"ސަރުކާރުން އަވަސްކުރަން އެދޭހާ ކަމެއް މަޖިލީހުން އަވަސްކުރާކަށް ނުޖެހޭ"
ކޮންމެ މަސައްކަތަކީ ވެސް ވަރަށް ގިނަ އިރު ބަހުސް ކުރެވިފައި ހުރި މަސައްކަތް ކަމަށް ވެސް ނަޝީދު ވިދާޅުވި
މުހައްމަދު ނަޝީދު- ރައްޔިތުންގެ މަޖިލީހުގެ ރައީސް
ސަރުކާރުން އަވަސްކުރަން އެދޭހާ ކަމެއް އަވަސްކުރަން ނުޖެހޭ ކަމަށް ދޭހަވާ މޭރުމަކުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މަޖިލީހުގައި ވާހަކަފުޅުދައްކަވައިފިއެވެ.
ރައީސް ނަޝީދު ވިދާޅުވީ ސަރުކާރުން ކަމެއް ބޭނުންވީމާ އެކަމެއް އަވަސް ކުރަން ޖެހިގެން، މަޖިލީހުގައި އިންނަވައިގެން އެމަނިކުފާނު ކަމެއް ކުރައްވާފާނެ ކަމަށް އެއްވެސް މެންބަރެއްގެ ހިތަށް ވައްދައިގެން ނުވާނެ ކަމަށެވެ. އެއީ އެކަން ހިނގާނެ ގޮތެއް ނޫން ކަމަށް ނަޝީދު ވިދާޅުވިއެވެ. އުންމީދުކުރައްވައިގެން ހުރީ މަޖިލީހުގައި މިހާރު ނުނިމި ހުރި މަސައްކަތްތައް ދެން އޮންނަ ދައުރުގައި އަވަސްކުރައްވަން ކަމަށް ވިދާޅުވިއެވެ. އަދި ކޮންމެ މަސައްކަތަކީ ވެސް ވަރަށް ގިނަ އިރު ބަހުސް ކުރެވިފައި ހުރި މަސައްކަތް ކަމަށް ވެސް ނަޝީދު ވިދާޅުވިއެވެ.
މުހިންމު ބައެއް ޤާނޫނުތައް އިސްލާހުތައް މަޖިލީހުގައި ހުރިކަމަށް މެންބަރުން ވިދާޅުވާތީ އެކަމަށް ވެސް ރައީސް ނަޝީދު ވަނީ ރައްދު ދެއްވާފައެވެ. އެގޮތުން ކޮތަޅުގެ މައްސަލައާ މެދު އާއްމުން ކަންބޮޑު ނުވާ ކަމަށާއި އާއްމުން ކަންބޮޑުވަނީ ތިމާވެެއްޓާއި ގުޅުން ހުރި ކަންކަމާއި މެދުގައި ކަމަށް އެމަނިކުފާނު ވިދާޅުވިއެވެ. ކޮތަޅުން ފީ ނެގުމުގެ މައްސަލައިގެ ބަހުސް އަކީ އެއީ ފުންކޮށް ވިސްނަން ޖެހޭ ބަހުސެއް ކަަމަށް ވެސް އެމަނިކުފާނު އިތުރަށް ވިދާޅުވިއެވެ.
