ތުލުސްދޫ ގޮނޑުދޮށް ހިމާޔަތް ކުރުމުގެ ޕްރޮޖެކްޓު ބަޔަކާ ޙަވާލުކޮށްފި
މަސައްކަތް ނިންމުމަށް ދީފައިވާ މުއްދަތަކީ 120 ދުވަސް
ތުލުސްދޫ ގޮނޑުދޮށް ހިމާޔަތް ކުރުމުގެ މަޝްރޫއު ޙަވާލުކުރުން
ކ ތުލުސްދޫ ގޮނޑުދޮށް ހިމާޔަތް ކުރުމަށް ބަޔަކާ ޙަވާލުކޮށްފިއެވެ.
ހޯމަ ދުވަހު މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ގައި ބޭއްވި ރަސްމިއްޔާތެއްގައި މި މަސައްކަތުގެ އެއްބަސްވުމުގައި ވަނީ ސޮއިކޮށްފައެވެ.
މި މަސައްކަތް ޙަވާލުކޮށްފައިވަނީ ހެވީ ފޯސް ޕްރައިވެޓް ލިމިޓެޑާއެވެ.
މި އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫޤެވެ. ކުންފުނީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރ އިބްރާހިމް ޒަމީރުއެވެ.
މި ކޮންޓްރެކްޓުގެ އަގަކީ 36،123،485.49 (ތިރީސް ހަ މިލިއަން، އެއްލައްކަ ތޭވިސްހާސް ހަތަރުސަތޭކަ އައްޑިހަ ފަސް ރުފިޔާ ސާޅިސް ނުވަ ލާރި) އެވެ. މަސައްކަތް ނިންމުމަށް ދީފައިވާ މުއްދަތަކީ 120 ދުވަހެވެ.
މި މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކުގެ ތެރޭގައި ރަށުގެ އިރުމަތީ ފަރާތު ގިރާ ސަރަޙައްދު ހިމާޔަތް ކުރުމުގެ ގޮތުން 70 މީޓަރުގެ 6 ބޮޑު ހިލައިގެ ބްރޭކްވޯޓަރ، 50 މީޓަރުގެ ދެ ބޮޑުހިލައިގެ ވައި-ގްރޮއިން، 170 މީޓަރުގެ ބޮޑު ހިލައިގެ ރިވެޓްމަންޓް ޤާއިމު ކުރުމާއި، އަދި އެ ސަރަޙައްދުގެ ގޮނޑުދޮށް ވެލިން މުއްސަނދި ކުރުން ހިމެނެއެވެ.
އޭގެ އިތުރުން، އެ ރަށުގައި ފާހަގަވެފައިވާ ރަށް ގިރުމުގެ މައްސަލަ ޙައްލު ކުރުމަށް ރަށުގެ ގޮނޑުދޮށް ހިމާޔަތް ކުރުމުގެ މަސައްކަތް ކުރިއަށްދާނެއެވެ.
