ޗާގޯސް މައްސަލައިގައި އަޑި ނޭނގޭ ޑީލްތަކެއް ހަދާފައިވާ ކަމަށް ބުނެ މަޖިލީހަށް ކުއްލި މައްސަލައެއް
ޗާގޯސް މައްސަލައިގައި އިދިކޮޅު ފަރާތްތަކުން ހަގީގަތް އޮޅުވާލާކަމަށް ސަރުކާރުން ބުނޭ
މެންބަރު އާދަމް ޝަރީފް
މިހާރު ސުވާލު އުފެދިފައިވާ ޗާގޯސް އައިލެންޑްސް ނުވަތަ ފޯޅަވައްސާއި ދިވެހިރާއްޖެއާ ދެމެދު ހިމެނޭ ކަނޑުގެ ސަރަހައްދުގެ މައްސަލައިގައި އަޑި ނޭނގޭ ޑީލްތަކެއް ހަދާފައިވާ ކަމަށް ބުނެ މަޖިލީހަށް ކުއްލި މައްސަލައެއް ހުށަހަޅައިފިއެވެ.
މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ހުށަހަޅުއްވާފައިވާ މައްސަލައިގައި ބުނެފައިވަނީ ރާއްޖޭގެ އިހްތިސާސުން ބައެއް ގެއްލޭ ގޮތަށް ރާއްޖެއިން މޮރިޝަސް އަށް ސިޓީއެއް ފޮނުވާފައިވާ ކަމަށާއި، އެ ސިޓީ ހާމަކުރުމަށް ގޮވާލާ ކަމަށެވެ. އަދި ރާއްޖެއިން ބައެއް ވިއްކުމަށް ޑީލް ހަދާފައިވާ ކަމަށް ބުނެ އެ މައްސަލަ ތަހުގީގުކޮށް ފިޔަވަޅު އެޅުމަށް ސަރުކާރަށް ގޮވާލާފައިވެއެވެ.
އެ މައްސަލަ ހުށަހަޅުއްވަމުން މެންބަރު އާދަމް ޝަރީފް ވިދާޅުވީ ރާއްޖޭގެ ބިމުން ވެލި ފުކެއްގެ މިންވަރު ވިޔަސް ރާއްޖޭގެ ކަނޑުގެ ސަރަހައްދުން ކުޑަ އިންޗިއެއްގެ މިންވަރު ވިޔަސް ރާއްޖެއިން އެހެން ބަޔަކަށް ދިނުމަކީ އެކަމަށް ދިވެހިން ދެކޮޅު ހަދާނެ ކަމެއް ކަމަށެވެ. އެހެންކަމަށް ވާއިރު ފޯޅަވަހި ހިމެނޭ ގޮތަށް ރާއްޖޭގެ ދެކުނުގައި އޮންނަ ޗާގޯސް އަކީ މޮރިޝަސްގެ ބައެއް ކަމަށް ކަނޑައަޅާ ދިނުމަށް ބައިނަލްއަޤުވާމީ ކޯޓަކަށް ހުށަހެޅި މައްސަލައިގައި ރާއްޖެއިން ގެންގުޅޭ ސްޓޭންޑް ބަދަލުކޮށްފައިވާ ކަމަށް ވެސް އޭނާ ވިދާޅުވިއެވެ. ރާއްޖޭގެ ސަރަހައްދަށް ބަދަލު ގެނެވޭނީ މަޖިލީހުން ފާސްކޮށްގެން ކަމަށާއި، ޗާގޯސް މައްސަލަ އަކީ އިގްތިސާދީ އަދި ސިޔާސީ މަސްރަހަށް ވެސް އަސަރުކުރާނެ ކަމެއް ކަމަށް އޭނާ ވިދާޅުވިއެވެ.
އޭނާ ވަނީ މި މައްސަލައިގައި ރާއްޖޭގެ ފޮރިން މިނިސްޓަރު އަބްދުﷲ ޝާހިދު އިސްވެ ހުންނަވައިގެން އަޑި ނޭނގޭ ޑީލްތަކެއް ހަދާފައިވާ ކަމަށް ވެސް ތުހުމަތުކުރައްވާފައެވެ. އަދި މޮރިޝަސް އަށް ސަރުކާރުން ފޮނުވި ސިޓީ ހާމަކުރުމަށާއި، އެ މައްސަލަ ތަހުގީގުކޮށް ފިޔަވަޅު އަޅާދިނުމަށް އޭނާ ވަނީ ގޮވާލައްވާފައެވެ.
މި މައްސަލަ މަޖިލީހަށް ބަލައިގަނެފައި ވަނީ 23 މެންބަރުންގެ ވޯޓާއި އެކުގައެވެ. އެ މައްސަލަ ބަލައިގަންނަން ނުފެންނަ ކަަމަށް 19 މެންބަރުން ވަނީ ވޯޓު ދެއްވާފައިވެއެވެ.
