ސްޓެލްކޯ އަތުން ހުޅުމާލެ ވެޓަރެންސްއަށް ބޮޑު މޮޅެއް، ކުއާޓާ ޔަޤީން
ގްރޫޕްގެ އަނެއް ތިން ޓީމްވެސް އޮތީ ޕޮއިންޓަކާއެކު
ސްޓެލްކޯއާއި ހުޅުމާލެ ވެޓަރެންސް ވާދަކުރި މެޗުގެ ތެރެއިން
އެފްއޭއެމް ވެޓަރެންސް ލީގުގައި ސްޓެލްކޯ އަތުން ހުޅުމާލެ ވެޓަރެންސް ބޮޑު މޮޅެއް ހޯދައިފިއެވެ.
4-0 ން މެޗު ކާމިޔާބުކޮށް, ހުޅުމާލެ ވެޓަރެންސްއިން ވަނީ ކްއާޓާ ފައިނަލްގެ ޖާގައެއްވެސް ޔަޤީންކޮށްފައެވެ. މެޗުގައި ހުޅުމާލެ ވެޓަރެންސްގެ ފުރަތަމަ ގޯލް ޖެހީ ހުސެއިން ޝިމާޒުއެވެ. ދެވަނަ ގޯލާއި ފަހުގޯލް ޖެހީ ޤައުމީ ޓީމްގެ ކުރީގެ ޑިފެންޑަރ މުޙައްމަދު ޖަމީލްއެވެ. މެޗުގެ މޮޅު ކުޅުންތެރިއަކީވެސް އޭނާއެވެ. ތިންވަނަ ގޯލްޖެހީ ޤައުމީ ޓީމްގައި މޮޅަށް ކުޅުނު އިސްމާއީލް މުޙައްމަދުއެވެ. އޭނާއަކީ ހުޅުމާލެ ވެޓަރެންސްގެ ކެޕްޓަނެވެ.
މިމޮޅާއެކު ހުޅުމާލެ ވެޓަރެންސް ވަނީ ދެ މެޗުން ހަތަރު ޕޮއިންޓް ހޯދާފައެވެ. އެއީ ފުރަތަމަ މެޗުގައި ސިފައިންނާ އެއްވަރުކޮށް ހޯދި ޕޮއިންޓާއެކުއެވެ. މިގްރޫޕްގައި ދެން ހިމެނެނީ ނިއުރޭޑިއަންޓެވެ. ހުޅުމާލެ ވެޓަރެންސް ފިޔަވާ ކޮންމެ ޓީމަކަށް ލިބިފައިވަނީ އެއް ޕޮއިންޓެވެ.
