މިއަދުގެ ޒުވާނުން ތިބީ ސަރުކާރާއެކު ކުރިއަށް ދިއުމުގެ ވިސްނުމުގައި: މެންބަރު އަހުމަދު އަބްދުﷲ
ގައިންބޮލުން ސާފުތާހިރުނުވެ ތަރައްގީ ނުގެނެވޭނެ
ބާރަށު ދާއިރާގެ މެންބަރު އަހުމަދު އަބްދުﷲ
މިއަދުގެ ޒުވާނުން ތިބީ ސަރުކާރާއެކު ކުރިއަށް ދިއުމުގެ ވިސްނުމުގައި ކަމަށް ބާރަށު ދާއިރާގެ މެންބަރު އަހުމަދު އަބްދުﷲ ވިދާޅުވެއްޖެއެވެ.
މެންބަރު އަހުމަދު އަބްދުﷲ މިހެން ވިދާޅުވީ ކ. ގުޅީގައި، ގުރައިދޫ ދާއިރާގެ ބައި އިލެކްޝަންގެ ކެމްޕެއިން އެމްޑީޕީން ރަސްމީކޮށް ފެށުމަށް ބޭއްވި ޖަލްސާގައި ވާހަކަދައްކަވަމުންނެވެ.
މެންބަރު އަހުމަދު ވިދާޅުވީ މިއަދުގެ ސަރުކާރުގެ ސިޔާސަތަކީ އެއްވެސް ރަށެއް ބާކީނުކޮށް ހުރިހާ ރަށަކަށް ވެސް ތަރައްގީ ގެނެސްދިނުމުގެ ސިޔާސަތު ކަމަށެވެ. އެހެންކަމުން މިސިޔާސަތުގެ ސަބަބުން މިއަދުގެ ޒުވާނުން ތިބީ އެމްޑީޕީއާއެކު ކުރިއަށް ދިއުމުގެ ވިސްނުން ކަމަށެވެ. ރާއްޖެއަށް އަންނަ ހެޔޮ ބަދަލުތަކާއި ރާއްޖެ ތަރައްގީގެ ނަމުގައި މިކުރަމުންދާ ދަތުރުގެ މިސްރާބަކީ ޒުވާނުން އެދޭ މިސްރާބެއް ކަމަށް މެންބަރު ވިދާޅުވިއެވެ.
މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާ ނިޒާމު ގާއިމްކުރުމުގެ މަސައްކަތް ކުރަމުންދާކަން ފާހަގަކުރައްވައި އަހުމަދު ވިދާޅުވީ ގައިންބޮލުން ސާފުތާހިރުނުވެ ތަރައްގީ ނުގެނެވޭނެ ކަމަށެވެ. އަދި އެއީ މިއަދުގެ ރައީސްގެ ވިސްނުންފުޅުކަމުގައި ފާހަގަކުރެއްވަމުން އަހުމަދު ވިދާޅުވީ މިއަދުގެ ސަރުކާރަށް 4 އަހަރު ވެފައިވާއިރު، ގިނަ ރަށްރަށުގެ ރައްޔިތުންނަށް ސާފުބޯފެނާއި، ނަރުދަމާ ނިޒާމުގެ ޚިދުމަތް ލިބޭ ކަމަށެވެ.
މީގެ އިތުރުން އޭނާ ވިދާޅުވީ ހަށިހެޔޮ ދުޅަހެޔޮ ސިއްހަތެއް ގާއިމްކުރުމަށް ފެށި މަސައްކަތުން ޒުވާނުންނަށް ކުޅިވަރުގެ ވަސީލަތްތައް ފޯރުކޮށްދީފައިވާ ކަމަށާއި، ގިނަ ރަށްރަށުގައި ޖިމްތައް ގާއިމްކޮށްދެވިފައިވާ ކަމަށެވެ. އެހެންކަމުން ރަށްރަށުގައި ދިރިއުޅޭ ރައްޔިތުންނަށް ހިތްފަސޭހަ މާހައުލެއްގައި ކަސްރަތު ކުރުމުގެ ފުރުސަތު ލިބިގެންދާ ކަމަށެވެ.
ކުރިއަށް އޮތް ގުރައިދޫ ދާއިރާގެ ބައި އިލެކްޝަންގައި އެމްޑީޕީގެ ޓިކެޓުގައި ވާދަކުރައްވާ ކެންޑިޑޭޓް އިބްރާހީމް ޝާޒްއަށް ނިސްބަތްކުރައްވައި މެމްބަރު އަހުމަދު ވިދާޅުވީ އެއީ ދާއިރާ ތަމްސީލުކުރަން ރަނގަޅު ކެންޑިޑޭޓެއް ކަމަށާއި، ޝާޒް އިންތިޚާބު ކޮށްދޭން ޖެހޭ ކަމަށެވެ.
މީގެ އިތުރުން އޭނާ ވިދާޅުވީ ގުރައިދޫއަކީ މުސްތަގުބަލު އޮތް ރަށެއް ކަމަށާއި، ބިން ހިއްކުމާއެކު ބޯހިޔާވަހިކަމަށް ދިމާވެފައިވާ މައްސަލައަށް ހައްލު ލިބޭނެ ކަމަށެވެ. ޓޫރިޒަމަށް ވަރަށް ބޮޑަށް ކުރިއަރައިގެންދާއިރު، ޝާޒް ފަދަ މެންބަރެއް ބޭނުންވާ ކަމަށް އަހުމަދު ވިދާޅުވިއެވެ. އަދި ވިދާޅުވީ ރައްޔިތުންނަށް ޚިދުމަތްކުރުމުގައި ފަހަތަށް ފިޔަވަޅެއް ނާޅާނެ ކަމަށާއި، ދާނީ ކުރިއަށް ކަމަށެވެ.
