52 މިލިއަން ރުފިޔާގެ އަމުރު: ހައިކޯޓުގެ ނިންމުން އިސްތިއުނާފެއް ނުކުރޭ
16 އެޕްރީލު 2023 | އާދީއްތަ 10:55މި މައްސަލާގައި ކޮށްފައި އޮތް ކަމަކީ ކޯޓް ޕްރޮސެސް ނަހަމަގޮތުގައި ބޭނުންކުރުން ކަމަށް ފަނޑިޔާރުން ވިދާޅުވި
ކުރީގެ ރައީސް ޔާމީން، މީގެ ކުރިން ބޭއްވި ޝަރީއަތަކަށް ހާޒިރުކުރުން
ވ. އާރަށު މައްސަލާގައި 52 މިލިއަން ރުފިޔާ ދައުލަތަށް ދެއްކުމަށް، ކުރީގެ ރައީސް އަބްދުﷲ ޔާމީންގެ މައްޗަށް ކުރި އަމުރު ބާތިލުކުރުމަށް ހައިކޯޓުން ނިންމި ނިންމުން އިސްތިއުނާފު ނުކުރާކަމަށް، ޕްރޮސެކިއުޓަރ ޖެނެރަލްގެ އޮފީހުން ބުނެފިއެވެ.
މި މައްސަލާގައި ހައިކޯޓުގެ ފަނޑިޔާރުން ނިންމާފައިވަނީ، ދައުލަތުން ކޯޓުގެ އިޖުރާއަތު ނަހަމަގޮތުގައި ބޭނުންކޮށްފައިވާކަމަށް ދެކެވަޑައިގަންނަވާތީ ދަށު ކޯޓުން ނެރުނު އަމުރަކީބާތިލުއަމުރެއްކަމަށެވެ. ދައުލަތުން އެދިފައިވާކަމެއް މައުލޫއީ މައްސަލައިގެ ގަޒިއްޔާގެ ނިންމުމުގައި ހިމަނާފައިނުވާނަމަ، އެކަމަށް އަދުލުގެ ނިޒާމުގައި އޮންނަ ހައްލަކީ އިސްތިއުނާފު ކުރުންކަމަށް ފަނޑިޔާރުން ވިދާޅުވިއެވެ.
ފަނޑިޔާރުން ވިދާޅުވީ، މި މައްސަލާގައި އަމުރު ހޯދުމުގެ ނަމުގައި ކޮށްފައި އޮތް ކަމަކީ ކޯޓް ޕްރޮސެސް ނަހަމަގޮތުގައި ބޭނުންކުރުން ކަމަށް ބެލެވޭ ކަމަށެވެ.
ސަބަބަކީ، ޕްރޮސިކިއުޝަނުން ކްރިމިނަލް ކޯޓުގައި ނެރެދިނުމަށް އެދުނު އަމުރާމެދު އެ ގަޒިއްޔާގައި ގޮތެއް ނިންމުން ގާނޫނީގޮތުން ލާޒިމްވިނަމަވެސް، އެ ފަދަ ނިންމުމެއް އެ ގަޒިއްޔާގައި ނިންމާފައިނެތުމުން، އެކަން އިސްތިއުނާފު ކުރުމުގެ ބަދަލުގައި ހަމަ އެ އަމުރު ނެރެދިނުމަށް އަލުން އެދިފައިވާތީއެވެ.
ހައިކޯޓުގެ އަމުރެއް އިސްތިއުނާފުކުރުމަށް ދައުލަތަށް ލިބިގެންވަނީ 48 ގަޑިއިރެވެ. ރާއްޖެއެމްވީއާ ވާހަކަފުޅުދައްކަވަމުން ޕީޖީ އޮފީހުގެ އޮފިޝަލަކު ވިދާޅުވީ، ދައުލަތުން އެ އަމުރު އިސްތިއުނާފުކޮށްފައި ނުވާނެކަމަށެވެ.
އޭގެ އިތުރުން، ފައިސާ ހޯދުމަށް ދައުލަތުން ދަށު ކޯޓުގައިވެސް އެދިފައިވާނެކަމަށާއި، ނަމަވެސް ދަށު ކޯޓުގެ ނިންމުމުގައި އެކަމަށް އަލިއަޅުވާލާފައި ނުވާކަމަށް އޭނާ ވިދާޅުވިއެވެ.
ޕީޖީ އޮފީހުގެ ވިސްނުމަކީ، ހައިކޯޓުގައި ޔާމީނުގެ ފަރާތުން ހުށައަޅާފައިވާ، ވ. އާރަށު ހިޔާނާތުގެ މައްސަލައިގެ އިސްތިއުނާފުގައި އެކަމަށް އަލިއަޅުވާލުންކަމަށްވެސް ޕީޖީ އޮފީހުގެ އޮފިޝަލް ވިދާޅުވިއެވެ.
