮޅުން ކުރުކޮށެވެ. ބާބީ ކަލެކްޝަންގެ އެހެން ފަރުމާތަކަށްވުރެ، މަތީހަށި ދިގުކޮށެވެ.

އެހެން ބާބީތަކާ ޚިލާފަށް، ޑައުން ސިންޑްރޯމް ބާބީގެ މޫނުގެ ބައްޓަންވެސް ވަނީ ވަށްކޮށްފައެވެ. ދެލޯ، އާމަންޑް ބައްޓަށް ހުރިއިރު، ކަންފަތް ކުޑަވާނެ ކަމަށާއި، ނޭފަތުގެ މަތިވެސް ކޮންމެވެސް ވަރަކަށް ފަތިވާނެކަން މަޓެލްއިން ވަނީ ފާހަގަ ކޮށްފައެވެ.

މީގެ އިތުރު ޑައުން ސިންޑްރޯމް ހުންނަ މީހުންގެ އަތްތިލައިން ފެންނަ ނާރަކީ، އެހެން މީހުންގެ އަތުގެ ނާރުތަކާ ތަފާތުކޮށް ހުންނަ ނާރަކަށް ވާއިރު، އަލަށް ތައާރަފުކުރި ބާބީންވެސް އެކަން ފާހަގަކުރެވޭނެ ކަމަށް މަޓެލްއިން ބުނެއެވެ.

މަޓެލްއިން އެންމެ ފަހުން ތައާރަފުކުރި ބާބީ ލައްވާފައިވަނީ ރީނދުލާއި ނޫކުލައިގެ ކޮކާލާއި މާމެލާމެލި ހިމެނޭ، ފުއްޕި އަތް ލީ ހެދުމެކެވެ. މި ކުލަތަކަކީ، ޑައުން ސިންޑްރޯމަށް ހޭލުންތެރިކުރުވުމުގައި ބޭނުންކުރާ ކުލަތަކެކެވެ.

ބާބީ އަޅައިގެން ހުންނަ ފިޔާތޮށި ހާރުގައި، އިނގިރޭސި "ވީ" އަކުރުގެ ބައްޓަމަށް ހުންނަ 3 ފަރުމާއެއް ހިމަނާފައިވެއެވެ. އެއީ 21 ވަނަ ކްރޮމޮޒޯމްގެ 3 ކޮޕީ ރަމްޒުކޮށްދިނުމަށް ކުރި ކަމެކެވެ.

މަޓެލް ކުންފުނީގެ އެގްޒެކެޓިވް ވައިސް ޕްރެޒިޑެންޓް އެންޑް ގްލޯބަލް ހެޑް އޮފް ބާބީ އެންޑް ޑޯލްސް، ލީސާ މެކްނައިޓް ވިދާޅުވީ، އެ ކުންފުނީގެ އަމާޒަކީ ހުރިހާ ކުދިންނަށްވެސް އެ ކުދިން ރަމްޒުކޮށްދޭ ބާބީ ޑޯލެއް ހޯދައިދިނުމެވެ.

މަޓެލް ކުންފުނިން ދަނީ އެކި ނަސްލުތަކުގެ، އެކި ޖިންސުގެ މީހުން ރަމްޒުކޮށްދޭ ބުދުތައް، ބާބީ ކަލެކްޝަނަށް އިތުރުކުރަމުންނެވެ. އަދި ޖިސްމާނީގޮތުން އެކި ކަހަލަ ތަފާތުތައް ހުންނަ މީހުން ރަމްޒުކޮށްދޭ ބާބީތައްވެސް ތައާރަފުކޮށްފައިވެއެވެ. އެގޮތުން، ޕްލާސްޓިކް ފައެއް ޖަހައި، ފުރޮޅުލީ ގޮނޑިއެއްގައި އިންނަ ބާބީއެއްވެސް މަޓެލްއިން ވަނީ ތައާރަފު ކޮށްފައެވެ. އަދި ހަގީގީ ދިރިއުޅުމުގެ މައިދާނުގައި ފާހަގަކޮށްލެވޭ އެކިއެކި އަންހެނުންނަށް ޚާއްސަ ބާބީވެސް ތައާރަފުކޮށްފައިވެއެވެ. އެގޮތުން އޮލިމްޕިކް މުބާރާތެއްގައި ބުރުގާ އަޅައިގެން އެމެރިކާ ތަމްސީލުކޮށް، ކާމިޔާބުކުރި އިބްތިހާޖު މުހައްމަދަށް ޚާއްސަކޮށްގެން، މަޓެލްއިން ވަނީ ބުރުގާއެޅި ބާބީއެއް ތައާރަފުކޮށްފައެވެ.

ޑައުންސް ސިންޑްރޯމް ނުވަތަ އާންމުކޮށް ކިޔާގޮތަށް ދަންނަވާނަމަ، ޑައުން ސިންޑްރޯމަކީ އުފެދުމުގައި ހުންނަ އުނިކަމެކެވެ. މިކަމަށް "ޓްރައިސޯމީ 21" އޭ ވެސް ކިޔައެވެ. އެއީ، 21 ވަނަ ޖޯޑުގައި 2 ކްރޮމޮޒޯމްގެ ބަދަލުގައި 3 ކްރޮމޮޒޯމް ހުންނާތީއެވެ. ކްރޮމޮޒޯއްގައި ހުންނަ އައިބެއްގެ ސަބަބުން، އުގެނުމުގައި ނުކުޅެދުންތެރިކަން ކުޑަކުދިންނަށް މެދުވެރިކުރުވާ އެންމެ އާންމު ސަބަބެއްކަމަށް ބެލެވިފައިވަނީ ޑައުން ސިންޑްރޯމެވެ. ޑައުން ސިންޑްރޯމް، މިނަން ދީފައިވަނީ، މި އުނިކަން ފުރަތަމަ ފަހަރަށް ހޯއްދެވި ޑޮކްޓަރ، ޖޯން ލޭންގޑޮން ޑައުންގެ ނަމާ ގުޅުވައިގެންނެވެ.