ކުދި އަދި މެދުފަންތީގެ ވިޔަފާރިތަކަށް 1.2 ބިލިއަން ރުފިޔާގެ ލޯނު ދޫކޮށްފި

ކުދި އަދި މެދުފަންތީގެ ވިޔަފާރިތައް ކުރިއެރުވުމަށް މިހާތަނަށް 1.2 ބިލިއަން ރުފިޔާގެ ލޯނު ދޫކޮށްފައިވާކަމަށް ސަރުކާރުން ހާމަކޮށްފިއެވެ.

އެސްއެމްއީ ބޭންކް (އެސްޑީއެފްސީ) މެދުވެރިކޮށް ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ސަރުކާރުން ގެންދަނީ ލޯނު ދޫކުރަމުންނެވެ. މިގޮތުން އެކި ދާއިރާތަކުން ކުދި ވިޔަފާރިތައް ކުރިއެރުވުމަށް ސަރުކާރުން ގެންދަނީ ލޯނު ދޫކުރަމުންނެވެ.

ދިވެހި ސަރުކާރުގެ ޓްވިޓަރ އެކައުންޓުގައި ބުރާސްފަތި ދުވަހު އާންމުކުރި މައުލޫމާތުގައިވާގޮތުން މިހާތަނަށް އައިއިރު އެސްޑީއެފްސީ މެދުވެރިކޮށް 1،207 ފަރާތަކަށް ވަނީ ލޯނު ދޫކޮށްފައެވެ. ޖުމްލަ 1،258،580،566 (އެއް ބިލިއަން ދުއިސައްތަ ފަންސާސް އަށްމިލިއަން ފަސްލައްކަ އަށްޑިހަ ހާސް ފައްސަތޭކަ ފަސްދޮޅަސް ހައެއް) ރުފިޔާ ވަނީ ކުދި ވިޔަފާރިތަކަށް ދޫކޮށްފައެވެ.

މިގޮތުން ދަނޑުވެރިކަމުގެ ދާއިރާއިން 38 މީހަކަށް ލޯނު ދޫކޮށްފައިވާކަމަށް ހާމަކޮށްފައިވެއެވެ. ދަނޑުވެރިކަމުގެ ދާއިރާއިން ޖުމްލަ 16،422،640 (ސޯޅަ މިލިއަން ހަތަރުލައްކަ ބާވީސްހާސް ހަސަތޭކަ ސާޅީސް) ރުފިޔާ ދޫކޮށްފައިވެއެވެ. މަސްވެރިކަމުގެ ދާއިރާއިން 145 މީހަކަށް 237،613،097 (ދުއިސައްތަ ތިރީސް ހަތްމިލިއަން ހަލައްކަ ތޭރަހާސް ނުވަދިހަ ހަތެއް) ރުފިޔާ ވަނީ ދޫކޮށްފައެވެ.

ފަތުރުވެރިކަމުގެ ދާއިރާއިން 237 މީހަކަށް 336،001،505 (ތިންސަތޭކަ ތިރީސް ހަމިލިއަން އެއްހާސް ފައްސަތޭކަ ފަހެއް) ރުފިޔާ ދޫކޮށްފައިވެއެވެ. ދަތުރުފަތުރުގެ ސިނާއަތުން 102 މީހަކަށް 143،446،094 (ސަތޭކަ ސާޅީސް ތިންމިލިއަން ހަތަރުލައްކަ ސާޅީސްހަހާސް ނުވަދިހަ ހަތަރެއް) ރުފިޔާގެ ލޯނު ވަނީ ދޫކޮށްފައެވެ.

މީގެ އިތުރުން އިމާރާތްކުރުމުގެ ސިނާއަތުން 57 ފަރާތަކަށް 55،938،052 (ފަންސާސް ފަސްމިލިއަން ނުވަލައްކަ ތިރީސް އަށްމިލިއަން ފަންސާސް ދޭއް) ރުފިޔާ ވަނީ ދޫކޮށްފައެވެ. އަދި ކޮމާރސްގެ ދާއިރާއިން 513 ފަރާތަކަށް 376،020،158 (ތިންސަތޭކަ ހަތްދިހަ ހަމިލިއަން ވިހިހާސް ސަތޭކަ ފަންސާސް އަށެއް) ރުފިޔާ ވަނީ ދޫކޮށްފައެވެ. އިންފޮމޭޝަން ޓެކްނޮލޮޖީގެ ދާއިރާއިން 9،853،333 (ނުވަމިލިއަން އަށްލައްކަ ފަންސާސްތިންހާސް ތިންސަތޭކަ ތިރީސް ތިނެއް) ރުފިޔާގެ ލޯނު ދޫކޮށްފައިވާކަމަށް ވަނީ ހާމަކޮށްފައެވެ.

އެސްޑީއެފްސީން ދޫކުރާ ލޯނުގެ 25 އިންސައްތަ ޚާއްޞަ ކޮށްފައިވަނީ އަންހެނުންނާއި ޒުވާނުންނާއި ނުކުޅެދުންތެރިކަން ހުރި މީހުންނަށެވެ. މިއީ އަންހެނުން ބާރުވެރިކުރުވުމަށް ސަރުކާރުން ކުރަމުންދާ މަސައްކަތުގެ ޚާއްސަ ބައެކެވެ.