އާޖެންޓީނާގެ މިޑްފީލްޑަރު އެލެކްސިސް މެކަލިސްޓާ ގަތުމަށް މެންޗެސްޓާ ޔުނައިޓެޑުން އޭނާގެ ކުލަބު ބްރައިޓަންއާ މަޝްވަރާކުރަން ފަށައިފި އެވެ.
މެކަލިސްޓާ އަކީ މި ސީޒަނުގައި ބްރައިޓަންގައި އެންމެ ރަނގަޅަށް ކުޅެމުން އައި އެއް ކުޅުންތެރިޔާ އެވެ. އޭނާ ވަނީ މި ސީޒަނުގައި 31 މެޗުން 10 ގޯލު ބްރައިޓަން އަށް ޖަހައިދީފަ އެވެ. އަދި މިދިޔަ ޑިސެމްބަރު މަހު އާޖެންޓީނާއިން ވޯލްޑްކަޕް ކާމިޔާބުކުރިއިރު ވެސް އޭނާ އަކި މުހިންމު ދައުރެއް އަދާކުރި ކުޅުންތެރިއެކެވެ.
އިނގިރޭސި މީޑިޔާތަކުން ބުނާ ގޮތުގައި މެކަލިސްޓާ ވެސް ބޭނުންވަނީ އަންނަ ސީޒަނުގައި ބޮޑު ކުލަބަކަށް ބަދަލުވާށެވެ. އެއީ ވޯލްޑްކަޕަށް ފަހު އޭނާ ގަތުމަށް ލިވަޕޫލުން ވެސް ޝައުގުވެރިކަން ފާޅު ކުރުމުންނެވެ. ނަމަވެސް ލިވަޕޫލުން ކުރަން އުޅުނު މަޝްވަރާތަކުގައި ފަހުން ފެހުނީ މަޑުމަޑުން ތިބިތަނެވެ.
ބްރައިޓަން އަށް ކުޅެމުން އަންނަ މޮއިސެސް ސެއިސާޑޯ އަކީ ވެސް ޔުނައިޓެޑުން ގަންނަން ބޭނުންވާ ކުޅުންތެރިއެއް ކަމަށް އިނގިރޭސި މީޑިޔާތަކުން ބުނެ އެވެ. އަދި މި ދެ ކުޅުންތެރިން ވިއްކާލާނީ އެންމެ ބޮޑު އަގެއް ލިބޭ ފަރާތަކަށް ކަމަށް ބްރައިޓަންއިން ނިންމާފައިވާ ކަމަށް ވެސް އިނގިރޭސި ނޫސްތަކުން ބުނެ އެވެ. މި ގޮތުން މި ދެ ކުޅުންތެރިންނަށް ބްރައިޓަންއިން ބޮޑު އަގެއް ކިޔާނެ އެވެ.
