ދާއިރާގެ ރައްޔިތުންނާއެކު އަބަދުވެސް ދެމި ހުންނަވާނެ ކަމަށް ރައްޔިތުންގެ މަޖިލީހުގެ ކ. ގުރައިދޫ ދާއިރާއަށް އިންތިޚާބުވެވަޑައިގެންނެވި އެމްޑީޕީގެ ކެންޑިޑޭޓް އިބްރާހިމް ޝާޒު ވިދާޅުވެއްޖެއެވެ.

ޝާޒު މިފަދައިން ވިދާޅުވީ އިންތިޚާބު ކާމިޔާބު ކުރެއްވުމާ ގުޅިގެން ކެމްޕޭނު ކުރި ފަރާތްތަކާއި ވޯޓުލީ ފަރާތްތަކަށް ޝުކުރު އަދާ ކުރައްވައި އާއްމު ކުރެއްވި ވީޑިއޯއެއްގައެވެ. ޝާޒު ވިދާޅުވީ މިއީ ގުރައިދޫ ދާއިރާގެ ތާރީހު ބަދަލުކޮށްލި ކާމިޔާބީއެއް ކަމަށެވެ. އަދި އެ ކާމިޔާބީ ހޯދައިދިނުމަށް މަސައްކަތް ކުރި ރައްޔިތުންނަށާއި ކެމްޕޭން ޓީމަށް ވަނީ ޝުކުރު އަދާ ކުރައްވާފައެވެ.

މީގެ އިތުރުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ލަފަޔާއި، ހިތްވަރު ދެއްވިކަން ފާހަގަކުރައްވައި އެމަނިކުފާނު ބެހެއްޓެވި ގާތްކަމަށް ޝާޒު ޝުކުރު އަދާ ކުރެއްވިއެވެ. އަދި ގުރައިދޫ ދާއިރާގައި ހިމެނޭ ތިން ރަށް ކަމަށްވާ ގުޅި، ގުރައިދޫ އަދި މާފުށީ ރައްޔިތުންނާއެކު އަބަދުވެސް ދެމި ހުންނަވާނެ ކަމުގެ ޔަގީންކަން އޭނާ ދެއްވިއެވެ.

ވަގުތީ ނަތީޖާ ދައްކާގޮތުން ޝާޒުއަށް އިންތިޚާބުގައި ވަނީ 1340 ވޯޓު ލިބިވަޑައިގެންފައެވެ. އޭނާއާ އެންމެ ގާތުން ވާދަކުރެއްވީ ޕީޕީއެމް ކެންޑިޑޭޓު ހުސައިން ރިޒާ އާދަމެވެ. އޭނާއަށް ލިބިވަޑައިގެންފައިވަނީ 1226 ވޯޓު ކަމަށް ވަގުތީ ނަތީޖާއިން ދައްކައެވެ.

މި އިންތިޚާބުގައި 3423 މީހުންނަށް ވޯޓުލުމުގެ ހައްގު ލިބިފައިވާއިރު، ވޯޓުލުމުގެ ސުންގަޑި ހަމަވިއިރު ވޯޓު ލާފައިވަނީ 2755 މީހުންނެވެ. އެއީ 1431 ފިރިހެނުންނާއި 1324 އަންހެނުންނެވެ.

ޝާޒު މި އިންތިޚާބު ކާމިޔާބު ކުރައްވާފައިވާއިރު މިއީ ތާރީހުގައި ވެސް ގުރައިދޫ ދާއިރާގެ ގޮނޑި އެމްޑީޕީއަށް ކާމިޔާބު ކުރެވުނު ފުރަތަމަ ފަހަރެވެ. މި އިންތިޚާބު ކާމިޔާބުވުމާއެކު އެމްޑީޕީއަށް މަޖިލީހުގެ 68 ގޮނޑި މިހާރު ވަނީ ލިބިފައެވެ.