ބޮރުޝިއާ ޑޯޓްމަންޑަށް ކުޅެމުން އަންނަ ޖަރުމަނުގެ ޒުވާން އެޓޭކިން މިޑްފީލްޑަރު ޖޫލިއަން ބްރާންޓް އެކުލަބާއެކު ހަދާފައިވާ އެއްބަސްވުން އައުކޮށްފި އެވެ.

ބަޔާ ލެވަކޫސަން ދޫކޮށް ބްރާންޓް ޑޯޓްމަންޑަށް ބަދަލުވީ 2019 ވަނަ އަހަރު އެވެ. އެ ކުލަބުން އޭރު އޭނާ ހޯދީ ލެވަކޫސަންގައި ވެސް އޭނާ ދެއްކި މޮޅު ކުޅުމުގެ ސަބަބުންނެވެ. ޑޯޓްމަންޑުން އޭރު ބްރާންޓް ހޯދުމަށް ލެވަކޫސަނަށް 25 މިލިއަން ޔޫރޯ ދެއްކި ކަަމަށް ރިޕޯޓުތައް ބުނެ އެވެ. އޭރު އޭނާ ޑޯޓްމަންޑަށް ބަދަލުވީ ފަސް އަހަރު ދުވަހުގެ އެއްބަސްވުމެއް ދަށުންނެވެ. އެ އެއްބަސްވުމުގެ މުއްދަތު އަންނަ އަހަރު ހަމަވާ ގޮތަށް އޮތް ނަމަވެސް، ޑޯޓްމަންޑުން ބޭނުންވީ ބްރާންޓްގެ އެއްބަސްވުން އައު ކުރުމަށެވެ. ބާކީ އެއް އަހަރު އޮއްވާ ޑޯޓްމަންޑުން އޭނާގެ އެއްބަސްވުން އައު ކުރީ ޔޫރަޕުގެ އެހެން ކުލަބުތަކުން ވެސް އޭނާ އަށް ލޯ އަޅަމުން ދަނިކޮށް ކަމަށް މީޑިއާ ރިޕޯޓުތައް ބުނެ އެވެ. ޑޯޓްމަންޑުގެ އެއްބަސްވުން ބްރާންޓް އައުކުރީ އިތުރު ދެ އަހަރަށެވެ. އެހެންކަމުން އައު އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.

ބްރާންޓް ވަނީ މިހާތަނަށް ޑޯޓްމަންޑަށް ކުޅެދިން 162 މެޗުގައި 29 ލަނޑު ޖަހައިފަ އެވެ. އޭނާ ވަނީ އެ ކުލަބާއެކު ޖަރުމަނު ކަޕެއް ކާމިޔާބުކޮށްފަ އެވެ. ބްރާންޓްއާ ގުޅޭ ގޮތުން ޑޯޓްމަންޑުގެ ކޯޗު އެޑިން ޓާޒިިކް ބުނީ، އޭނާ އަކީ ހުނަރުވެރި ކުޅުންތެރިޔެއް ކަމަށާއި، ޑޯޓްމަންޑުގެ ވައްޓަފާޅީގައި އޭނާ އަށް ކުޅެވޭނެ ކަމަށެވެ. އެހެންކަމުން ބްރާންޓް ކުލަބުގައި ބަހައްޓަން ބޭނުންވާ ކަން މީގެ ކުރިން ވެސް ޓާޒިކް ވަނީ ހާމަކޮށްފަ އެވެ. ބްރާންޓް ވަނީ 2016 ވަނަ އަހަރު ޖަރުމަނުގެ ޤައުމީ ޓީމުން ވެސް ޖާގަ ހޯދައިފަ އެވެ. އޭގެ ފަހުން 2018 ވަނަ އަހަރު އޮތް ފީފާ ވޯލްޑް ކަޕްގައި ވެސް އޭނާ ކުޅުނެވެ. ނަމަވެސް މިދިޔަ އަހަރު ޤަތަރުގައި ނިމުނު ވޯލްޑް ކަޕަށް ޖަރުމަނުން އެކުލަވާލި ސްކޮޑުގައި އޭނާ ހިމަނައިފައެއް ނުވެ އެވެ.