ކ. މާލެ
|
27 އޭޕްރިލް 2023 | ބުރާސްފަތި 17:58
އަރީން
އަރީން
ރަންތާޖު ޤުރުއާން މުބާރާތުގެ ބައިވެރިޔާ، އަރީން
އަރީން - މުސްތަގްބަލުގައި ޑޮކްޓަރެއް، އެހެނަސް މަށި ފިލައިން ފެށުނު ޤުރުއާނުގެ ހަޔާތް ދޫކޮށްލާކަށް ބޭނުމެއްނުވޭ!
 
އަރީނަކީ ތައުލީމަށް ލޯބިކުރާ ހުނަރުވެރި ދަރިވަރެއް
 
އަރީންގެ އުންމީދަކީ ބައިނަލްއަގުވާމީ މުބާރާތަކުން ވަނައެއް ހޯދުން
 
އަރީންގެ އާއިލާއަކީ ޤުރުއާނަށް ޝައުގުވެރިވާ އާއިލާއެއް

ކ. ކާށިދޫއަށް އުފަން, އުމުރުން 20 އަހަރުގެ މަރިޔަމް އަރީން އީސާގެ ހިތުގައި ޤުރުއާނަށް އެހައި ފުން ލޯތްބެއް އުފެދުމުގެ އަސްލަކީ، އޭނާގެ އާއިލާގެ ތެރެއިން ވާރުތަވެގެން އައި ލޯތްބެވެ. އަރީންގެ މަންމަ ފަރާތު މާމައަކީ ރަށު ފެންވަރުގައި ޤުރުއާން އުނގަންނައިދިން އެދުރެކެވެ. ކަންމިހެން ހުރުމާއެކު އަރީންގެ މަންމައަށްވެސް، ތަޖުވީދަށް ޤުރުއާން ކިޔެވުމުގެ ހުނަރު އަރީންގެ މާމަގެ ފަރާތުން ވަނީ ދަސްވެފައެވެ. ޤުރުއާނަށް ލޯބިކުރާ އާއިލާއަކަށް އުފަން އަރީންގެ ޅައިރުގެ ހަނދާންތައް ފަވައި ނެގިފައިވަނީ ޤުރުއާނުގެ ތެރޭގައެވެ. ކާފަ ހޯދައިދިން މަށި ފިލާގައި މާމަ ލިޔެދިން "ފިލާ" ދަސްކުރަން ކުޑަކުޑަ އަރީން ހޭދަކުރި ދުވަސްތަކަކީ މިހާރުވެސް އޭނާގެ ކުޑައިރުގެ އެންމެ ތާޒާ އެއް ހަނދާނެވެ.

އެއަށްފަހު އަރީންގެ ބައްޕަ އޭނާއަށް ހޯދައިދިން، ހުސަރީގެ ޤުރުއާން އޯޑިއޯ އަޑުއެހުމުގައި ހޭދަކުރި ވަގުތުތަކަކީ އޭނާގެ ކުޑައިރުގެ އުފާވެރި ހަނދާންތަކުގެ ތެރޭގައި ހިމެނޭ ކަމެކެވެ. ހަމައެހެންމެ މަންމަގެ އުނގުގައި ބައިންދައިންގެން އޭނާގެ މަންމަ އޭނާއަށް ހުސަރީގެ ޤުރުއާން އޯޑިއޯ ފަހަރަކު އާޔަތަކުން ޖަހައިދޭ ހަނދާން މިހާރުވެސް އަރީންގެ ހިތުގައި ހަރުލާފައި އެބަހުއްޓެވެ.

މަންމަ އަންނަންވާއިރަށް މާމަ ފިލާ ލިޔެދޭ. މާމަ ލިޔެދޭ ފިލާ ދޮވެވޭނީ ދަސްކުރީމަ. އެހެންވެ އަވަސް އަވަހަށް ދަސްކޮށްލަނީ. އެއީ ވަރަށް ހަނދާން ހުންނަ ކަމެއް. ދެން މަންމައާ ބައްޕަވެސް ޓީޗަރުން ވީމަ ހެނދުނު ދާ ގޮތަށް ދެން ފެންނާނީ ހަވީރު. ކޮޓަރީގަ ހުންނާނެ ފުރޮޅުލީ ގޮނޑީއެއް. އޭގަ ކޮއްކޮއާ ދެމީހުން ބައިތިއްބާފަ ދާނީ ޤުރުއާން ޖަހާފަ. ސްކްރީނަށް އަރާ ރޮނގުތައް ވަރަށް ބަލާހިތްވާނެ. އެ ވަރަށް މަޖާކަމަކަށް އޭރުވެސް ވަނީ.
އަރީން

