ރޯދަ މަހު ހޫނު ގަދަވާނެ، ވާރޭވެހުމުގެ ފުރުސަތު ކުޑަ: މެޓް
23 މާރިޗު 2023 | ބުރާސްފަތި 17:34ދެކުނުގެ ރަށްތަކަށް ވާރޭވެހުމުގެ ފުރުސަތު އެބައޮތް
މާލެއަށް ވާރޭވެހި ފެންބޮޑުވެފައި
ރަމަޟާން މަހު ހޫނު ގަދަވާނެ ކަމަށާއި ވާރޭ ވެހުމުގެ ފުރުސަތު ކުޑަކަމަށް މޫސުމާބެހޭ ގައުމީ އިދާރާއިން ލަފާކޮށްފިއެވެ.
ރާއްޖެޓީވީގެ ފަލަ ސުރުހީ ޕްރޮގްރާމުގައި އެސިސްޓެންޓް މީޓިރިއޮލޮޖިސްޓް، ހުސައިން ވަހީދު ވިދާޅުވީ މެޓް އޮފީހުގެ ބައެއް ޕްރިޑިކްޝަންތައް ދައްކާގޮތުން، ރަމަޟާން މަސް ފެށޭކޮޅުގައި ހޫނު ގަދަވާނެކަމަށާއި ވާރޭ ވެހުމުގެ ފުރުސަތު ކުޑަވާނެކަމަށެވެ. އެ ގޮތުން ހާއްސަ ގޮތެއްގައި އުތުރާއި މެދުރާއްޖެތެރޭގެ ރަށްތަކަށް ހޫނުގަަދަ ވާނެ ކަމަށް އޭނާ ވިދާޅުވިއެވެ.
އިރުވައި މޫސުމުގައި އެންމެ ހޫނު ގަދަ ދެ މަހަކީ މާރިޗު އަދި އޭޕްރީލް ކަމަށާއި، އެހެންނަމަވެސް މި އަހަރު އެހެން އަހަރުތަކާ ތަފާތުކަމަށް އޭނާ ވިދާޅުވިއެވެ. އިރުވައި މޫސުމުގައިވެސް ދޭތެރެދޭތެރެއިން މި އަހަރު ވާރޭ ވެހޭ ކަމަށާއި، އެހެންވުމުން ހޫނުގަދަވެގެން މި އަހަރު މާ ބޮޑަށް ހޫނު އިހުސާސް ނުކުރެވޭ ކަމަށް ވެސް ހުސައިން ވިދާޅުވިއެވެ.
އިތުރަށް އޭނާ ވިދާޅުވީ، މިއީ އިރުވައި މޫސުން ކަމަށްވާތީ، ވާރޭ ނުވެހި ތިން ދުވަސް ނުވަތަ ހަތަރު ދުވަސް ދިޔަނަަމަވެސް ހޫނު ވާނެ ކަމަށެވެ.
