ރަމަޟާން ކެރަމް ކަޕްގެ ފިރިހެން ޑަބަލްސްގެ ޗެމްޕިއަންކަން އިސްމާއީލް ޢަބްދުއް ޙަކީމް އަދި މުޙައްމަދު އާމިރުގެ ޕެއާ އިން ހޯދިއިރު، އަންހެން ޑަބަލްސްގެ ޗެމްޕިއަންކަން އާމިނަތު ޝުބާ އާދަމް އަދި ފާތިމަތު ރަޔާނާގެ ޕެއާ ހޯދައިފި އެވެ.

އިސްމާއީލް އަދި އާމިރުގެ ޕެއާ އިން ޗެމްޕިއަންކަން ހޯދީ ފައިނަލްގައި އިބްރާހީމް ހުޖާން އަދި އަޙުމަދު ރުޝްދީގެ ޕެއާ ސީދާ ދެ ސެޓުން ކާމިޔާބުކޮށްގެންނެވެ. ފައިނަލް މެޗުގެ ސެޓުތައް އެ ޕެއާ އިން ކާމިޔާބުކޮށްފައި ވަނީ 22-5 އަދި 18-7 އިންނެވެ. ފިރިހެން ޑަބަލްސްގެ ތިން ވަނަ ހޯދީ އަލީ އާޒިމް އަދި އަޙުމަދު އިކްލީލްގެ ޕެއާ އިންނެވެ. އެ ޕެއާ އިން ފައިނަލްގައި ވާދަކޮށްފައި ވަނީ މުޙައްމަދު މުންތަސިރު އަދި އުމަރު ޒިޔާދުގެ ޕެއާއާ އެވެ. އާޒިމް އަދި އިކްލީލްގެ ޕެއާ އިން މެޗު ކާމިޔާބުކޮށްފައި ވަނީ ސީދާ ދެ ސެޓުންނެވެ. އެއީ ފުރަތަމަ ސެޓު 25-1 އިން އަދި ދެ ވަނަ ސެޓު 23-13 އިންނެވެ.

އަންހެން ޑަބަލްސްގެ ޗެމްޕިއަންކަން ޝުބާ އަދި ރަޔާނާ ހޯދީ ފައިނަލްގައި އާމިނަތު ވިޝާމާ އަދި އަފީފުއްނިސާގެ ޕެއާ ސީދާ ދެ ސެޓުން ބަލިކޮށްގެންނެވެ. އެ ޕެއާ އިން ފައިނަލްގެ ސެޓުތައް ކާމިޔާބު ކުރީ 21-13 އަދި 13-12 އިންނެވެ. މި ޑިވިޝަންގެ ތިން ވަނަ ހޯދީ އައިޝަތު ފައިނާާޒް އަދި އާމިނަތު ވިދާދުގެ ޕެއާ އެވެ. އެއީ ހަތަރު ޕެއާ ހިމެނުނު ގްރޫޕްގެ ތިން ވަނަ ލިބުނު ޕެެއާ އަށް ވުމުންނެވެ. އަންހެން ޑަބަލްސް ކުރިއަށް ގެންދިޔައީ ކޮންމެ ޓީމެއް ކޮންމެ ޓީމަކާ ކުޅުމަށްފަހު އެއް ވަނަ ޓީމާއި، ދެ ވަނަ ޓީމު ފައިނަލްގައި ވާދަކުރާ ގޮތަށެވެ. ތިން ވަނަ އަށް ދާ ޓީމަކީ މުބާރާތުގެ ތިން ވަނަ ޓީމެވެ.

ކެރަމް އެސޯސިއޭޝަނުން އިންތިޒާމުކޮށްގެން ރަމަޟާން މަހަށް ޚާއްސަކޮށްގެން ކުރިއަށް ގެންދާ މުބާރާތުގެ މިއީ ހަތް ވަނަ މުބާރާތެވެ. ކޯވިޑު-19 ގެ ބަލި މަޑުކަމުގެ ސަބަބުން ދެ އަހަރަކު މުބާރާތް ނުބާއްވަ އެވެ. އެއީ 2020 ވަނަ އަހަރާއި 2021 ވަނަ އަހަރު އެވެ. އެއަށްފަހު އަލުން މުބާރާތް ފަށައިފައިވަނީ 2022 ވަނަ އަހަރު އެވެ.