އަރީން ބުނާގޮތުން ހުސަރީ ކިޔަވާގޮތަށް ކިޔަވަން ފެށުމުގެ ބިންގާ އެޅުނީ އެ ހިސާބުންނެވެ. އޭނާގެ އޯޑިއޯތައް އެހައި ގިނައިރު އަޑުއެހުމުގެ ނަތީޖާއަކަށްވީ ހުސަރީ ކިޔަވާގޮތަށް އެރާގުގައި އެ ބަނޑިތަކާއެކު ކިޔަވަން އޭނާއަށް އިސާހިތަކު ދަސްވުމެވެ. އަދި ހުސަރީގެ ކިޔެވުމާއި އޭނާގެ ކިޔެވުމާ ވައްތަރުކަަމަށް ބުނެ ލިބޭ ތައުރީފަކީ އަރީނަށް އުފާ ލިއްބައިދޭ ތައުރީފްތަކެކެވެ. އެއީ ގާރީއެއްގެ އެހީތެރިކަމާނުލައި އެހާހިސާބަށް ޤުރުއާން ކިޔެވުމުގެ ހުނަރު އާލާކުރި އަރީނަށް ލިބޭ ފަޚުރެކެވެ.

އެ ހުނަރު އިތުރަށް އާލާކުރުމުގެ ގޮތުން އޭނާއަށް ގާރީންގެ އެހީތެރިކަން ފަހުން ލިބުމަކީ އޭނާ ޝުކުރުވެރިވާ ކަމެކެވެ. އެހެންނަމަވެސް އަރީން ވަނީ އޭނާ އަމިއްލައަށް ޤުރުއާނުގެ ހުނަރު ފުރިހަމަކުރަން މަސައްކަތްކޮށްފައެވެ. ޔޫޓިއުބު ވީޑިއޯތަކުގެ އަލީގައެވެ. އަރީނަކީ ޤުރުއާނުގެ ދާއިރާއިން ގިނަ ކާމިޔާބީތަކެއް ހާސިލްކޮށްފައިވާ ހުނަރުވެރިއެކެވެ.

އަރީން ކުޑައިރު އޭނާގެ އާއިލާއާއެކު

އަރީން ހާސިލްކޮށްފައިވާ ކާމިޔާބީތަކުގެ ތެރޭގައި، ރަށު ފެންވަރުގައި ބާއްވާ ގިނަ މުބާރާތްތަކަކުން 1 ވަނަ ހާސިލްކުރުމާއި، އަތޮޅު މުބާރާތުން ޖެހިޖެހިގެން 4 އަހަރު އެއްވަނަ ހޯދުމާއި، ގައުމީ މުބާރާތުން 2017 ވަނަ އަހަރު އެއްވަނަ ލިބުން ފާހަގަކޮށްލެވެއެވެ. އަދި މިހާރުގެ ނައިބު ރައީސް ފައިސަލް ނަސީމްގެ އިސްނެންގެވުމާއެކު ފައިސަލް ފައުންޑޭޝަނުން ކާށިދޫއާއި ގާފަރަށް ހުޅުވާލައިގެން ބޭއްވި ޤުރުއާން މުބާރާތުންވެސް އޭނާ ވަނީ ވަނަ ހާސިލްކޮށްފައެވެ. އެއީ ގޮންޖެހުންތަކުން އަރައިގަނެ ކުރިއަށްދާން ލިބުނު ހިތްވަރެއް ކަމުން ނައިބު ރައީސް ފައިސަލްއަށް އަރީން ވަނީ ޝުކުރު ދަންނަވާފައެވެ. މީގެ އިތުރުން އަރީނަކީ އޭނާއަށް ލިބިފައިވާ ހުނަރު އުނގަންނައިދެމުންދާ އެދުރުވެރިއެކެވެ.

