މާޓިނޭޒްއާއެކު ޕޯޗުގަލްގައި އައު ޗެޕްޓާއެއް ފެށުމަށް ރޮނާލްޑޯ ހުރީ އުފަލުން

ޕޯޗުގަލް ޤައުމީ ފުޓުބޯޅަ ޓީމުގެ އައު ކޯޗު ރޮބާޓޯ މާޓިނޭޒްއާއެކު ޓީމުގެ އައު ޗެޕްޓާއެއް ފެށުމަށް އުފަލުން ތައްޔާރަށް ހުރި ކަމަށް ކްރިސްޓިއާނޯ ރޮނާލްޑޯ ބުނެފި އެވެ.

ޕޯޗުގަލްގެ ކެޕްޓަންކަން ވެސް ކުރަމުން އަންނަ ރޮނާލްޑޯ މިހެން ބުނީ އަންނަ އަހަރު އޮންނަ ޔޫރޯ ފުޓުބޯޅަ މުބާރާތުގެ ކޮލިފައިންގައި ލިޗްޓެންސްޓައިންއާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. އެ މެޗުގެ ކުރިން ޕޯޗުގަލް އިން ވަނީ މާޓިނޭޒްގެ އިރުޝާދުގެ ދަށުން ފަރިތަކުރުންތައް ކުރިއަށް ގެންގޮސްފަ އެވެ. މި މެޗަކީ ޕޯޗުގަލްގެ ކޯޗުކަމާ މާޓިނޭޒް ހަވާލުވި ފަހުން އެ ޓީމުން ކުޅޭ ފުރަތަމަ މެޗެވެ. މެޗުގެ ކުރިން ވާހަކަ ދައްކަމުން ރޮނާލްޑޯ ބުނީ، އޭނާ އަށް ފެންނަނީ ކުޅުންތެރިން ވަރަށް އުފަލުން ތިބި މަންޒަރު ކަމަށާއި، މިހާރު އޮތީ އުފާވެރި މާހައުލެއް ކަމަށެވެ. އަދި މިއީ ޕޯޗުގަލްގެ ކުޅުންތެރިންނާއި، ކޯޗިން ސްޓާފުންނަށް އައު ޞަފްހާ އެއް ކަމަށެވެ. ހަމައެއާއެކު ރޮނާލްޑޯ ފާހަގަ ކުރި ގޮތުގައި ޕޯޗުގަލްގެ ކުޅުންތެރިންގެ މެންޓާލިޓީ ވެސް މިހާރު ބަދަލުވާނެ އެވެ. ކުރިއަށް ދާން އައު ޚިޔާލުތައް ލިބެމުން އަންނަކަން ފާހަގަކޮށް ރޮނާލްޑޯ ބުނީ، އެނބުރި ޤައުމީ ޓީމަށް އައިސް އެހީވެވޭތީ އޭނާ ވަރަށް އުފާވާ ކަމަށެވެ.

މީގެ އިތުރުން ރޮނާލްޑޯ ބުނީ ދިރިއުޅުމުގައި ބަދަލެއް ގެނައުމަކީ އެންމެ ރަނގަޅު ގޮތް ކަމަށާއި، އެކަމުގެ ޕޮސިޓިވް އަސަރުތައް ވެސް ފެންނާނެ ކަމަށެވެ. އޭނާ ބުނީ އެކަމުން އައު ކަންތައްތަކެއް ދަސްވާނެ ކަމަށާއި، މިހާރު ޕޯޗުގަލް ޤައުމީ ޓީމުގައި އޮތީ އެކަން ކަމަށެވެ. ރޮނާލްޑޯ ބުނީ ތެދަށް ބުނާނަމަ، މިހާރު ކުޅުންތެރިންނަށް ވަރަށް ޚާއްސަކަމެއް އިޙުސާސްވާ ކަމަށާއި، ޓީމުގެ ފަރިތަކުރުންތައް ވެސް ފެންނަނީ ވަރަށް ރަނގަޅަށް ކުރިއަށްދާ ތަން ކަމަށެވެ. އަދި ޓީމުގެ ކޯޗާއި، ސްޓާފުން އަދި ފުޓުބޯޅަ ފެޑެރޭޝަންގެ ރައީސަށް އޭނަށް އަށް ޤައުމީ ޓީމަށް ކަމެއް ކޮށްދެވޭނެކަން ޤަބޫލުކުރާނަމަ، އަބަދުވެސް އޭނާގެ އެންމެ މޮޅު ކުޅުން ދައްކާނެ ކަމަށެވެ. ރޮނާލްޑޯ ބުނީ އޭނާ ބޭނުންވަނީ ޕޯޗުގަލް އެންމެ މަތީ ފަންތީގައި ބާއްވައި، ކުޅުންތެރިން ވެސް އެ ފެންވަރަށް ގެންދަން ކަމަށެވެ.

ޔޫރޯ ކޮލިފައިންގައި ޕޯޗުގަލް އިން ލިޗްޓެންސްޓައިންއާ ދެކޮޅަށް ނުކުންނާނީ ބުރާސްފަތި ދުވަހުގެ ރޭ ރާއްޖެ ގަޑިން ދަންވަރު 12:45 ގައެވެ.