ސަފާ ގުރޫޕް އުމްރާވެރިން ފުރައިފި
އުމްރާވެރިން ސަޢުދީއަށް ދަތުރުކުރަނީ އޮމާންގެ "ސަލާމް އެއަރ"ގެ ޗާޓަރ ފްލައިޓަކުން
ސަފާ ގްރޫޕުން އުމްރާއަށް މީގެކުރިން ދިޔަ އުމްރާވެރިންތަކެއް
ވިސާ ހަމަނުޖެހިގެން އުމްރާއަށް ނުފުރި ތިބި އައްސަފާ އެންޑް ހައްޖު އުމްރާ ގްރޫޕްގެ އުމްރާވެރިން އަންގާރަ ދުވަހު އުމްރާއަށް ދިޔުމަށް ފުރައިފިއެވެ.
އެގްރޫޕްގެ އުމްރާވެރިން ސަޢުދީއަށް ދަތުރުކުރަނީ އޮމާންގެ "ސަލާމް އެއަރ"ގެ ޗާޓަރ ފްލައިޓަކުންނެވެ. ސަފާ ގްރޫޕުން ބުނެފައިވަނީ ދަތުރުގެ އެހެނިހެން ހުރިހާ އިންތިޒާމްތައްވެސް ހަމަޖައްސާފައިވާކަމަށެވެ. އެގޮތުން ވިސާއާއި، ޓިކެޓްގެ އިތުރުން، ސަޢުދީގައި ތިބުމާއި އަޅުކަމާއި ގުޅޭ ހުރިހާ އިންތިޒާމްތަކެއްވެސް ހަމަޖައްސާފައިވާކަމަށެވެ.
ސަފާ ހައްޖު ގުރޫޕްގެ ފަރާތުން ރަމަޟާން މަހު އުމްރާއަށް ދިޔުމަށް ހަމަޖެހިފައިވާ 181 އުމްރާވެރިން އުމްރާއަށް ގެންދިޔުން ވިސާ ނުލިބުނުކަމަށް ބުނެ ފަހުވަގުތު ދަތުރު ކެންސަލްކުރިއެވެ. އުމްރާވެރިން ފުރަތަމަ ފުރަން ހަމަޖެހުނީ އޭޕްރީލް މަހުގެ 6 ވަނަ ދުވަހުއެވެ. މި ރަމަޟާން މަހު ޢުމްރާއަށް ގެންދިއުމަށް ކުންފުންޏަށް ފައިސާ ދައްކާފައިވާ ޢުމްރާވެރިން، އެންމެ ލަސްވެގެން ރަމަޟާންމަހުގެ ފަހު 10 އަށް ޢުމްރާއަށް ގެންދިއުމުގެ އެންމެހައި އިންތިޒާމްތައް ހަމަޖެއްސުމަށް އެ ކުންފުންޏަށް މިނިސްޓްރީން އަންގާފައިވާކަމަށް އިސްލާމިކް މިނިސްޓްރީން ބުނެފައިވެއެވެ.
މިމައްސަލައިގައި ކަންހިނގާފައިވާ ގޮތާއި ގުޅޭގޮތުން "ރާއްޖެއެމްވީ" އަށް މައުލޫމާތުދެމުން ސަފާ ގްރޫޕުން ބުނެފައިވަނީ ގްރޫޕުގެ އުމްރާވެރިން ރަމަޟާންމަހުގެ 20 ވަނަ ދުވަހު އުމްރާއަށް ފުރުވާލެވޭނެ ކަމަށާއި، އެއްވެސް ބަޔަކަށް އޮޅުވައިލުމަކީ އެ ގްރޫޕުގެ ވިސްނުމެއް ނޫން ކަމަށެވެ. ވިސާގެ ކަންކަމުގައި ސައޫދީން މުއާމަލާތު ކުރަމުންދިޔަ އޭޖެންސީން ވިސާ ލިބިފައިވާ ކަމަށް އަބަދުވެސް ބުނަމުން ދިޔަކަމަށާއި، އެންމެ ފަހު ވަގުތާ ޖެހެންދެންވެސް އޭޖޭންސީން އެ ޔަގީންކަން ދިން ކަމަށެވެ. އަދި އުމްރާވެރީންނަށް އެކަން ދުރާލައި ނޭންގުނީ ސައޫދީ އޭޖެންސީން ވިސާ ލިބިފައިވާކަމުގެ ޔަގީންކަން ދިނުމުން ކަމަށްވެސް ސަފާ ގްރޫޕުން ބުނެފައިވެއެވެ.
މިމައްސަލައިގައި އިސްލާމިކް މިނިސްޓްރީން ބުނެފައިވަނީ، ކުންފުނިން ޢަމަލުކުރަމުންދާގޮތް މިނިސްޓްރީން ވަރަށް ގާތުން ބަލަމުންދާ ކަމަށެވެ. އަދި މައްސަލަ ފެންމަތިވުމާއެކު އުމްރާވެރިންގެ ހައްގުތައް ކަށަވަރުކޮށްދިނުމަށް މިނިސްޓްރީގެ ފަރާތުން މަސައްކަތްކޮށްފައިވާނެކަމަށް ވަނީ ބުނެފައެވެ.
