ކޮންސްޓްރަކްޝަން އިންޑަސްޓްރީގެ ބޭފުޅުންނާއެކު މަޝްވަރާ ކުރަނީ އަގުތައް ބަދަލު ގެންނާކަށް ނޫން: ސިރާޖު
ބޭނުމަކީ ހަމައެކަނި އުކާލާ ކުނި މެނޭޖްކުރުމަށް ފައިސާ ހޯދުމެއް ނޫން
ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު
ކޮންސްޓްރަކްޝަން އިންޑަސްޓްރީގެ ބޭފުޅުންނާއެކު މަޝްވަރާ ކުރަނީ ވެމްކޯ އިން ފޯރުކޮށްދޭ ޙިދުމަތްތަކުގެ އަގުތައް ބަދަލު ކުރުމަށް ނޫން ކަމަށް ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ސިރާޖު ވިދާޅުވީ އަގުތަކަށް ބަދަލު ގެނައުމުން ބައެއް ޝަކުވާތައް ހުރި ކަމަށެވެ. ކުންޏަށް ނަގާ ފީ އިތުރުކުރުމުން ބައެއް މެމްބަރުން ކޮމިޓީގައި ދިރިއުޅުމުގެ ޚަރަދު ބޮޑުވެގެންދާ ކަމަށް ވިދާޅުވި ކަމަށް ވެސް ސިރާޖު ވިދާޅުވިއެވެ.
އަގު ބޮޑުވެގެން ވެސް ކުނި އުފެއްދުން މަދު ކުރެވިއްޖެކަމަށްވާނަމަ އިޤްތިސާދަށް އޭގެއިން ކުރާ ފައިދާ ބޮޑުވާނެކަން ސިރާޖު ފާހަގަކުރެއްވިއެވެ.
ބޭނުމަކީ ހަމައެކަނި އުކާލާ ކުނި މެނޭޖްކުރުމަށް ފައިސާ ހޯދުން ނޫން ކަމަށް ވެސް ވިދާޅުވިއެވެ. ބޭނުންވާ ވަރަށް ވަގުތު ނުލިބުމުން ބައެއް ސެކްޓަރުގެ ކަންބޮޑުވުން އެބަހުރިކަން ފާހަގަކުރައްވާ ސިރާޖު ވިދާޅުވީ އެއް ސެކްޓަރަކީ ކޮންސްޓްރަކްޝަން އިންޑަސްޓްރީ ކަމަށެވެ.
ސިރާޖު އިތުރަށް ވިދާޅުވީ މިހާރު ކުރިއަށްދާ މަޝްވަރާތަކަކީ ފަސޭހަގޮތެއްގައި އެ މަސައްކަތް ކުރެވިދާނެ ގޮތްތަކަކީ ކޮބައިތޯ ބެލުމަށް ކުރާ މަޝްވަރާއެއް ކަމަށާއި މިހާރުގެ އަގުތައް ކަނޑައެޅުމުގައި 6 މަސް ދުވަހު މަސައްކަތް ކުރެއްވި ކަމަށެވެ.
ބޮޑުކުރީ ސަރުކާރުގެ އިދާރާތަކާއި ކުންފުނިތަކުގެ ކުނި އުކައިދޭ އަގުތަކެވެ. އަދި ކުނި ވަކިނުކޮށް ގެންނަ ފަރާތްތަކުންވެސް ފީ ނަގާގޮތަށް ވަނީ ހަމަޖައްސާފައެވެ. ނަމަވެސް އާންމު ގެތަކާއި ވިޔަފާރިތަކުން ނަގާ ފީތަކަށް ބަދަލެއް ގެނެސްފައެއް ނުވެއެވެ. ވެމްކޯގެ ޚިދުމަތުގެ އަގަށް ބަދަލު ގެނައިނަމަވެސް، އެ ބަދަލުތަކަކީ ވިޔަފާރީގެ އުސޫލުން ގެނައި ބަދަލުތަކެއް ނޫންކަމަށް ސިރާޖު ވަނީ ވިދާޅުވެފައެވެ.
ވެމްކޯއިން މިހާރު އޮޕަރޭޝަނަށް ކުރަމުންދާ ހޭދައިގެ ތަފްސީލްތަކަށް ބަލާއިރު؛ ވިޔަފާރިތަކުން ނަގާ ކުންޏަށް، ލީޓަރަކަށް 1.86 ރުފިޔާ ހޭދަކުރާއިރު, ކޯލް އެންޑް ޕިކަޕް ސަރވިސްއަށް 3.88 ލާރި ހޭދަވާކަމަށް އޭނާ ވިދާޅުވިއެެވެ. ޓްރާސްފަރގައި ކިލޯއަކަށް 72 ލާރި، އަދި ތިލަފުއްޓަށް ވޭސްޓް ޕްރޮސެސްކުރުމަށް 1.70 ރުފިޔާ ހޭދަކުރާކަން ހާމަ ކުރެއްވިއެވެ.
