ސިންގަލް-ޔޫސް ޕްލާސްޓިކް މަދުކުރުމާއި މަނާކުރުމާގުޅޭ ގަވާއިދަށް ޚިޔާލު ހުށަހެޅުމުގެ ފުރުސަތު ހުޅުވާލައިފި
27 މާރިޗު 2023 | ހޯމަ 13:42ޚިޔާލު ހުށަހެޅުމުގެ ފުރުސަތު އަންނަ އޭޕްރީލް މަހުގެ 10 ވަނަ ދުވަހުގެ މެންދުރުފަހު 2އާ ހަމައަށް ވަނީ ހުޅުވާލާފައި
ޕްލާސްޓިކް ކުނި
ކުނި މެނޭޖުކުރުމުގެ ގާނޫނުގެ ދަށުން އެކުލަވާލާފައިވާ ސިންގަލް-ޔޫސް ޕްލާސްޓިކް މަދުކުރުމާއި މަނާކުރުމާބެހޭ ގަވާއިދަށް ޚިޔާލު ހުށަހެޅުމުގެ ފުރުސަތު ހުޅުވާލައިފިއެވެ.
މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީން ބުނީ މިގަވާއިދަށް ޚިޔާލު ހުށަހެޅުމުގެ ފުރުސަތު އަންނަ އޭޕްރީލް މަހުގެ 10 ވަނަ ދުވަހުގެ މެންދުރުފަހު 2އާ ހަމައަށް ހުޅުވާލާކަމަށެވެ.
މި ގަވާއިދަކީ ކުނި މެނޭޖުކުރުމުގެ ގާނޫނުގެ 8 ވަނަ މާއްދާގެ (ޒ) އާއި 31 ވަނަ މާއްދާ ދަށުން ބާރު ލިބިގެން، ސިންގަލް-ޔޫސް ޕްލާސްޓިކުގެ ބާވަތްތައް ރާއްޖެއަށް އެތެރެކުރުމާއި، ރާއްޖޭގައި އުފެއްދުމާއި, ބާޒާރަށް ނެރުމާއި، މަދުކުރުމާގުޅޭ އުސޫލުތަކާއި އިޖުރާއަތުތައް ކަނޑައެޅުމަށްޓަކައި އެކުލަވާލާފައިވާ ގަވާއިދެކެވެ.
ގާނޫނުގެ 31 ވަނަ މާއްދާގައި ބުނެފައިވަނީ ތިމާވެއްޓަށް ގެއްލުންދޭ އެއްޗެހީގެ ތެރެއިން، ރައީސުލްޖުމްހޫރިއްޔާ ކަނޑައަޅުއްވާ ސިންގަލް-ޔޫސް ޕްލާސްޓިކްގެ ބާވަތްތައް ފިޔަވައި، ދިވެހިރާއްޖޭގައި ބޭނުންކުރާ ސިންގަލް-ޔޫސް ޕްލާސްޓިކްގެ ބާވަތްތައް މަދުކުރުމާގުޅޭ ގަވާއިދެއް، ގާނޫނަށް އަމަލުކުރަން ފަށާތާ ހަ މަސްދުވަހުގެ ތެރޭގައި މިނިސްޓްރީން އެކުލަވާލައި، ދިވެހިސަރުކާރުގެ ގެޒެޓުގައި ޝާއިއުކޮށް، މިނިސްޓްރީގެ ވެބްސައިޓުގައި އާންމުކުރަންވާނެކަމަށެވެ.
މިގަވާއިދުގެ މަގުސަދުތަކުގެ ތެރޭގައި ހިމެނެނީ، ތިމާވެއްޓަށް ގެއްލުންދޭ އެއްޗެހީގެ ތެރެއިން ސިންގަލް-ޔޫސް ޕްލާސްޓިކުގެ ބާވަތްތައް ރާއްޖެއަށް އެތެރެކުރުމާއި، ރާއްޖޭގައި އުފެއްދުމާއި އަދި ބާޒާރަށް ނެރުން މަނާކޮށް ހުއްޓުވުމާއި، ފިޔަވަޅު އެޅުމެވެ. އަދި ތިމާވެއްޓަށް ގެއްލުންދޭ އެއްޗެހީގެ ތެރެއިން ރާއްޖޭގައި ބޭނުންކުރާ ސިންގަލް-ޔޫސް ޕްލާސްޓިކުގެ ބާވަތްތައް މަދުކުރުމެވެ.
މިގަވާއިދު ތަންފީޒުކުރާނީ އެންވަޔަރަންމަންޓަލް ޕްރޮޓެކްޝަން އެޖެންސީއާއި މޯލްޑިވްސް ކަސްޓަމަސް ސަރވިސްއެވެ.
މި ގަވާއިދުގެ ދަށުން އިސްތިސްނާވާ ސިންގަލް ޔޫސް ޕްލާސްޓިކުގެ ބާވަތްތަކަކީ ޝިޕްސްޓޯރގެ ގޮތުގައި އިންޓަރނޭޝަނަލް އެއަރލައިންތަކުގައި ބޭނުންކުރުމަށް ގެންނަ ސިންގަލް-ޔޫސް ޕްލާސްޓިކުގެ ބާވަތްތަކާއި، ރާއްޖެއިން ބޭރަށް ދާ ފަސިންޖަރުންނަށް މުދާ ވިއްކާ ޑިޔުޓީ ފިހާރަތަކަށް ގެންނަ ސިންގަލް-ޔޫސް ޕްލާސްޓިކުގެ ބާވަތްތަކެވެ.
