ރެއާލް އިން ކުޅުމުގެ ވައްޓަފާޅި ބަދަލު ނުކުރާނެ، އަންޗެލޮޓީ ބުނަނީ "އަހަރަމެން މޮޔައެއް ނުވާނެ"

ސްޕެނިޝް ކޮޕަ ޑެލް ރޭ މުބާރާތުގެ ސެމީ ފައިނަލްގެ ދެ ވަނަ ލެގުގައި ރެއާލް މެޑްރިޑުން ކުޅުމުގެ ވައްޓަފާޅި ބަދަލު ނުކުރާނެ ކަމަށާއި، އެމީހުން މޮޔައެއް ނުވާނެ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.

އަންޗެލޮޓީ މިހެން ބުނީ މުބާރާތުގެ ދެ ވަނަ ލެގުގައި ބާސެލޯނާގެ ދަނޑުގައި ކުޅޭ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަދައްކަމުންނެވެ. މި ދެ ޓީމު ރެއާލްގެ ދަނޑުގައި ކުޅުނު ފުރަތަމަ ލެގު 1-0 އިން ކާމިޔާބުކޮށްފައި ވަނީ ބާސެލޯނާ އިންނެވެ. އެހެންކަމުން ރެއާލަށް ފައިނަލުން ޖާގަ ލިބެން އޮތީ ދެ ލަނޑުގެ ތަފާތަކުން ބާސެލޯނާ ބަލިކޮށްގެންނެވެ. އެ މެޗުގެ ކުރިން ވާހަކަ ދައްކަމުން އަންޗެލޮޓީ ބުނީ. މެޗަށް ނުކުންނައިރު ރެއާލްގެ ޕްލޭން އަކީ ލަނޑު ޖެހުމުގައި މޮޔަވުން ނޫން ކަމަށެވެ. އަދި މެޗުގެ އެންމެ ފަހު ވަގުތުގައި ވެސް ލަނޑު ޖެހިދާނެ ކަމަށާއި މެޗުގައި ޕްލޭން އަކީ ވާދަވެރި ގޭމެއް ކުޅުން ކަމަށް އަދި ބޭނުންވަނީ ބޯޅައާއެކު ވެސް ނުވަތަ ބޯޅަ ނެތް ވަގުތުގައި ވެސް މެޗުގެ ކޮންޓްރޯލް އޮތުން ކަމަށެވެ. އެކަން ފާހަގަ ކުރަމުން އަންޗެލޮޓީ ބުނީ، ފުރަތަމަ ލެގުގައި ވެސް މެޗު ކޮންޓްރޯލް ކޮށްގެން ކުޅުނީ ރެއާލް ކަމަށާއި، ނަމަވެސް ޓީމަށް އެކަށީގެންވާ މިންވަރަކަށް ފުރުސަތުތައް ނުހޯދުނީ ކަމަށެވެ. އަދި ކުރިއަށް އޮތް މެޗުގައި ޖެހޭނީ ޑިފެންސް އިން އެޓޭކިން އަށް ނުކުންނަން ކަމަށާއި، އެއީ މެޗުގައި ވަރަށް މުހިންމު ކަމެއް ކަމަށެވެ. ނަމަވެސް އެއްވެސް ވަރަކަށް ލަނޑު ޖެހުމަށް މޮޔަ ނުވާނެ ކަމަށެވެ.

މީގެ އިތުރުން އޭނާ ބުނީ ކުދިކުދި ތަފްސީލުތަކުން ވެސް ޓީމުތަކަށް ހައިރާންކަން ލިބިދާނެ ކަމަށެވެ. އެގޮތުން ޓީމަކުން ފާއިތުވި އަހަރު ދުވަހުގައި ފަރިތަކުރަމުން އައި ސިސްޓަމް ކުއްލިއަކަށް ބަދަލުކޮށްލުމަކީ އުނދަގޫ ކަމެއް ކަމަށެވެ. އޭނާ ބުނީ އިދިކޮޅު ޓީމު ހައިރާންކޮށްލެވިދާނެ ކަމަށާއި، ނަމަވެސް އަމިއްލަ ޓީމާއި ކުޅުންތެރިންނަށް ލިބޭނެ ހައިރާންކަމަކަށް ވެސް ސަމާލުވާން ޖެހޭނެ ކަމަށެވެ. އެހެންކަމުން ކުރިއަށް އޮތް މެޗުގައި ރެއާލްގެ ސިސްޓަމް ބަދަލުކުރަން އޭނާާ ބޭނުންނުވާ ކަމަށެވެ.

އިތުރަށް ވާހަކަ ދައްކަމުން އަންޗެލޮޓީ ބުނީ އަބަދު ވެސް އޭނާ އަށް އެލް ކްލެސިކޯ މެޗަކީ ވަރަށް މުހިންމު މެޗެއް ކަމަށެވެ. ރެއާލްގެ ކުޅުންތެރިންނާއި، ސަޕޯޓަރުން އަދި ކޯޗިން އެހެނިހެން ސްޓާފުންނަށް ވެސް އެއީ ވަރަށް މުހިންމު މެޗެއް ކަމަށެވެ. އޭނާ ބުނީ އެ މެޗުގެ ވާދަވެރިކަން ވެސް ވަރަށް ބޮޑުވާނެ ކަމަށާއި، ކުރިއަށް އޮތް މެޗަކީ ރެއާލަށް ފައިނަލެއް ކުޅުމުގެ ފުރުސަތު ވެސް ލިބިގެން ގޮސްދާނެ މެޗެއް ކަމަށެވެ. އެހެންކަމުން އެއީ ސަމާލުކަން ދޭން ޖެހޭ ވަރަށް މުހިންމު ކަމެއް ކަމަށެވެ. ނިންމާލަމުން އަންޗެލޮޓީ ބުނީ ކޮޕަ ޑެލް ރޭ މުބާރާތަކީ ވެސް ރެއާލަށް ވަރަށް މުހިންމު މުބާރާތެއް ކަމަށާއި، އެ ޓީމު އޮތީ ވެސް ފައިނަލާ ވަރަށް ގާތުގައި ކަމަށެވެ. އެހެންކަމުން ރެއާލް އިން އެމީހުންގެ ބާރުގައި ފައިނަލް ކުޅެވޭނެ އެންމެހައި ކަންކަން ކުރާނެ ކަމަށް ވެސް އަންޗެލޮޓީ ބުންޏެވެ.

މިއީ ބާސެލޯނާ އާއި ރެއާލް މި ސީޒަންގައި ކުރިމަތިވާ ފަސް ވަނަ ފަހަރެވެ. މިހާތަނަށް މި ސީޒަންގައި ހަތަރު މެޗުގައި ދެ ޓީމު ބައްދަލުކޮށްފައިވާއިރު، އޭގެ ތެރެއިން ތިން މެޗު ކާމިޔާބުކޮށްފައި ވަނީ ބާސެލޯނާ އިންނެވެ. ރެއާލުން ވަނީ އެއް މެޗު ކާމިޔާބުކޮށްފަ އެވެ. ބާސެލޯނާ އާއި ރެއާލް ކުޅޭ މެޗު ފަށާނީ ބުދަ ދުވަހުގެ ރޭ ރާއްޖެ ގަޑިން ދަންވަރު 12 ޖަހާއިރު އެވެ.