މި ރަމަޟާން މަހު ފަރީ އަސްކޮއި ގްރޫޕްގެ ހަވާލުގައި އުމްރާއަށް ދިޔަ އުމްރާވެރިން ބުދަ ދުވަހު މާލެ އަންނާނެކަމަށް އެ ޖަމާއަތުން ބުނެފިއެވެ.

އެ ޖަމާއަތުން "ރާއްޖެއެމްވީ"އަށް މައުލޫމާތު ދެމުން ބުނީ އުމްރާވެރިން އަންނާނީ ދެ ގްރޫޕަކަށް ބަހާލައިގެންކަމަށެވެ. އެގޮތުން ފުރަތަމަ ގްރޫޕްގައި 69 އުމްރާވެރިން އަންނައިރު، އެމީހުން އަންނާނީ ބުދަ ދުވަހުގެ ހެނދުނު 6 ޖަހާއިރުކަމަށް އެގްރޫޕުން ބުނެއެވެ. އަދި ދެވަނަ ގްރޫޕްގައި 30 މީހުން އަންނައިރު، އެމީހުން އަންނާނީ މެންދުރު 2 ޖަހާއިރުކަމަށް އެގްރޫޕުން ބުނެއެވެ.

އެގްރޫޕުން ބުނީ ގްރޫޕްގެ ހަވާލުގައި އުމްރާއަށް ދިޔަ އުމްރާވެރިންގެ ހާލު ރަނގަޅުކަމަށެވެ. އަދި އުމްރާގެ ކަންކަން ކުރިޔަށްދިޔައީ ވަރަށް ރަނގަޅަށްކަމަށް އެގްރޫޕުން ބުނެއެވެ. އެގޮތުން ތިން އުމްރާ ވުމުގެ ފުރުސަތު އުމްރާވެރިންނަށް ދީފައިވާއިރު ރައުޟާއަށްވެސް އުމްރާވެރިން ޒިޔާރަތްކޮށްފައިވާކަމަށް އެ ގްރޫޕުން ބުނެއެވެ.

ފަރީ އަސްކޮއި ގްރޫޕުން މިއަހަރުގެ ޖުލައި، އޮކްޓޯބަރ އަދި ޑިސެމްބަރު މަހުވެސް މީހުން އުމްރާއަށް ގެންދާނެއެވެ.