އަމިއްލަ ދަނޑުގައި ބަޔާން ބަލިކޮށް ސިޓީން ސެމީގެ އުންމީދު ބޮޑުކޮށްފި

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި ޖަރުމަނުގެ ބަޔާން މިއުނިކް ބަލިކޮށް މެންޗެސްޓަރ ސިޓީން ސެމީ ފައިނަލްގެ އުންމީދު ބޮޑު ކޮށްފި އެވެ.

އަންގާރަ ދުވަހުގެ ރޭ ސިޓީގެ އިއްތިހާދު ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. ފުރަތަމަ ހާފު ފަށައިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނުނުއިރު، ސިޓީން ވަނީ 27 ވަނަ މިނެޓުގައި ލީޑު ނަގައިފަ އެވެ. އެއީ ބަޔާންގެ ގޯލު އޭރިޔާ ބޭރުން ބެނާޑޯ ސިލްވާ ދިން ބޯޅައެއް ގޯލުގެ މަތީ ކަނަށް ފޮނުވާލައިގެން ރޮޑްރީ ޖަހައިދިން ލަނޑެކެވެ. ރޮޑްރީ ފޮނުވާލި ބޯޅަ ހުއްޓުވުމަށް ބަޔާންގެ ގޯލް ކީޕަރު ޔަން ސޮމާ އަށް މާބޮޑު މަސައްކަތެއް ނުކުރެވުނެވެ. ދެ ވަނަ ހާފު ފަށައިގެން ބަޔާނުން ވެސް ވަނީ ލަނޑު ޖެހުމަށް މަސައްކަތް ކޮށްފަ އެވެ. އެ ޓީމުގެ ލެރޯއީ ސާނޭ އާއި ޑިފެންޑަރު މަތައިސް ޑި ލިޓް އަށް ވަނީ ރަނގަޅު ފުރުސަތުތަކެއް ލިބިފަ އެވެ. މެޗުގެ 70 ވަނަ މިނެޓުގައި ސިލްވާ ވަނީ ސިޓީގެ ލީޑު ފުޅާކޮށްދީފަ އެވެ. އެއީ އޭރިޔާ ތެރެއިން އާލިން ހާލަންޑު ހުރަސްކޮށްދިން ބޯޅައެއް ބޮލުން ގޯލަށް ފޮނުވާލައިގެންނެވެ. އޭގެ ފަހުން 76 ވަނަ މިނެޓުގައި ހާލަންޑު ވަނީ ސިޓީގެ ތިން ވަނަ ލަނޑު ޖަހައިފަ އެވެ. އެއީ ޖޯން ސްޓޯންސް ތިން ބޯޅައެއް ގޯލަށް ވައްދާލައިގެންނެވެ.

މޮޅާއެކު ސިޓީން ސެމީގެ އުންމީދު ބޮޑުކޮށްފައިވާއިރު، މި ދެ ޓީމު ކުޅޭ ކުއާޓާގެ ދެ ވަނަ ލެގު އޮންނާނީ ބަޔާންގެ ދަނޑުގަ އެވެ. ބަޔާނަށް ސެމީގެ ޖާގައެއް ހޯދޭނީ ސިޓީގެ މައްޗަށް ތިން ލަނޑުގެ ތަފާތުން ކުރި ހޯދައިގެންނެވެ.