ހާމާއިން މި ދުވަނީ ކޮންވަހެއް: އަސްލު ނޫނަސް، އެއީ ހަމަ އެ ވަހެވެ!
26 އެޕްރީލު 2023 | ބުދަ 11:58މިހާރު އުމުރުން 40 އަހަރު ފުރިފައިވާ މާޒިން ސެންޓު ވިޔަފާރީގެ ތެރެއަށް ވަނީ ކުޑައިރު
މާޒިން ޒަކޫރު؛ ސެންޓު ހަދާ މީހާ
މިފަހުގެ ތާރީޚުގައި ދުނިޔެ ދުށް އެންމެ ވަރުގަދަ އެއް ހަނގުރާމައިގެ މައިދާނަކަށްވި ސޫރިޔާގައި، އިހު އޮތް އާންމު ދިރިއުޅުމަށް ރުޖޫއަވުމަށް މަސައްކަތް ކުރަމުންދާ މީހުންގެ އަދަދު މަދެއް ނޫނެވެ. ވެރިރަށް ދިމިޝްގުގެ މަގުތަކަށް ބަލައިލުމުން އެކަނިވެސް، ދިރިއުޅުން އާރާސްތު ކުރުމަށް މަސައްކަތް ކުރަމުންދާ އެތައް ބަޔަކު ފެނެއެވެ. ދިމިޝްގުގައި އޮންނަ ހާމާއޭ ކިއުނު މަގު އެއްވަސްކޮށްލާފައި އޮންނަނީވެސް އެފަދަ މަސައްކަތަކުންނެވެ. މުޅި ސަރަހައްދަށް ފެތުރިފައިވަނީ، މާޒިން ޒަކުރޫ ޖަހަމުންދާ ސެންޓުގެ ވަހެވެ. ސަގާފީ ވަސްތަކުން ފެށިގެން ހުޅަނގުގެ ސެންޓުތަކެވެ. އޭނާ އެކަން ކުރަނީ، ކައިރިން ދާ މީހުންގެ ސަމާލުކަން ދަމައިގަނެ، ކަސްޓަމަރުން ހޯދުމުގެ ބޭނުމުގައެވެ.
މިހާރު އުމުރުން 40 އަހަރު ފުރިފައިވާ މާޒިން، ސެންޓު ވިޔަފާރީގެ ތެރެއަށް ވަނީ ކުޑައިރުއެވެ. ކާފައާއި ބައްޕަ ހިނގަމުންދިޔަ ފިހާރައަށް ގޮސް އައިސް ވުމުގެ ތެރޭގައެވެ. އެހެން އުޅުނު އުޅުމުގައި މާޒިން ވަނީ، ވަކި ބާވަތްތަކެއް ބޭނުންކޮށްގެން، ޚާއްސަ ރެސިޕީތަކަށް، އެންމެ މަތީ ފެންވަރުގެ ސެންޓު އުފައްދަން ދަސްކޮށްފައެވެ. މާޒިންގެ ސެންޓުތަކުގައިވެސް ބޭނުން ކުރަނީ ސެންޓު އުފެއްދުމަށް އާންމުކޮށް ބޭނުންކުރާ އަލްކަހޯލް، ޑިސްޓިލްޑް ފެން އަދި ތެލެވެ.
މިނިވަންކަމުގެ ނަމުގައި އަރަބި ގައުމުތަކަށް އެރި ވަރުގަދަ ލޮޅުމާއެކު ސޫރިޔާގައި ކުރި ހަނގުރާމައިގެ އަސަރު މާޒިންގެ ސެންޓު ވިޔަފާރިއަށްވެސް ވަނީ ފޯރާފައެވެ. ތެޔޮ އިމްޕޯޓްކުރުމަށް ދަތިވެ، ތެޔޮ ހާނަން ކުރަންޖެހޭ ޚަރަދުތައް އުފުލިގެންދިޔައެވެ.
ހަނގުރާމަ މަޑުޖެހުނެއްކަމަކު، މިދިޔަ 2 އަހަރެއްހާ ދުވަހަކީ ސޫރިޔާގެ އިގްތިސާދު ގޯހުން ގޯހަށް ދިޔަ ދުވަސްތަކެކެވެ. މާޒިންއަށް އުފުލަންޖެހުނު ބުރަ ހައްތަހާ ވީ އިތުރެވެ. އެވަރުންވެސް އޭނާ ހިތްވަރު އެލުވައެއްނުލައެވެ. ސެންޓު ތައްޔާރުކުރަން ބޭނުންވާ ތެޔޮ ހޭނުމަށްޓަކައި، މާޒިން އަމިއްލައަށް، އެކަމަށް ޚާއްސަ އާލާތެއް އީޖާދުކުރިއެވެ.
މިހާ ހިސާބުންވެސް މާޒިންއަށް ހިންދެމިލެވޭ ގޮތެއް ނުވިއެވެ. މުޅި ދުނިޔެއަށް ބިންދާލި ހަކަތައިގެ ދަތިކަމުގެ ކާރިސާގެ ގަދަ އޮއިވަރުން ސޫރިޔާއަށްވެސް ސަލާމަތް ނުވެވި، އެ ތަކުލީފުގައި މާޒިންވެސް ބެދުނެވެ. ތެޔޮ ހާނަން އީޖާދުކުރި ޑިވައިސް ބޭނުންކޮށްގެން އެންމެ އެކަށީގެންވާގޮތުގައި އުފެއްދުންތެރިކަން މެކުހަށް ނުޖެހިގެން އުޅޭ އެންމެ ބޮޑު ސަބަބަކީވެސް ސޫރިޔާއަށް ކުރިމަތިލާން ޖެހިފައިވާ ހަކަތައިގެ ދަތިކަމުގެ ކާރިސާއެވެ. މި ހުރިހާ ގޮންޖެހުންތަކަކާ އެކުވެސް، ސެންޓު އުފެއްދުމުގެ ސިނާއަތުގައި، އޭނާގެ ވިޔަފާރިއަކީ ވާދަވެރި ވިޔަފާރިއެއްކަމަށް މާޒިން ގަބޫލުކުރެއެވެ.
ކޮލެޖުގައި ތައުލީމު ހާސިލުކުރަމުންދާ ޣިނާ ސާބްގެ ވާހަކަތަކުން އެކަން ސާބިތުކޮށްދެއެވެ. ޣިނާ ބުނާގޮތުގައި މާޒިންގެ ސެންޓުތަކަކީ ފެންވަރު އެންމެ ރަނގަޅު، ޖީބަށް ލުއި އުފެއްދުންތަކެކެވެ.
ދިމިޝްގު މަޝްހޫރުވެފައި ވަނީ "ހުވަނދުމާ" ސިޓީގެ ގޮތުގައެވެ. ސަބަބެއް ނެތިއެއް ނޫނެވެ. ތަފާތު އެކި ކަހަލަ ސެންޓު އުފެއްދުމުގައި ދިމިޝްގަކީ މަޝްހޫރު ސިޓީއެކެވެ. ހަނގުރާމައިގެ ތެރޭގައި މުޅި ގައުމު ހަފުސްވެގެން ދިޔައިރުވެސް، ސެންޓު އުފެއްދުމަށް ދިމިޝްގުގެ ރަށްވެހިންގެ ހިތުގައި ޖެހިފައި އޮތް ލޯތްބަށް ފަނޑުކަމެއް އައިސްފައިވާތީއެއް ނުފެނެއެވެ.
