ރެކޯޑް މުގުރާލައި ޖެހި ދެ ގޯލާއެކު ރޮނާލްޑޯ ފެންވަރު ދައްކާލައިފި

ލިޗްޓެންސްޓައިން ކޮޅަށް ދެ ގޯލު ޖަހައި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަނެއްކާ ވެސް ފެންވަރު ސާބިތުކޮށްދީފި އެވެ.

ޔޫރޯ ކޮލިފައިންގައި ރޭ އޭނާގެ ދެ ގޯލާއެކު ޕޯޗުގަލް މޮޅުވީ 4-0 އިންނެވެ. ބެލްޖިއަމްގެ ކުރީގެ ކޯޗު ރޮބާޓޯ މާޓިނޭޒް ޓީމާ ހަވާލުވި ފަހުން ކުޅުނު ފުރަތަމަ މެޗުގައި ޕޯޗުގަލްގެ ފުރަތަމަ ދެ ލަނޑު ޖެހީ ބެނާޑޯ ސިލްވާ އާއި ޔާއޯ ކޮންސަލޯ އެވެ. ރޮނާލްޑޯ ޖެހި ދެ ގޯލާއެކު ގައުމީ ޓީމަށް އެންމެ ގިނަ ގޯލު ޖެހި ކުޅުންތެރިޔާގެ ރެކޯޑް އޭނާގެ އަތުގައި އޮތީ 120 ގޯލާއެކުގަ އެވެ. ރޭގެ މެޗުގައި އޭނާ ޖެހި ފުރަތަމަ ގޯލަކީ ލިބުނު ޕެނަލްޓީއެކެވެ.

މި މެޗުގައި ކުޅެން ނުކުތުމުން ރޮނާލްޑޯ ވެފައިވަނީ ބައިނަލް އަގްވާމީ ފުޓްބޯޅައިގައި ގައުމީ ޓީމަށް އެންމެ ގިނަ މެޗު ކުޅެދިން ކުޅުންތެރިޔާ އަށެވެ. އެއީ 197 މެޗާއެކުއެވެ. ރޮނާލްޑޯ އެންމެ ފަހުން ގައުމީ ޓީމަށް ކުޅުނީ ކުރީގެ ކޯޗު ފެނާންޑޯ ސަންޓޯސްގެ ކޯޗުކަމުގައި ޑިސެމްބަރު މަހު ގަތަރުގައި ނިމުނު ވޯލްޑްކަޕުގަ އެވެ. ޕޯޗުގަލް މުބާރާތުން ކެޓި ކުއާޓާ ފައިނަލް މެޗަށް އޭނާ ނެރުނީ ބަދަލު ކުޅުންތެރިއެއްގެ ގޮތުގަ އެވެ. އެ މެޗާއެކު ގައުމީ ޓީމަށް އެންމެ ގިނަ މެޗު ކުޅުނު ކުޅުންތެރިޔާގެ ރެކޯޑް އޮތީ ރޮނާލްޑޯއަށާއި ކުވޭތުގެ ބަދުރު އަލްމުތަވާ އަށެވެ. މިހެންވެ  މެޗުގެ 78 ވަނަ މިނިޓްގައި ރޮނާލްޑޯ ބަދަލުކުރުމާއެކު ސްޓޭޑިއަމުގައި ތިބި އެންމެން އޭނާ އަށް ތަރުހީބު ދިނުމަށް ކޮޅަށް ތެދުވި އެވެ.

ޕޯޗުގަލްގެ ކޯޗު ރޮބާޓޯ މާޓިނޭޒް ބުނީ މި ފަހުން ރޮނާލްޑޯއާމެދު ގައުމީ ޓީމުގައި ކަންކަންވެފައި އޮތީ ވަރަށް ދެރަވަރުކޮށް ކަމަށާއި ނަމަވެސް އަންނަ އަހަރުގެ ޔޫރޯ އަށް އޭނާ ތައްޔާރުކުރާ ޕޯޗުގަލް ޓީމުގައި ރޮނާލްޑޯ އަށް ހާއްސަ ކަމެއް ލިބޭނެ ކަމަށެވެ.