ޤުރުއާން ކިޔެވުމުގެ ދާއިރާއިން އަރީންގެ އެންމެ ފަހުގެ ތަޖުރިބާއަކީ ރާއްޖެ ޓީވީން ގެނެސްދޭ ރަންތާޖު ޤުރުއާން މުބާރާތެވެ. މި މުބާރާތުގެ ފަޚުރުވެރި 8 ވަނަ ހޯދި އަރީން މި މުބާރާތަށް ވަގުތު ހުސްކުރީ ވަރަށް އަވަދިނެތި އުޅެމުންނެވެ. އެހެންކަމުން އޭނާ އެންމެ ހިތްހަމަޖެހޭ ވަރަށް މުބާރާތައް ތައްޔާރެއްނުވެވުނެވެ. ނަމަވެސް މިއީ ގުރުއާން އުނގެނުމާއި އުނގަންނައިދިނުމުގެ ދާއިރާއިން އޭނާއަށް އިތުރުކޮށްލެވުނު މުއްސަނދި ބޮޅެކެވެ.

ރަންތާޖު ޤުރުއާން މުބާރާތުގެ ފަސްވަނަ ޝޯ - ރާއްޖެއެމްވީ
ދަންވަރު ގިނަ ރޭރޭ ދަސްކުރަނީ ރަންތާޖުގެ އެއްޗެހި. މުބާރާތަށް ހުސްވެގެން ހުރުމުގެ ޕްރިވިލެޖެއް އަޅުގަނޑަކަށް ނުލިބޭ. ވަރަށް ގިނަ އެއްޗެހި ދަސްވި އެކަމަކު. މުބާރާތުގަ އަޅުގަނޑު ޕަރފޯމްކުރީ ކޮންމެ ދުވަހަކު މެޑިކަލް ކޮލެޖް ނިންމާފަ ހަވީރު ގެއަށް އައިސް ލިބުނު ވަގުތުކޮޅުގަ، ވަރަށް ހިތްވަރުކޮށްގެން. ގްރޭޑް 10ގަ ބިޒީވިގޮތަށް ޤުރުއާނުގެ ފަންނާ ވަރަށް ދުރުގަ މިއުޅެވުނީ. އެހެންކަމުން ރަންތާޖު ޤުރުއާން މުބާރާތަކީ އަޅުގަނޑަށް ލިބުނު ރަހުމަތެއް. އަލުން މިފަންނުން ކުރިއަށް ދިޔުމަށް ހުޅުވު ދޮރެއް.
އަރީން

އަރީންގެ އުންމީދަކީ ޤުރުއާނުގެ ދާއިރާއިން ރާއްޖެއަށް ބައިނަލްއަޤުވާމީ ވަނައެއް ހޯދައިދިނުމެވެ. އަރީން ގަބޫލުކުރާގޮތުން ގުރުއާނަށް އޭނާގެ ހިތުގައި އޮތް ލޯތްބަކީ އޭނާގެ ތައުލީމީ ހަޔާތް ރަނގަޅުވުމުގެ އަސްލެވެ. އޭނާއަކީ ގްރޭޑް 4ގައި އޯލެވެލް ހަދާފައިވާ ތޫނުފިލި ދަރިވަރެކެވެ. އޭރު އޭނާއަށް ލިބުނީ ޑީއެކެވެ. ފަހުން ގްރޭޑް 6ގައި އަލުން ހަދައިގެން ޖީސީއޯލެވެލް އިނގިރޭސިން އޭ ޕްލަސްއެއް ވަނީ ލިބިފައެވެ.

ކިޔެވުމަށް ލޯބިކުރާ އަރީނަކީ ކ. އަތޮޅު މަދަރުސާގެ ސްކޫލް ކެޕްޓަންކަންވެސް ކުރި ނަމޫނާ ދަރިވަރެކެވެ. އޭނާއަކީ އޯލެވެލްއާއި އޭލެވެލްގައިވެސް ރާއްޖޭގެ ގަދަ 10ގައި ހިމެނުނު ދަރިވަރެކެވެ. މިހާރު އެމްބީބީއެސް ކިޔަވާ، ސްކޫލް އޮފް މެޑިސިން އެމްއެންޔޫގައި ތައުލީމް ހާސިލްކުރަމުންދާ ދަރިވަރެކެވެ. ޑޮކްޓަރަކަށް ވުމަކީ އޭނާ ވަރަށް ކުޑައިރުން ފެށިގެން ދެކެމުން އައި ހުވަފެނެކެވެ. އެހެންކަމުން ހިތްވަރާއެކު އޭނާ މަސައްކަތް ކުރަމުން ދަނީ އެ ހުވަފެނުގައި ކުލަޖެއްސުމަށެވެ.

