ސައުދީ ޕްރޯ ލީގުގައި އަލް ފެއިޙާއާ ދެކޮޅަށް ކުޅުނު މެޗުން އެއްވަރުގެ، އެއް ވަނައިގައި އޮތް އަލް އިއްތިޙާދާ ދެމެދު ފަރަގު ކުޑަ ކުރަން ލިބުނު ފުރުސަތު އަލް ނަޞްރުން ނަގާލައިފި އެވެ.

އާދިއްތަ ދުވަހުގެ ރޭ އަލް ފެއިޙާއާ ދެކޮޅަށް ކުޅުނު މެޗުން މޮޅުވެ، އިއްތިޙާދާ ދެމެދު އޮތް ފަރަގު ޕޮއިންޓަކަށް ކުޑަ ކުރުމުގެ ފުރުސަތު އަލް ނަޞްރަށް އޮތެވެ. ނަމަވެސް މެޗު ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވި އެވެ. މެޗުގައި ބޯޅަ ހިފަހައްޓައިގެން ގިނަ ހަމަލާތަކެއް އުފައްދައި ރަނގަޅަށް ކުޅުނީ އަލް ނަޞްރުންނެވެ. އެޓީމުގެ އައިމަން ޔަހްޔާ ފޮނުވާލީ ހަމަލާ އަލް ފެއިޙާގެ ގޯލް ކީޕަރު ވަނީ މަތަކޮށްފަ އެވެ. އޭގެ ފަހުން އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯގެ އިތުރުން ޓަލިސްކާ އަށް ވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބިފަ އެވެ. މެޗުގައި އަލް ނަޞްރުން ލަނޑެއް ޖެހުމަށް މަސައްކަތް ކުރަމުން ދަނިކޮށް، އަލް ފެއިޙާގެ ޓްރަކޮވްސްކީ ވަނީ ލަނޑެއް ޖަހައިފަ އެވެ. ނަމަވެސް އެ ލަނޑު ޖެހުމުގެ ކުރިން އޭނާ އޮފްސައިޑުގައި ހުރުމުން ރެފްރީ ވަނީ ލަނޑު ބަލައި ނުގަންނަން ނިންމައިފަ އެވެ.

މެޗު އެއްވަރުވެ އަލް ނަޞްރު އޮތީ ލީގު ތާވަލްގެ ދެ ވަނައިގަ އެވެ. އެއީ މިހާތަނަށް އެ ޓީމު ކުޅުނު 23 މެޗުން 53 ޕޮއިންޓާއެކު އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އޮތް އަލް އިއްތިޙާދަށް ލިބެނޫ 56 ޕޮއިންޓެވެ. ލީގުގައި ދެން އަލް ނަޞްރަށް އޮންނާނީ މި މަހުގެ 19 ވަނަ ދުވަހު އަލް ޙިލާލާ ދެކޮޅަށް ކުޅޭ މެޗެވެ.