ރިޔާސީ އިންތިޚާބަށް ރާއްޖެއިން ބޭރުން އަންނަ ފަރާތްތަކަށް ވިސާ ހަމަޖެއްސުމާއި ގުޅޭގޮތުން މަޝްވަރާކޮށްފި
ބޭރުން އަންނަ މޮނީޓަރުންނާއި އޮބްޒާވަރުންނަށް އެޕްލިކޭޝަން ފޯމް ހުށަހެޅުމުގެ މުއްދަތު ހަމަވާނީ ޖުލައި 25ގައި
ރިޔާސީ އިންތިޚާބު 2023 އަށް ރާއްޖެއިން ބޭރުން ވަޑައިގަންނަވާ ފަރާތްތަކަށް ފަސޭހައިން ވިސާގެ އިންތިޒާމުތައް ހަމަޖެއްސުމާ ގުޅޭގޮތުން ބޭއްވި ބައްދަލުވުމުގެ ތެރެއިން
ރިޔާސީ އިންތިޚާބަށް ރާއްޖެއިން ބޭރުން އަންނަ ފަރާތްތަކަށް ވިސާ ހަމަޖެއްސުމާއި ގުޅޭގޮތުން އިލެކްޝަންސް ކޮމިޝަނާއި މޯލްޑިވްސް އިމިގްރޭޝަނުން މަޝްވަރާކޮށްފިއެވެ.
އިލެކްޝަންސް ކޮމިޝަނުން ބުނީ ރިޔާސީ އިންތިޚާބު 2023ށް ރާއްޖެއިން ބޭރުން ވަޑައިގަންނަވާ ފަރާތްތަކަށް ވިސާގެ އިންތިޒާމުތައް ހަމަޖެއްސުމާ ގުޅޭގޮތުން ކޮންޓްރޯލަރ ޖެނެރަލް މުޙައްމަދު އަޙްމަދު ޙުސައިނާއެކު ބައްދަލުވުމުން ބާއްވާފައިވާއިރު މައިގަނޑު ގޮތެއްގައި މަޝްވަރާކޮށްފައިވަނީ ވިސާ ލިބުމަށް ފަސޭހަ ގޮތްތަކެއް ހޯދައި ދިނުމަށް ކަމަށެވެ.
އިންތިޚާބު އޮބްޒާވްކުރަން ބޭރުން އަންނަ މޮނީޓަރުންނާއި އޮބްޒާވަރުންނަށް އެޕްލިކޭޝަން ފޯމް ހުށަހެޅުމަށް އީސީން ހުޅުވާލާފައިވާއިރު މުއްދަތު ހަމަވާނީ ޖުލައި މަހުގެ 25ށް ގައެވެ. އީސީން ބުނީ އަދި މިހާތަނަށް އެއްވެސް ފަރާތަކުން އެޕްލިކޭޝަން ހުށަހަޅާފައިނުވާ ކަމަށެވެ.
ކުރިއަށް އޮތް ރިޔާސީ އިންތިޚާބުގެ މަސައްކަތް އީސީން ފަށާފައިވާއިރު އިންތިޚާބުގައި ވޯޓު ފޮށި ބަހައްޓައިދިނުމަށް އެދި 50 ރިސޯޓުކުން ހުށަޙަޅާފައިވާ ކަމަށް ވެސް އެ ކޮމިޝަނުން ވަނީ ބުނެފައެވެ.
އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ މިހާތަނަށް އައިރު 50 ރިސޯޓުން ވޯޓު ފޮށި ބަހައްޓަން ބޭނުންވެގެން ކޮމިޝަނަށް ހުށަހަޅާފައިވާ ކަމަށެވެ. އިންތިހާބުގައި ރިސޯޓުތަކުގައި ވޯޓު ފޮށި ބަހައްޓާނީ މަދުވެގެން 50 މީހުން ވޯޓުލާން ރަޖިސްޓްރީ ކޮށްފައިވާ ރިސޯޓުތަކުގައި ކަމަށާއި، ރީ-ރަޖިސްޓްރީއަށް ހުޅުވާލާނެ ކަމަށެވެ.
އީސީން ބުނީ ރިސޯޓެއްގައި ވޯޓު ފޮށި ބެހެއްޓޭނީ އެ މާހައުލަކީ ވޯޓު ފޮށި ބެހެއްޓުމަށް ރައްކާތެރި ތަނަކަށްވާނަމަ އެވެ. މާރޗް މަހުގެ ތެރޭގައި 5600ށް ވުރެ ގިނަ އޮފިޝަލުން ހޯދުމަށް އިއުލާން ކޮށްފައިވާއިރު، މި ފަހަރުގެ އިންތިޚާބަށް 8،000 އޮފިޝަލުން ބޭނުންވާނެ ކަމަށް އީސީގެ ރައީސް ފުއާދު ތައުފީޤު ކުރިން ވިދާޅުވެފައިވެއެވެ.
ރިޔާސީ އިންތިޚާބު ބޭއްވުމަށް ނިންމާފައި ވަނީ ސެޕްޓެމްބަރު މަހުގެ ނުވަ ވަނަ ދުވަހުއެވެ. ދެވަނަ ބުރެއް ބާއްވަން ޖެހިއްޖެ ނަމަ ސެޕްޓެމްބަރު މަހުގެ 30 ގައި ބޭއްވުމަށް ވަނީ ނިންމާފައެވެ.