ރާއްޖޭގެ ދެކުނުން އޮންނަ ޗާގޯސް އައިލެންޑްސް އިނގިރޭސިވިލާތުގެ ބާރު ހިނގާ ތަނެއްގެ ގޮތުގައި ބޭއްވުމާމެދު ރާއްޖެއިން ދެކެމުން އައި ގޮތް ބަދަލުކޮށް، މޮރިޝަސްއާ އެއްކޮޅަށް ވޯޓު ދިނުމަށް ނިންމާފައިވާކަމަށް ބުނުމާއެކު އިދިކޮޅު ފަރާތްތަކުން ދަނީ ފާޑުކިޔަމުންނެވެ. އަދި އެ ނިންމުމުގެ ސަބަބުން ރާއްޖޭގެ ބައެއް ގެއްލޭނެ ކަމަށްވެސް އެ ފަރާތްތަކުން ބުނެއެވެ. ނަމަވެސް ސަރުކާރުން އެ ވާހަކަތައް ދޮގުކުރެއެވެ. މިހާރު ސުވާލު އުފެދިފައިވާ ޗާގޯސް އައިލެންޑްސް ނުވަތަ ފޯޅަވައްސާއި ދިވެހިރާއްޖެއާ ދެމެދު ހިމެނޭ ކަނޑުގެ ސަރަހައްދުގެ މައްސަލައިގައި ސަރުކާރުން އަމަލުކުރި ގޮތުގެ ތަފްސީލްތައް މަޖިލީހާ ހިއްސާކޮށްފައިވާކަމަށް އެމްޑީޕީގެ ޕީޖީ ގްރޫޕުން ވެސް ވަނީ މީގެ ކުރިން ބުނެފައެވެ.
ރާއްޖޭގެ ސްޓޭންޑަށް ބަދަލު ގެނައި މައިގަނޑު ސަބަބަކީ އައިސީޖޭގެ އެޑްވައިޒަރީ އޮޕީނިއަންގައި އިނގިރޭސިވިލާތުން ޑިކޮލޮނައިޒޭޝަން މަރުހަލާ ފުރިހަމަ ނުވާ ކަމަށާ މޮރެޝިއަސްއަކީ ޗާގޯސްގެ ބައެއްކަމަށް އިޓްލޮސްއިން ނިންމުމެވެ. އަދި ރާއްޖޭގެ ޚާރިޖީ ސިޔާސަތު ތަރައްގީވަމުން އަންނައިރު، އެފްރިކާގެ ގައުމުތަކާއި ކުދި ޖަޒީރާ ގައުމުތަކާއެކު ސިޔާސީ ގުޅުން ހިންގުމަށް މި ސަރުކާރުން ބޮޑު އަހަންމިއްޔަތުކަމެއް ދިނުންވެސް އެ ނިންމުން ނިންމި ސަބަބުތަކުގެ ތެރޭގައި ހިމެނެއެވެ.
މީގެ އިތުރުން ޚާރިޖީ ސިޔާސަތުގެ މި ވިސްނުމުގެ ދަށުން، އަދި ޑިކޮލޮނައިޒޭޝަން މަރުހަލާއަށް އެއްބާރުލުން ދިނުމުގެ ގޮތުން، އދ.ގެ ވޯޓުގައި ޗާގޯސްއަށް މޮރިޝަސް އިން ކުރާ ދަޢުވާއަށް ތާއީދުކުރުމަށް ރާއްޖެއިން ވަނީ ނިންމާފައެވެ. އެގޮތުން 22 މެއި 2019 ގައި އައި.ސީ.ޖޭގެ ނިންމުން ތަންފީޒުކުރަން އދ އާއްމު މަޖިލީހުގައި ވޯޓު ނެގި އިރު ރާއްޖެއިން މޮރިޝަސްއާ ދެކޮޅަށް ވޯޓު ދީފައިވެއެވެ. އެހެންނަމަވެސް "އެކްސްޕްލެނޭޝަން އޮފް ވޯޓް" ގައި ބުނީ ދިވެހިރާއްޖޭގެ ކޮންޓިނެންޓަލް ޝެލްފް 200 ނޯޓިކަލް މޭލަށްވުރެ އިތުރުކުރުމަށް ކޮމިޝަން އޮން ދަ ލިމިޓްސް އޮފް ދަ ކޮންޓިނެންޓަލް ޝެލްފް (ސީ.އެލް.ސީ.އެސް) އަށް 26 ޖުލައި 2010ގައި ހުށަހަޅާފައިވާ ސަބްމިޝަންއަށް އައި.ސީ.ޖޭގެ އެޑްވައިޒަރީ އޮޕީނިއަންގެ ސަބަބުން އަސަރުކުރާނެތީ އެގަރާރާ ދެކޮޅަށް ވޯޓު ދެނީކަމަށާއި، އެ ވޯޓަކީ ޑީކޮލޮ ނައިޒޭޝަނާ ދެކޮޅަށް ދޭ ވޯޓެއް ނޫންކަމަށެވެ.