އަރީން

އަރީންގެ ހުނަރުވެރިކަމާއި ޝައުގުހުރި އެހެން ބައެއް ދާއިރާތަކަށް ބަލައިލާނަމަ، މަދަހަ ކިޔުމަކީ އޭނާގެ ފަންނުވެރިކަމުން ފެންނަ ތަފާތު ކުލައެކެވެ. މީގެ އިތުރުން އެކިއެކި ޖަލްސާތަށް ހޯސްޓް ކުރުމާއި، ރިޕޯޓުކަހަލަ އެއްޗިއްސަށް އަޑުއަޅާ އަރީނަކީ އަދަބީ ކަންކަމަށް ލޯބިކުރާ ކުއްޖެކެވެ. އަދި އަދަދު ނޫހުގައި ނޫސްވެރިކަމުގެ ދާއިރާއަށް ނުކުމެ އޭނާ ވަނީ އޭނާގެ ލިޔުންތެރިކަމުގެ ގަލަމުގެ ފަންވަރު ދައްކާލާފައެވެ. އޭނާ ބުނާގޮތުން އޭނާގެ ތައުލީމާއި ހުނަރުގެ ހުރިހާ ކްރެޑިޓެއް ލިބެނީ އޭނާގެ ލޯބިވާ މައިންބަފައިންނާއި އާއިލާއަށެވެ. ހުރިހާ ޝުކުރެއް ހައްގުވަނީ އޭނާއަށް ހިތްވަރުދޭ އޭނާގެ އެކުވެރި އާއިލާއަށެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އައިޝަތު ރިޔާޒް
14%
61%
2%
14%
0%
10%
ކޮމެންޓް
ގުޅުންހުރި
ރަންތާޖު ޤުރުއާން މުބާރާތަކީ ބައިވެރިންނާއި ބެލުންތެރިންނަށްވެސް ގިނަ ފިލާވަޅުތަކެއް ލިބިގެންދިޔަ މުބާރާތެއް - އަލްގާރީ މުހްމަދު ތައުފީގް އަލީ
ރަންތާޖު ޤުރުއާން މުބާރާތަށް ތައްޔާރުވާން ސާއީގެ ހުރިހާ ވަގުތެއް ހުސްކުރި، ބައެއް ރޭރޭ 3 ޖަހަންދެން ގުރުއާން ކިޔަވާ
ރަންތާޖު ޤުރުއާން މުބާރާތުގެ އެއްވަނަ ސާއީއަށް - ދަރިފުޅަށް ލިބުނު ކާމިޔާބުން މަންމަ ރޮއްވާލައިފި
"ރަންތާޖު ޤުރުއާން މުބާރާތުން ލިބުނު އެންމެ ބޮޑު އުފަލަކީ ދުނިޔޭގެ ފެންވަރުގެ ފަންނީ ހުނަރު ދިވެހިންގެ ކިބައިގައި ހުރިކަން ޔަޤީންކުރެވުން"
"ބައިނަލްއަޤުވާމީ މުބާރާތްތަކުގައި ވާދަކުރާނެ ދަރިވަރުން އުފެއްދޭނެ ނިޒާމެއް ރާއްޖޭގައި އަދި ނެތް"
ޤާރީންނާއި ޙާފިޡުންނަށް އިތުރު ތަމްރީނު ދީގެން ބައިނަލްއަޤުވާމީ މުބާރާތްތަކަށް ތައްޔާރުވުމަށް ރައީސް ގޮވާލައްވައިފި
ރަންތާޖު ޤުރުއާން މުބާރާތަކީ ރާއްޖޭގައި މިހާތަނަށް ބޭއްވި އެންމެ ކާމިޔާބު އެއް މުބާރާތް: ރައީސް
''ރަންތާޖު ޤުރުއާން'' މުބާރާތުގެ ފަޚުރުވެރި 1 ވަނަ މުހައްމަދު ސާއީއަށް