ސަމީރު ވިދާޅުވީ މަޖިލީހުގައި އެމްޑީޕީގެ 65 މެންބަރުން ތިއްބެވިނަމަވެސް މިއަދުގެ ހާލަތަކީ އޭގެތެރެއިން ބައެއް މެންބަރުން މަސައްކަތްކުރައްވަނީ ސަރުކާރާ ދެކޮޅަށްކަމަށް
ރައީސް އޮފީހުގެ މިނިސްޓަރު އަހުމަދު ސަމީރު
ސަރުކާރާއެކު އެއްގޮތަކަށް ހުންނާނެ މީހަކު ރައްޔިތުންގެ މަޖިލީހުގެ ކުރިޔަށް އޮތް ގުރައިދޫ ދާއިރާގެ ބައި އިލެކްޝަންގައި ހޮވުމަކީ މުހިންމު ކަމެއްކަމަށާއި އެހެންކަމުން އެދާއިރާއަށް ޝާޒު ހޮވަންޖެހޭކަމަށް ރައީސް އޮފީހުގެ މިނިސްޓަރު އަހުމަދު ސަމީރު ވިދާޅުވެއްޖެއެވެ.
ކ. ގުޅީގައި، ގުރައިދޫ ދާއިރާގެ ބައި އިލެކްޝަންގެ ކެމްޕޭން އެމްޑީޕީން ރަސްމީކޮށް ފެށުމަށް ބޭއްވި ޖަލްސާގައި ވާހަކަދައްކަވަމުން ސަމީރު ވިދާޅުވީ މަޖިލީހުގައި އެމްޑީޕީގެ 65 މެންބަރުން ތިއްބެވިނަމަވެސް މިއަދުގެ ހާލަތަކީ އޭގެތެރެއިން ބައެއް މެންބަރުން މަސައްކަތްކުރައްވަނީ ސަރުކާރާ ދެކޮޅަށްކަމަށެވެ. އެހެންކަމުން ވަކި ގޮތެއްގައި ދެމި ހުންނާނެ މީހަކު ހޮވުމަށް ޝާޒް ހޮވަންޖެހޭކަމަށް ސަމީރު ވިދާޅުވިއެވެ.
މީގެއިތުރުން ފާއިތުވި ދުވަސްތަކުގައި އެދާއިރާގައި ހުންނެވީ މުޅިން ވެސް ޕީޕީއެމްގެ މެންބަރެއްކަމުން މިފަހަރު އަޖުމަ ބަލާލުމުގެ ގޮތުން ވެސް ޝާޒް ހޮވުމަށް ސަމީރު އެދިވަޑައިގެންނެވިއެވެ.
ޖޭޕީގެ ސްލޮޓެއްގައި ސަރުކާރުގައި ހުންނެވުމަށްފަހު ޖޭޕީން ކުރިޔަށް އޮތް ރިޔާސީ އިންތިޚާބުގައި ވަކިން ވާދަކުރަން ނިންމި ހިސާބުން ޖޭޕީ ދޫކުރައްވާ ރައީސް ޞާލިހު އާއެކު ހުންނެވިކަން ސަމީރު ހާމަކުރައްވާފައިވާއިރު ސަމީރު ވިދާޅުވީ އެމަނިކުފާނަށް ވަރަށް ގިނަ އެއްޗެހި އެނގިވަޑައިގަންނަވާކަމަށެވެ. މިސަރުކާރު ވެރިކަމަށް އައިއިރު އެމަނިކުފާނަކީ ޖޭޕީއާ އެންމެ ކައިރީގައި ހުންނެވި މީހާކަމަށާއި އެހެންކަމުން ވަރަށް ވަރަށް ގިނަ އެއްޗެހި އަތުގައި އެބަ ހުރިކަމަށެވެ.
ސަމީރު ވިދާޅުވީ ރައީސް ޞާލިހަށް ދެވަނަ ދައުރެއް ދޭންޖެހޭކަމަށާއި އެއީ ކުޑަ ރަށެއް ބޮޑު ރަށެއް ބެއްލެވުމެއްނެތި ތަރައްގީ ގެނެސްދެއްވާތީކަމަށެވެ. ކިތަންމެ ވަރަކަށް ބަހުން ޖެހިއަސް، ގައު އުކިއަސް ރައީސް އެއްޗެއް ވިދާޅުނުވާނެކަމަށާއި ނަމަވެސް އޮންނަ ޔަގީންކަމަކީ ރައްޔިތުންގެ ހައްގުގައި އަޅަން ޖެހުނު ކޮންމެ ފިޔަވަޅެއް ވެސް ރައީސް އަޅުއްވާނެކަންކަމަށެވެ.
ސަމީރު ވިދާޅުވީ ގައުމު ބޭންކްރަޕްޓް ވަނީ ކަމަށް ވެސް ބަޔަކު ބުނިކަމަށާއި ނަމަވެސް މާހިރުން ބުނާގޮތުގައި އެންމެ ރަނގަޅަށް ކޮވިޑް މެނޭޖުކޮށް އިގްތިޞާދު ކުރިއަރާ ގައުމަކީ ރާއްޖެކަމަށެވެ.
