ރުޅިވެރިކަމުން ދުރުވެ، ހިތްތައް ސާފުކުރޭ: އީދު ޚުތުބާ
އީދަކީ އޭގެ އުފަލުގައި އެންމެން ބައިވެރިކުރަންޖެހޭ އިހުތިފާލެއް
އީދު ނަމާދު
މުސްލިމުން މިއަދު ފިތުރު އީދު ދުވަސް ފާހަަގަކުރަމުންދާއިރު، ރުޅިވެރިކަމާއި ހަސަދަވެރިކަމުން އަހަރެމެންގެ ހިތްތައް ސާފުކުރަންޖެހޭކަމަށް އީދު ޚުތުބާގައި ބުނެފިއެވެ.
ފިތުރު އީދު ނަމާދަށްފަހު ރާއްޖޭގެ އެކި ކަންކޮޅުތަކުގައި މިއަދު އިއްވި ޚުތުބާގައި ބުނީ ފިތުރު އީދު ދުވަހަކީ މާތް ﷲ ފަރުޟުކުރެއްވި ރޯދަ އަދާކުރެވުނީތީ އެކަމަށް ޝުކުރުކޮށް ފިތުރު ޒަކާތް ނެރޭ ދުވަސް ކަމަށެވެ. މިއީ މާތް ﷲ ހަނދުމަކުރުމާއި، އިސްރާފު ކުރުމެއްނެތި، ދީނުގައި ކަނޑައަޅާފައިވާ އިމުގެ ތެރޭގައި އުފާ ފާޅުކުރުމުގެ ދުވަސްތައް ކަމަށް ޚުތުބާގައި ބުނެފައިވެއެވެ.
މިއީ އޭގެ އުފަލުގައި އެންމެން ބައިވެރިކުރުވަންޖެހޭ އިހުތިފާލިތަކެއް ކަމަށާއި، ފަގީރުންނާއި މިސްކީނުންނަށް ހެޔޮ ފޯރުކޮށްދީ އީދުގެ އުފަލުގައި އެމީހުން ބައިވެރިކުރުވަންޖެހޭ ކަމަށް އީދު ޚުތުބާގައި ބުނެފައިވެއެވެ.
މިއަދު ހުރިހާ ރުޅިވެރިކަމާއި، ހަސަދަވެރިކަމުން ހިތްތައް ސާފުކުރުން މުހިންމު ކަމަށާއި، ކޮންމެ މީހަކުވެސް އަނެކާގެ ހައްގު އަދާކުރުމަށް ނަސޭހަތްތެރިވެފައިވެއެވެ. މިގޮތުން މައިންބަފައިގެން ހައްގުތަކުން ފެށުމަށް ޚުތުބާގައި ވަނީ ނަސޭހަތްތެރިވެފައެވެ. މީގެ އިތުރުން ރަހިމުގެ ގުޅުން ދެމެހެއްޓުމަކީ މައިންބަފައިންގެ ހައްގުތަކާ ގުޅިފައިވާ ކަމެއް ކަމަށާއި، މިއަދު ގާތްތިމާގެ މީހުންނަށް ޒިޔާރަތްކޮށް ހެޔޮފޯރުވުން މުހިންމު ކަމަށް އީދު ޚުތުބާގައި ބުނެފައިވެއެވެ.
އީދު ދުވަހަކީ މުސްލިމުންގެ އިންސާނިއްޔަތުކަން ފާޅުވާންޖެހޭ ދުވަހެއް ކަމަށް އީދު ޚުތުބާގައި ބުނެފައިވެއެވެ. އިސްލާމްދީން ގޮވާލަނީ އަހަރެމެންނަކީ އެއްބަޔަކު އަނެއް ބަޔަކު ދެކެ ލޯބިވާ ބަޔަކު ކަމުގައި ވުމަށް ކަމަށާއި، ހަގީގީ ލޯބި އޮންނާނީ އެއްބަޔަކު އަނެއްބަޔަކަށް އޯގާތެރި ވެގެން ކަމަށް އީދު ޚުތުބާގައި ބުނެފައިވެއެވެ. ބާރުގަދަމީހާ ނިކަމެތި މީހާގެ އަތުގައި ހިފުމާއި، އެކަކު އަނެކަކުގެ ބޭނުންތައް ފުއްދައިދިނުމަކީ އީދު ރަމްޒުކޮށްދޭ އިންސާނީ ޝިއާރުތައް ކަމަށް އީދު ޚުތުބާގައި ބުނެފައިވެއެވެ.
