ސްޕެނިޝް ލީގުގެ އެސްޕަންޔޯލްގެ ކޯޗަކަށް އެ ޓީމަށް ކުރިން ކުޅުނު ލުއިސް ގާސިއާ ހަމަޖައްސަން ނިންމައިފި އެވެ.

އެ ޓީމުގެ ކޯޗުކަމުގެ މަޤާމުގައި މިހާރު ހުރީ ސްޕެއިންގެ ޑިއޭގޯ މާޓިނޭޒް އެވެ. އެ މަޤާމަށް އޭނާ ހަމަޖައްސާފައި ވަނީ މިދިޔަ އަހަރުގެ މެއި މަހު އެވެ. އޭރު އޭނާ އެ ކުލަބާ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން އެ އެއްބަސްވުން ހަމަވާން އޮތީ އަންނަ އަހަރު އެވެ. ނަމަވެސް އޭގެ ކުރިން އެސްޕަންޔޯލް އިން އެ މަޤާމުން މާޓިނޭޒް ވަކިކުރުމަށް ނިންމާފައި ވަނީ އެ ކުލަބުގެ ނަތީޖާ ވަރަށް ބޮޑަށް ދަށްވުމުންނެވެ. ސްޕެނިޝް ލީގުގައި އެސްޕަންޔޯލް މިވަގުތު އޮތީ ރެލިގޭޝަން ޒޯންގެ ބިރު ހީވާ ހިސާބުގަ އެވެ. ކުޅުނު 27 މެޗުން ލިބުނު 27 ޕޮއިންޓާއެކު އެ ޓީމު އޮތީ 17 ވަނައިގަ އެވެ. ފަހަތުން އަލްމޭރިއާ ރެލިގޭޝަން ޒޯންގައި އޮތީ ވެސް 27 ޕޮއިންޓުންނެވެ. އެސްޕަންޔޯލް ރެލިގޭޝަނުން ސަލާމަތްވެ އޮތީ ލަނޑުގެ އަދަދުންނެވެ.

އެސްޕަންޔޯލް އިން މިހާރު ވަނީ އެ ޓީމުގެ ކޯޗުކަމަށް ގާސިއާ ގެނައުމަށްޓަކައި އެއްބަސްވުމަކަށް އާދެވިފައި ކަމަށް ބޭރުގެ މީޑިއާ ރިޕޯޓުތައް ބުނެ އެވެ. މީގެ އިތުރުން އެއްބަސްވުމުގައި ސޮއިކޮށް، އެ ކުލަބުގެ އައު ކޯޗުގެ ގޮތުގައި ވަރަށް އަވަހަށް ގާސިއާ އިއުލާންކުރާނެ ކަމަށް ވެސް ރިޕޯޓުތައް ބުނެ އެވެ. އުމުރުން 42 އަހަރުގެ ގާސިއާ އަކީ ކުރިން އެސްޕަންޔޯލަށް ކުޅެފައިވާ ފޯވާޑެކެވެ. އޭނާ ވަނީ 2005 ވަނަ އަހަރުން ފެށިގެން 2011 ވަނަ އަހަރާ ހަމައަށް އެ ކުލަބަށް ކުޅެދީފަ އެވެ. އެ މުއްދަތުގައި އޭނާ ވަނީ އެސްޕަންޔޯލަށް 262 މެޗު ކުޅެދީ 61 ލަނޑު ޖަހައިފަ އެވެ. އޭނާ ވަނީ އެ ކުލަބާއެކު ކޮޕަ ޑެލް ރޭ މުބާރާތެއް ކާމިޔާބުކޮށް، ޔުއެފާ ޔޫރޮޕާ ލީގު (ޔުއެފާ ކަޕް)ގެ ފައިނަލެއްގައި ވެސް ކުޅެފަ އެވެ.

ގާސިއާ ކުޅުން ހުއްޓާލާފައި ވަނީ 2019 ވަނަ އަހަރު އެވެ. އެއަށްފަހު އޭނާ ވަނީ ކޯޗިންގެ މަސައްކަތް ހަމަ އެއަހަރު ފަށައިފަ އެވެ. އެގޮތުން އޭނާ ވަނީ ބާސެލޯނާގެ ކުލަބެއް ކަމަށްވާ ޑޭމްގެ ޔޫތު ކުލަބުގައި މަސައްކަތްކޮށްފަ އެވެ.