ސްޕެއިންގެ އެތުލީޓަކު 500 ދުވަހު އެކަނި ހޮހޮޅައެއްގައި އުޅުމަށް ފަހު ބޭރަށް ނުކުމެއްޖެއެވެ. މި މުއްދަތުގައި އޭނާ އެހެންއެއްވެސް މީހަކާ ވާހަކަދައްކާ ހަދާފައި ނުވާކަމަށް ވެއެވެ.
އެތުލީޓު ބީޓްރިޒް ފްލެމީނީ ގްރެނާޑާގައިވާ ހޮހޮޅަޔަށް ވަންއިރު ރަޝިޔާއިން ޔޫކްރެއިންވެސް ނުހިފައެވެ. އަދި މުޅި ދުނިޔެ އޮތީ ކޮވިޑް 19ގެ ކަސްތޮޅުން ބަނދެވިފަ އެވެ. ބީޓްރިޒް ފްލެމީނީ ހޮހޮޅައަށް ވަދެފައިވަނީ އެތައް ސައިންޓިސްޓުންނެއް ގުޅިގެން ކުރިޔަށް ގެންދިޔަ ސައިންސް އެކްސްޕެރިމެންޓެއްގެ ބައެއްގެ ގޮތުގައެވެ.
ހޮހޮޅައިން ނުކުތުމަށް ފަހު އޭނާ ބުނެފައިވާ ގޮތުގައި އޭނާގެ ސިކުނޑި އަދިވެސް ވަނީ އޭނަ ހޮހޮޅަޔަށް ވަން ތާރީޚު ކަމަށްވާ 21 ނޮވެމްބަރު 2021ގައި ހުއްޓިފަ ކަމަށާއި ދުނިޔޭގައި ހިންގަމުންދާ އެއްވެސް ކަމެއް އޭނާއަކަށް ނޭނގޭ ކަމަށެވެ.
އުމުރުން މިހާރު 50 އަހަރުގެ ފްލެމީނީ ހޮހޮޅަޔަށް ވަންއިރު އުމުރަކީ 48 އަހަރެވެ. 230 ފޫޓު އަޑީގައިވާ ހޮހޮޅައިގައި އޭނަ ވަގުތު ހޭދަކޮށްފައިވަނީ ކަސްރަތު ކުރުމާއި ކުރެހުމުގައި އަދި ވޫލުން ތޮފި ވިޔުމުގައެވެ. މި މުއްދަތުގައި އޭނާ 60 ފޮތް ކިޔައި އަދި އެއްހާސް ލީޓަރުގެ ފެން ބޭނުން ކޮށްފައިވާކަމަށް އޭނާގެ ސަޕޯޓް ޓީމުން ބުނެފައިވެއެވެ. ހޮހޮޅައިގައިވީ މުއްދަތުގައި ސައިކޮލޮޖިސްޓުންނާއި ރިސަރޗް ކުރާ ފަރާތްތަކުގެ އިތުރުން ހޮހޮޅައިގެ ކަންތައްތައް ދިރާސާ ކުރާ ފަރާތްތައް ހިމެނޭ ޓީމަކުން ގެންދިޔައީ އޭނާގެ ހަރަކާތްތައް މޮނިޓަރ ކުރަމުންނެވެ. ނަމަވެސް މިއިން އެއްވެސް އެކްސްޕާރޓެއް އޭނާއާ ގުޅައި ވާހަކަ ދައްކާ ހަދާފައެއް ނުވެއެވެ.
ފްލެމީނީ ހޮހޮޅައިން ނުކުތް މަންޒަރު ސްޕެއިން ޓީވީއިން ދައްކާފައިވެއެވެ. ފަހުން ނޫސްވެރިންނާ ވާހަކަ ދައްކަމުން އޭނާ ބުނެފައިވަނީ އޭނާހުރީ ވަރަށް ހިތްހަމަޖެހިގެން ކަމަށާއި އިހުސާސްކުރެވެނީ އޭގެ ދެވަނައެއް ނެތް ފަދަ އިހުސާސެއް ކަމުގައެވެ. އިތުރު ތަފްސީލު ދިނުމަށް ނޫސްވެރިން އެދުމުން އޭނާ ބުނެފައިވަނީ ދޮޅު އަހަރު ވަންދެން އަމިއްލަ ނަފްސު ފިޔަވައި އެހެން އެއްވެސް ފަރާތަކާ ވާހަކަ ނުދައްކާ ހުރުމުން ވާހަކަ ދައްކަން އުނދަގޫ ކަމަށެވެ. ދޮޅު އަހަރު ވަންދެން ރަނގަޅަށް ފެންވަރާ ނުލާކަމަށާއި ފެންވަރައިގެން ނޫސްވެރިންނާ ބައްދަލުކުރާނެ ކަމަށް އޭނާ ބުނެފައިވެއެވެ.
ފްލެމީނީ ނޫސްވެރިން ގާތު ބުނެފައިވާ ގޮތުގައި ދެމަހެއްހާ ދުވަހުގެތެރޭ ދުވަސްދާވަރު އޮޅިއްޖެ އެވެ. އަދި އޭނާއަށް ހީވަނީ ހޮހޮޅައިގައި ހުރެވުނީ 160 ދުވަހާ 170 ދުވަހާ ދެމެދުގެ މުއްދަތަކަށް ކަމަށެވެ. އެންމެ ދަތި ކަމަކަށް ދިމާވީ މުޅިމީހާ ނުފެންނަހާ ގިނަ އަދަދަށް މެހި ހޮހޮޅުތެރެޔަށް ވަދެގެން ކަމަށް ބުނެފައިވެއެވެ. މީގެ އިތުރުން ޒާތްޒާތުގެ އަޑުތައް އިވޭތީ ވެސް އުނދަގޫވި ކަމަށް ބުނެފައިވެއެވެ. މިހެން ދިމާވަނީ އެހާ ހިމޭން ތަނެއްގައި އެހާ ގިނަދުވަހު ހުރުމުން ސިކުޑި ހަދާ "ޓްރިކް" އަކުން ކަމަށް ވެއެވެ.
ފްލެމީނީ ހޮހޮޅައިގައިވީ ވަގުތު ބޭނުންކޮށްގެން މާހިރުން ވަނީ "ސޯޝަލް އައިސޮލޭޝަން" ނުވަތަ ދިގު މުއްދަތަކަށް މުޖްތަމައާ ވަކިވުމުން އިންސާނުންނަށް އެކަމުން ކުރާ އަސަރު ދިރާސާ ކޮށްފައެވެ.
ފްލެމީނީގެ ސަޕޯޓް ޓީމުން ބުނާ ގޮތުގައި އޭނަވަނީ ހޮހޮޅައެއްގައި އެކަނި އެންމެ ގިނަ ވަގުތު ހޭދަކުރުމުގެ ދުނިޔޭގެ ރިކޯޑު މުގުރާލާފައެވެ.
ބިމުއަޑީގެ ތަނެއްގައި އެންމެ ގިނަ ދުވަހު ތިބި ކަމަށް އަދި ރިކޯޑު ކުރެވިފައިވަނީ މައިނެއްގައި ބަންދުވެފައި ތިބި ޗިލީ އަދި ބޮލީވިޔާގެ 33 މައިނަރުންނަށެވެ. 2010 ވަނަ އަހަރު ހިނގި ހާދިސާއެއްގައި މައިނެއްގެ ބައެއް ވެއްޓުމާއި ގުޅިގެން އެމީހުން ވަނީ 69 ދުވަސް ބިމު އަޑީގައި ހޭދަ ކޮށްފައެވެ.
