މިޔަރަށް ކާންދިނުމުގެ ސަބަބުން އޭގެ ގުދުރަތީ ޒާތަށް އަސަރުކުރޭ، އެއީ ނުރައްކާތެރި ކަމެއް - ނައީމް
ބައެއް ރިސޯޓުތަކާއި ބައެއް އެހެން ތަންތަނުގައި ވެސް މިޔަރަށް ކާންދިނުމުގެ އަމަލުތައް ހިންގާ
އީޕީއޭގެ ޑިރެކްޓަރ ޖެނެރަލް އިބްރާހިމް ނަޢީމް
މިޔަރަށް ކާންދިނުމުގެ ސަބަބުން އޭގެ ގުދުރަތީ ޒާތަށް އަސަރުކުރާ ކަމަށާއި އެއީ ނުރައްކާތެރި ކަމެއް ކަމަށް އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވެއްޖެއެވެ.
ބައެއް ރިސޯޓުތަކާއި ބައެއް އެހެން ތަންތަނުގައި ވެސް މިޔަރަށް ކާންދިނުމުގެ އަމަލުތައް ހިންގައެވެ. ރާއްޖޭގެ އެކި ހިސާބުތަކުގައި މިޔަރަށް ކާންދިނުމަކީ ފަތުރުވެރިންގެ އިތުރުން ބައެއް އާއްމުންނަށް މިޔަރު ދައްކާލުމަށާއި ފޫހިފިލުވުމަށް ހިންގާ ހަރަކާތެއްގެ ގޮތުގައި ކުރަމުން އަންނަ ކަމެކެވެ. މީގެ އިތުރުން ބައެއް ޑައިވިން ޓީމްތަކުން ވެސް މިޔަރު އުޅޭ ސަރަހައްދުތަކަށް ގޮސް އެއަށް ކާންދީހަދާއިރު، އެ ސަރަހައްދުތަކަށް ފައިބާ އުޅޭ މަންޒަރުވެސް ބައެއް ފަރާތްތަކުން އާންމުކުރާ ފޮޓޯ އާއި ވީޑިއޯތަކުން ފެނެއެވެ. އަދި މިފަދަ ކަންކަމުގެ ސަބަބުން ބައެއް ފަހަރު މިކަންކަމުގެ ތެރޭގައި މީހުންނަށް އަނިޔާވެސް ވެފައިވެއެވެ.
އެފަދަ ކަންކަމާއި ގުޅޭގޮތުން ވާހަކަދައްކަވަމުން ނައީމް ވިދާޅުވީ ދާދިފަހުން ނިދަން މިޔަރެއް މީހެއްގެ ގައިގައި ދަތް އެޅި މައްސަލަ އެއް ފެންމަތިވެފައިވާ ކަމަށެވެ. ނަމަވެސް ނިދަން މިޔަރަކީ އެހާ ނުރައްކާތެރި މިޔަރެއް ނޫން ކަމަށާއި އެއީ ވަރުގަދަ ނުރައްކާތެރި މިޔަރެއް ނަމަ ވަރަށް ބޮޑަށް ގެއްލުންވެ ފުރާނަ އަށް ވެސް ނުރައްކާވުމުގެ ފުރުސަތު އޮތް ކަމަށް ނައީމް ވިދާޅުވިއެވެ. އަދި އެއްވެސް ޖަނަވާރެއްގެ ގުދުރަތީ ދިރިއުޅުމަށް ބުރޫ އަރާފަދަ ކަންކަން ނުކުރުމަށް ފެށުނީއްސުރެ އީޕީއޭއިން ޢިލްތިމާސްކުރަމުން އައި ކަމަށް ވެސް ވިދާޅުވިއެވެ.
ނައީމް ވިދާޅުވީ މިޔަރު ފަދަ ޖަނަވާރުތަކަށް ކާންދިނުމަކީ ފާއިތުވި 5-10 ވަރަކަށް އަހަރު ތެރޭގައި ވަރަށް ބޮޑަށް އާއްމު ވެފައިވާ ކަމެއް ކަމަށެވެ.
ނައީމް ވިދާޅުވީ ދިރޭ ތަކެއްޗަށް ކާންދޭން ވާނީ ހަމައެކަނި އޮޅުކޮށްގެން ގެންގުޅޭ ޖަނަވާރުތަކަށް ކަމަށެވެ. ދޫކޮށްލާފައި ހުންނަ އެއްޗެއްސަކީ އަމިއްލަ އަށް ކާ އެއްޗެހި ހޯދައިގެން އުޅޭ އެއްޗެއް ކަމަށް ވެސް ނައީމް ވިދާޅުވިއެވެ. އެހެންކަމުން އެ އެއްޗެހީގެ ދިރިއުޅޭ ވެއްޓަށް ނޭދެވޭ އަސަރު ކުރާނެ އެއްވެސް ކަމެއް ނުކުރުމަށް އޭނާ ވަނީ އިލްތިމާސްކުރައްވާފައެވެ.
