ލޯކަލް ޓޫރިޒަމް ކުރިއަރުވަމުން އަދިވެސް އިތުރު މަސައްކަތްތަކެއް ކުރަންޖެހޭ: ސްޓޭޓް މިނިސްޓަރު، ޑރ. އަހުމަދު ސާލިހު
15 އެޕްރީލު 2023 | ހޮނިހިރު 08:44ގެސްޓް ހައުސްތައް ހުޅުވަން މީހުން ފަސްޖެހެނީ ގެސްޓުން ގެނެވޭނެ ފަސޭހަ އިންތިޒާމުތަކެއް ނެތުމުން
ޓޫރިޒަމް މިނިސްޓްރީގެ ސްޓޭޓް މިނިސްޓަރު، ޑރ. އަހުމަދު ސާލިހު
ލޯކަލް ޓޫރިޒަމް ކުރިއަރުވަމުން އަދިވެސް އިތުރު މަސައްކަތްތަކެއް ކުރަންޖެހޭ ކަމަށް, ޓޫރިޒަމް މިނިސްޓްރީގެ ސްޓޭޓް މިނިސްޓަރު ޑރ. އަހުމަދު ސާލިހު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ސްޓޭޓް މިނިސްޓަރު ވިދާޅުވީ, އަދިވެސް ބައެއް ރަށްރަށުގައި ގެސްޓް ހައުސްތައް ވަރަށް މަދުކަމަށެވެ. އައްޑޫގައި 17 ގެސްޓް ހައުސް ހުރިއިރު، ޏ އަތޮޅުގައި 19 ގެސްޓްހައުސް، ގދ.ގައި 8 ގެސްޓް ހައުސް އަދި ގއ.ގައި 11 ގެސްޓްހައުސް އެބަހުރި ކަމަށްވެސް ވިދާޅުވިއެވެ.
ގެސްޓް ހައުސްތައް ހުޅުވަން މީހުން ފަސްޖެހެނީ ގެސްޓުން ގެނެވޭނެ ފަސޭހަ އިންތިޒާމުތަކެއް ނެތުމުންކަން ފާހަގަކުރައްވައި ޑރ. އަހްމަދު ސާލިހު ވިދާޅުވީ، އެކަން ހައްލު ކުރުމަށް ކުރަންޖެހޭ ކަންތައްތަކެއް އެބަހުރި ކަމަށެވެ.
ގެސްޓް ހައުސް ހުޅުވަން ބޭނުންވާ ފަރާތްތައް ކައިރިއަށް ޓޫރިޒަމް މިނިސްޓްރީން ގޮސް، މިކަންތައްތައް ކުރިއަށް ގެންދަންޖެހޭ ގޮތް ތަފްސީލްކޮށްދޭ ކަމަށާއި، މި ދާއިރާއިން ގިނަ ބަޔަކު ތަމްރީނު ކުރަންޖެހޭ ކަމަށްވެސް ސްޓޭޓް މިނިސްޓަރު ވިދާޅުވިއެވެ.
ޔޫރަޕިއަން ޔޫނިއަންގެ "އީޔޫ ސަޕޯޓް ފޯރ އަ ރެޒިލިއަންޓް ރިކަވަރީ އޮފް އެސްއެމްއީ ޓޫރިޒަމް އިންޑަސްޓްރީ އިން ދަ މޯލްޑިވްސް" ޕްރޮޖެކްޓުގެ ދަށުން، ގެސްޓް ހައުސްއާއި ސަފާރީތަކަށް އިތުރު 10.1 މިލިއަން ރުފިޔާގެ މާލީ އެހީ ދާދި ފަހުން ވަނީ ފޯރުކޮށްދީފައެވެ.
މިއީ އީޔޫގެ ފަރާތުން، ކޮވިޑް-19އާ ގުޅިގެން ދިވެހިރާއްޖެއަށް ފުޅާ ދާއިރާއެއްގައި ފޯރުކޮށްދޭ އެހީތަކުގެ ތެރެއިން ހިމެނިގެން ދެވޭ އެހީއެކެވެ. އެހީއަށް އެދުނު ފަރާތްތަކުގެ ތެރެއިން ޖުމްލަ 406 ފަރާތަކަށް ވަނީ އެހީ ފޯރުކޮށްދީފައެވެ. އެއީ 341 ގެސްޓް ހައުސްއާއި، 65 ސަފާރީއެވެ. އެއީ ގެސްޓްހައުސްތަކުގައި 5،010 އެނދާއި ސަފާރީތަކުގައި 1،217 އެނދެވެ. ބެޑް ރޭޓަށް ނިސްބަތްކޮށް 10.1 މިލިއަން ރުފިޔާގެ މި އެހީ ދޫކޮށްފައިވާއިރު، ކޮންމެ އެނދަކަށް 1،614.44ރ. (އެއްހާސް ހަސަތޭކަ ސާދަ ރުފިޔާ، ސާޅީސް ހަތަރު ލާރި) ވަނީ ދޫކޮށްފައެވެ.