މިގަވާއިދުގެ ދަށުން، ތިމާވެއްޓަށް ގެއްލުންދޭ އެއްޗެހީގެ ތެރެއިން ރައީސުލްޖުމްހޫރިއްޔާ ކަނޑައަޅުއްވާ ސިންގަލް-ޔޫސް ޕްލާސްޓިކުގެ ބާވަތްތައް ރާއްޖެއަށް އެތެރެކުރުން މަނާވާއިރު، ރައީސުލްޖުމްހޫރިއްޔާ ކަނޑައަޅުއްވާ ސިންގަލް-ޔޫސް ޕްލާސްޓިކުގެ ބާވަތްތައް ރާއްޖޭގައި އުފެއްދުމަކީ މަނާކަމެކެވެ. މީގެއިތުރުން މިގަވާއިދުގެ ދަށުން ރައީސުލްޖުމްހޫރިއްޔާ ކަނޑައަޅުއްވާ ސިންގަލް ޔޫސް ޕްލާސްޓިކުގެ ބާވަތްތައް ބާޒާރަށް ނެރުމަކީ މަނާކަމެކެވެ.
މިގަވާއިދުގެ ދަށުން ރާއްޖޭގައި ބޭނުންކުރާ ސިންގަލް ޔޫސް ޕްލާސްޓިކު 2030ގެ ނިޔަލަށް މަދުކުރުމަށްޓަކައި އެކަމާއި ގުޅޭ ފޭސްއައުޓް ޕްލޭނެއް އެންވަޔަރަންމަންޓް މިނިސްޓްރީން އެކުލަވާލަންޖެހެއެވެ.
ސިންގަލް ޔޫސް ޕްލާސްޓިކުގެ ގޮތުގައި ކަނޑައަޅާފައިވާ ބާވަތްތައް ގަވާއިދާ ޚިލާފަށް ރާއްޖެއަށް އެތެރެކޮށްފި ކަމުގައިވާނަމަ، އެތަކެތި ނައްތާލުމުގެ ބާރު މޯލްޑިވްސް ކަސްޓަމްސް ސަރވިސްއަށް ލިބިގެންވެއެވެ. އަދި އެފަދަ ބާވަތެއް އުފައްދައިފިކަމަށްވާނަމަ، އެތަކެތި ނައްތާލުމަށް އެންގުމުގެ ބާރު އީޕީއޭއަށް ލިބިގެންވެއެވެ.
މިގަވާއިދުގެ ދަށުން މަނާކޮށްފައިވާ އެއްވެސް ބާވަތެއް ރާއްޖެ އެތެރެކޮށްފިނަމަ، އެފަރާތެއް ޖޫރިމަނާކުރުމުގެ ބާރު ކަސްޓަމްސްއަށް ލިބިގެންވާއިރު، އެފަދަ އެއްޗެއް ރާއްޖޭގައި އުފައްދައިފިނަމަ އަދި ބާޒާރަށް ނެރެފިނަމަ އެފަރާތެއް ޖޫރިމަނާކުރުމުގެ ބާރު އީޕީއޭއަށް ލިބިގެންވެއެވެ.
މިގަވާއިދުގެ ދަށުން މަނާކޮށްފައިވާ އެއްޗެސް ބާވަތެއް ރާއްޖެ އެތެރެކޮށްފިނަމަ، އުފެއްދުން މަނާކޮށްފައިވާ ބާވަތެއް ރާއްޖޭގައި އުފައްދައިފިނަމަ، އަދި މަނާކޮށްފައިވާ ބާވަތެއް އެއްޗެއް ބާޒާރަށް ނެރެފިނަމަ، ފުރަތަމަ ފަހަރު ނަމަ، އެ އެއްޗެއްގެ އަދަދަށް ބަލައި ކޮންމެ އެއްޗަކަށް 500 ރުފިޔާއަށްވުރެ ބޮޑު ނޫން އަދަދަކުން ޖޫރިމަނާކުރާނެއެވެ. ދެވަނަ ފަހަރު ނަމަ އެއްޗެއްގެ އަދަދަށް ބަލައި ކޮންމެ އެއްޗަކުން 1000 ރުފިޔާއަށްވުރެ ބޮޑު ނޫން އަދަދަކުން ޖޫރިމަނާކުރާނެއެވެ. އަދި ތިން ވަނަ ފަހަރު ނަމަ 1500 ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާކުރަންވާނެއެވެ.
މިގަވާއިދު ބުނާގޮތުން ރާއްޖެއަށް އެތެރެކުރާ އަދި އުފައްދާ ސިންގަލް-ޔޫސް ޕްލާސްޓިކް ކޮތަޅު މިންކުރުމުގައާއި ސައިޒުގެ ބޮޑުމިން ދެނެގަތުމުގައި، ފުޅާމިން މިންކުރާނީ ކޮތަޅު އަރިމަތިން ފަތްޖަހައިގެންނެވެ. ދިގުމިން މިންކުރާނީ އަތްގަނޑު ނުހިމެނޭ ގޮތަށެވެ.
