މިއީ ބޮލީވުޑް ފިލްމެއްގެ މަންޒަރެއް ނޫން، މިއީ އަސްލު ފުލުހެއްގެ ޙަރަކާތްތައް!

އެންމެ ފުރަތަމަ ފެނުމުން ހީވާނީ މިއީ ބޮލީވުޑްގެ ފިލްމެއްގެ މަންޒަރެއްގެ ޝޫޓިންގއެއް ހެންނެވެ. އެހެން ނަމަވެސް ކެމެރާއެއް ފެންނަން ނެތުމުން މިވާ ގޮތް ބަލައިލަން މަޑުކުރާ މީހުންވެސް މަދެއް ނޫނެވެ.

މިއީ ޓްރެފިކް ބެލެހެއްޓުމުގައި ގެންގުޅޭ މޮޅެތި އުކުޅުތަކުގެ ސަބަބުން މަޝްހޫރުކަން ހޯދާފައިވާ އިންޑިއާގެ ޓްރެފިކް ފުލުހެއްކަމަށްވާ ރަންޖީތު ސިންހްއެވެ.

އުމުރުން 38 އަހަރުގެ ރަންޖީތު ސިންހްއަކީ 2 މިލިއަން މީހުންގެ އާބާދީއެއް އޮންނަ އިންޑޯރގެ ޓްރެފިކް ފުލުހެކެވެ. އޭނާ ޓްރެފިކް ބަލަހައްޓާއިރު ގެންގުޅޭ ޑާންސްގެ ފަރި ޙަރަކާތްތަކަކީ އެމަގުން ދުއްވާ ޑްރައިވަރުންގެ ލޮލުގައި އަޅައިނުގަނެ ނުދާނެ ކަމެކެވެ. އިންޑިއާގެ އިތުރުން މުޅި ދުނިޔޭގެ ސަމާލުކަން އޭނާއަށްވަނީ އެކަމަށް ލިބިފައެވެ. އޭނާގެ އެންމެ މަޝްހޫރު ހަރަކާތަކީ މައިކަލް ޖެކްސަންގެ 'މޫން ވޯކް'އެވެ.

ރަންޖީތު ސިންހް: އޭނާގެ ޓްރެފިކް ބެލެހެއްޓުމުގެ އުކުޅުތަކަށް ބައިނަލްއަޤްވާމީ ސަމާލުކަން ވަނީ ލިބިފައި

"އަހަންނަކީ މައިކަލް ޖެކްސަންގެ ވަރަށް ބޮޑު ފޭނެއް. މޫން ވޯކް ޖައްސައިގެން ޓްރެފިކް ހުއްޓުވާތާ މިހާރު ވެދާނެ 12 ވަރަކަށް އަހަރު. އެންމެ ފުރަތަމަ މީހުން ވަރަށް ހައިރާންވެގެން ބަލާ. އެކަމަކު އެކަމަށް މިހާރު ގިނަ ބައެއްގެ ސަމާލުކަންވަނީ ލިބިފައި،" އޭއެފްޕީއަށް ދިން އިންޓަވިއުއެއްގައި ރަންޖީތު ސިންހް ބުންޏެވެ.

އޭނާ ބުނީ ބޯ ދުމާއި، އެކި ޒާތްޒާތަށް ދުއްވާ ޑްރައިވަރުންގެ މެދުގައި ހުރެ، ޓްރެފިކް މެނޭޖްކުރުމަކީ ބުރަ މަސައްކަތެއްކަމަށާއި، އޭނާގެ ހަރަކާތްތަކުގެ ސަބަބުން މީހުން ހިތްހަމަޖެހޭކަމަށެވެ. ރަންޖީތް ސިންހްގެ ޙަރަކާތްތަކަށް ސޯޝަލް މީޑިއާގައިވެސް ވަނީ ބޮޑު ތަރުޙީބެއް ލިބިފައެވެ. އޭނާގެ ފޭސްބުކް ޕޭޖަށް 50 ހާހަށްވުރެ ގިނަ ލައިކްސް ލިބިފައިވެއެވެ.

ސިންހް ބުނާ ގޮތުގައި އޭނާ ޓްރެފިކް ބަލަހައްޓާ ސަރަހައްދުގައި އޭނާގެ ސަބަބުން ފާއިތުވި އަހަރުތަކުގައި ޓްރެފިކް އެކްސިޑެންޓްތައް ވަނީ މަދުވެފައެވެ. ސިންހް ޓްރެފިކް ބަލަހައްޓަނީ ހައިކޯޓް ހުންނަ ސަރަހައްދުގެ، ހަތަރު އަނގޮޅިއެއްގައެވެ. އޭނާގެ ޙަރަކާތްތަކުގެ ސަބަބުން އެސަރަހައްދުގެ ޓްރެފިކް ޖޭމްވުމަށް އެއްވެސް ބަދަލެއް އާދޭތޯ އިންޑިއާގެ ޔުނިވަރސިޓީއަކުން ގެންދަނީ ދިރާސާއެއްވެސް ކުރަމުންނެވެ.

ރަންޖީތު ސިންހް ބުނާ ގޮތުގައި އޭނާ ވަނީ ފާއިތުވި އަހަރުތަކުގައި އެކްސިޑެންޓްތަކުގައި ޝާމިލްވި 40 އަށްވުރެ ގިނަ ޒުވާނުންގެ ހަށިގަނޑު މަގުމަތިން ނަގާފައެވެ. އަދި އޭނާ އެދެނީ ޒުވާނުން ސައިކަލާއި ކާރު ދުއްވާއިރު، މިހާރަށްވުރެ ބޮޑަށް ފަރުވާތެރިވެ، މަގުމަތީގެ ޤަވާޢިދުތަކަށް ޙުރުމަތްތެރިކޮށް ހިތުމެވެ.