ޗެލްސީގެ ކޯޗުކަން އަނެއްކާ ވެސް ލަމްޕާޑަށް

ހުސްވެފައިވާ ޗެލްސީގެ ކޯޗުގެ މަގާމަށް އެ ޓީމުގެ ކުރީގެ ކޯޗު ފްރޭންކް ލަމްޕާޑް ހަމަޖައްސަން އުޅޭ ކަމަށް އިނގިރޭސި ނޫސްތަކުން ބުނަން ފަށައިފި އެވެ.

މިހެންވެ އޭނާ ވަނީ ޗެލްސީ އާއި ލިވަޕޫލް އިއްޔެރޭ ކުޅުނު މެޗު ބަލަން ސްޓޭޑިއަމަށް ވެސް ގޮސްފަ އެވެ. ބޭނުމަކީ ޓީމުގެ ކުޅުމާއި ކުޅުންތެރިން ދެނެގަތުމެވެ. ނަމަވެސް ޗެލްސީން ލަމްޕާޑް ކޯޗަކަށް ހަމަޖައްސާނީ މި ސީޒަނުގެ ނިޔަލަށެވެ. އަދި އަންނަ ސީޒަން ފެށުމުގެ ކުރިން އައު ކޯޗަކު ހަމަޖެއްސުމަށް ޗެލްސީގެ ވެރިން ދަނީ މަސައްކަތް ކުރަމުންނެވެ.

ލަމްޕާޑް ޗެލްސީގެ ކޯޗުކަން ކުރީ 2019 ވަނަ އަހަރުން ފެށިގެން ގޮސް 2021 ވަނަ އަހަރުގެ ކުރީކޮޅާ ހަމައަށެވެ. ގާތްގަނޑަށް ދޮޅު ސީޒަނުގަ އެވެ. ނަތީޖާތައް ގޯސްވުމުން އޭނާ ވަކިކޮށް ޓީމަށް ގެނައި ކޯޗު ތޯމަސް ޓުޗެލް ވަނީ ޗެމްޕިއަންސް ލީގު ޗެލްސީއަށް ކާމިޔާބުކޮށްދީފަ އެވެ.

ލަމްޕާޑަކީ ޗެލްސީގެ ތާރީހުގައި އެ ޓީމުގެ އެންމެ އަލިގަދަ އެއް ތަރި އެވެ. އެންމެ ގިނަ ގޯލު ޖެހި ކުޅުންތެރިޔާ އެވެ. އަދި އޭނާ އަކީ މިހާރު ވެސް އެކުލަބުން މުސާރަ ދޭ މީހެކެވެ. ސަބަބަކީ އޭނާ ކޯޗުކަމުން ވަކިކުރި ނަމަވެސް ކޮންޓްރެކްޓްގެ ބާކީ ބަޔަށް ފައިސާދޭން ޖެހުމުންނެވެ.

ޗެލްސީ މިވަގުތު އޮތީ ޓޭބަލުގެ 1 ވަނާގައެވެ. މިއީ އަންނަ ސީޒަނުގެ ޔޫރަޕުގެ މުބާރާތަކުން ޖާގަ ލިބޭ ވަރަށްވުރެ ދަށް މަގާމެކެވެ. ކޯޗުކަން ހުސްވީ މިހާބޮޑަށް ނަތީޖާތައް ގޯސްވުމުން ގްރެހަމް ޕޮޓާ ވަކިކުރުމުންނެވެ.