ހިލޭ ޑިގްރީ ޕްރޮގްރާމްގެ ދަށުން މިހާތަނަށް 17،189 ދަރިވަރުން ތައުލީމް ހާސިލްކޮށްފި
6 އެޕްރީލު 2023 | ބުރާސްފަތި 12:25ހިލޭޑިގްރީ ޕްރޮގްރާމްގެ ދަށުން ތައުލީމް ހާސިލްކުރި ކުދިންގެ ތެރޭގައި ހިމެނެނީ 11،484 އަންހެނުންނާއި، 5705 ފިރިހެނުން
ދަރިވަރުން
ރާއްޖޭގައި ހިލޭ ޑިގްރީ ޕްރޮގްރާމްގެ ދަށުން މިހާތަނަށް 17،189 ދަރިވަރުން ތައުލީމް ހާސިލްކޮށްފިއެވެ.
ހިލޭ ޑިގްރީޕްރޮގްރާމްގެ ދަށުން ކިޔަވައިދޭން ފެށިތާ މި އަހަރުގެ ފެބްރުއަރީ މަހުގެ ނިޔަލަށް ހަތަރު އަހަރު ވަނީ ވެފައެވެ.
ހިލޭޑިގްރީ ޕްރޮގްރާމްގެ ދަށުން ތައުލީމް ހާސިލްކުރި ކުދިންގެ ތެރޭގައި ހިމެނެނީ 11،484 އަންހެނުންނާއި، 5705 ފިރިހެނުންނެވެ.
ހިލޭ ޑިގްރީގެ ސަބަބުން ދަރިވަރުންގެ އިތުރުން ފުރަތަމަ ޑިގްރީއަށް ކިޔަވައިދޭ އަމިއްލަ ކޮލެޖާއި ޔުނިވަރސިޓީތަކަށް ވެސް ވަރަށް ބޮޑު ފައިދާއެއްވާކަމަށް ހަޔަރ އެޑިއުކޭޝަން މިނިސްޓްރީން ބުނެއެވެ. އެގޮތުން، ދަރިވަރުން ދައްކަން ޖެހޭ ކޯސްފީ، އެކި ސަބަބުތަކާހުރެ ނުދެއްކޭ ކަމުގެ ޝަކުވާ މީގެ ކުރިން ކޮލެޖުތަކުން ކުރި ކަމަށާއި ނަމަވެސް މިހާރު އެ ފައިސާ ލިބޭނެ ކަމުގެ ޔަގީންކަން އެތަންތަނަށް އޮންނަ ކަމަށް އެ މިނިސްޓްރީން ބުނެއެވެ.
އެ މިނިސްޓްރީން ބުނީ ސަރުކާރުން ފެށި ހިލޭ ޑިގްރީ ސްކީމާއެކު ޕްރައިވެޓް ކޮލެޖުތަކުގައި ފުރަތަމަ ޑިގްރީއާ ހަމައަށް ކިޔަވާ ދަރިވަރުން ކުރަން ޖެހޭ ޚަރަދު ކުރިއާ އަޅާބަލާއިރު ވަރަށް ބޮޑުތަނުން ކުޑަވެފައިވާ ކަމަށެެވެ. މީގެ އިތުރުން، އޭލެވެލް އިން ތިން މާއްދާއިން ފާސްވާ ދަރިވަރުންނަށް ލިބޭ ސްކޮލަރޝިޕްގެ ފުރުސަތުތައް ވެސް މިހާރު ގިނަވާނެ ކަމަށާއި ކުރިއާ އަޅާ ބަލާއިރު އެކި ދާއިރާތަކުން ސަރުކާރުން ހުޅުވާލާ ސްކޮލަރޝިޕްގެ ފުރުސަތުވެސް އިތުރުވާނެ ކަމަށް އެ މިނިސްޓްރީން ބުނެއެވެ.
