ހިލޭ ޑިގްރީ ޕްރޮގްރާމަކީ ސްކޭމެއް ނޫން، އެއީ މަތީ ތައުލީމުގެ ފެންވަރު ރަނގަޅު ކުރުމަށް ތައާރަފްކުރި ޕްރޮގްރާމެއް: އިހުސާން

ހިލޭ ޑިގްރީ ޕްރޮގްރާމަކީ މަތީ ތައުލީމުގެ ފެންވަރު ރަނގަޅު ކުރުމުގެ ނިޔަތުގައި މިދިޔަ ސަރުކާރުން ތައާރަފްކުރި ޕްރޮގްރާމެއްކަމަށް އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރ މުޙައްމަދު އިހުސާން ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން އިހުސާން ވިދާޅުވީ، މިދިޔަ ސަރުކާރުން ހިލޭ ޑިގްރީ ތައާރަފްކުރީ ޑިގްރީއަށް ކިޔެވުމަށްޓަކައި އިތުރަށް އާމްދަނީ ހޯދައި އިތުރު މަސައްކަތްތަކެއް ކުރަން މަޖުބޫރުވެފައި އޮތް ޙާލަތަށް ލުޔެއް ގެނެސްދިނުމުގެ ބޭނުުުމުގައި ކަމަށެވެ.

އެފަދަ ޙާލަތްތަކުގެ ސަބަބުން ދަރިވަރުންނަށް މަތީ ތައުލީމަށް ދޭންޖެހޭ އެކަށީގެންވާ ސަމާލުކަން ނުދެވޭކަމުގެ ޝަކުވާ އޭރު ނުހަނު ބޮޑުކަންވެސް އިހުސާން ފާހަގަ ކުރެއްވިއެވެ.

މި ސަރުކާރުން ހިލޭ ޑިގްރީ ޕްރޮގްރާމަކީ ސްކޭމެއްކަމަށް ބުނަމުންދާއިރު، އެ ޕްރޮގްރާމަކީ ހަގީގަތުގައި މަތީ ތައުލީމުގެ ފެންވަރު ރަނގަޅު ކުރުމުގެ ނިޔަތުގައި ތައާރަފްކުރި ޕްރޮގްރާމެއްކަމަށްވެސް އޭނާ ވިދާޅުވިއެވެ.

އިހުސާން އިތުރަށް ވިދާޅުވީ، ހިލޭ ޑިގްރީއަށް ކިޔަވައިގެން އެއަށްވުރެ މަތީ ތައުލީމު ޙާސިލުކުރާ ދަރިވަރުންގެ އަދަދު މިހާރު އިތުރުވަމުންދާކަމަށެވެ. ފެންނަމުންދަނީ ހިލޭ ޑިގްރީގެ ފުރުސަތު ދަރިވަރުން ބޭނުންކޮށް އޭގެ ނަތީޖާ ނެރެމުންދާ މަންޒަރުކަންވެސް އޭނާ ފާހަގަ ކުރެއްވިއެވެ.

މިއަދު ހިލޭ ޑިގްރީ ލިބުމުގައި ސަރުކާރުގައި ދަތި ކަންކަން ހުރިކަން ދަރިވަރުން ފާހަގަ ކުރެއެވެ. އެގޮތުން މިސަރުކާރުގައި ހިލޭ ޑިގްރީ ޕްރޮގްރާމްގެ ދަށުން ކޯސް ހަމަނުޖެހޭ މައްސަލައާއި، ސްޓޫޑަންޓް ލޯނު ހޯދުމަށް ދަތިވުމާއި ގުޅިގެން ދަރިވަރުން އެކަމުގެ ޝަކުވާ ކުރަމުންދެއެވެ.