އަންޗެލޮޓީ، ބްރެޒިލްގެ ކޯޗުކަމާ ހަވާލުވުމުގެ ފުރުސަތު ބޮޑު: އެޑަސަން

ހުސްވެފައިވާ ބްރެޒިލްގެ ކޯޗުކަމުގެ މަޤާމަށް އިޓަލީގެ ކާލޯ އަންޗެލޮޓީ ހަވާލުވުމުގެ ފުރުސަތު ބޮޑު ކަމަށް އެ ޓީމުގެ ގޯލް ކީޕަރު އެޑަސަން ބުނެފި އެވެ.

އިންޓަނޭޝަނަލް ބްރޭކަށް ކުލަބް ފުޓުބޯޅަ މެދުކަނޑާލާފައިވާއިރު ކުޅުންތެރިން މިހާރު ވަނީ ޤައުމީ ޓީމުތަކާ ގުޅިފަ އެވެ. ބްރެޒިލްގެ ޤައުމީ ޓީމަށް ގުޅުމަށްފަހު ދިން އިންޓަވިޔުއެއްގައި އެޑަސަން ބުނީ، އެ ޓީމުގެ ކޯޗު ކަމަށް އަންޗެލޮޓީ އައުމަކީ ވަރަށް ގާތް ކަމެއް ކަމަށެވެ. އޭނާ ބުނީ ރެއާލް މެޑްރިޑަށް ކުޅެމުން އަންނަ ބްރެޒިލްގެ މިލިޓާއޯ އާއި ވިނީޝިއަސް ޖޫނިއާ އަދި ކުރިން އެ ޓީމަށް ކުޅުނު ކަސެމީރޯއާ ދެއްކި ވާހަކަތަކުން އަންޗެލޮޓީ ބްރެޒިލްގެ ކޯޗުކަމާ ހަވާލުވުމުގެ ފުރުސަތު ބޮޑުކަން އެނގުނު ކަމަށެވެ. މީގެ އިތުރުން އެޑަސަން ބުނީ އަންޗެލޮޓީ އަކީ ވަރަށް މޮޅު ކޯޗެއް ކަމަށާއި، އޭނާގެ ދަށުން ކުޅެމުން އަންނަ ކުޅުންތެރިން އޭނާއާ ވަރަށް ގަޔާވާނެ ކަމަށެވެ. އެޑަސަން ބުނީ އޭނާ އަށް ޤަބޫލު ކުރެވޭ ގޮތުގައި އަންޗެލޮޓީގެ ކެރިއަރަކީ "މޮޅުވުމުގެ" ކެރިއަރެއް ކަމަށެވެ. މީގެއިތުރުން އެޑަސަން ބުނީ އަންޗެލޮޓީގެ ސީވީއަށް ބަލާލުމުން ވެސް އެކަން ވަރަށް ސާފުކޮށް އެނގޭނެ ކަމަށާއި، ބްރެޒިލާ އޭނާ ހަވާލުވާނެތޯ ނުވަތަ ނޫންތޯ ވަރަށް އަވަހަށް އެނގޭނެ ކަމަށެވެ. ބްރެޒިލްގެ ކޯޗުކަމުގައި އެންމެ ފަހުން ހުރި ޓީޓޭ މަގާމުން ވަކިވުމާއެކު، އެ މަގާމު މިހާރު އޮތީ ހުހަށެވެ. ބްރެޒިލްގެ ކޯޗުކަމުގައި ވަގުތީ ގޮތުން މިހާރު ހުރީ 20 އަހަރުން ދަށުގެ ޤައުމީ ޓީމުގެ ކޯޗު ރާމޮން މެނޭޒެސް އެވެ.

މީގެ އިތުރުން އެޑަސަން ވަނީ ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ވާހަކަ ވެސް ދައްކައިފަ އެވެ. އޭނާ ބުނީ ބޭނުން ވަނީ، ރެއާލް ޗެމްޕިއަންސް ލީގުން ކަޓުވާލަން ކަމަށާއި، އޭރުން އަންޗެލޮޓީ އަށް ވީ އެންމެ އަވަހަކަށް ބްރެޒިލްގެ ކޯޗުކަމާ ހަވާލުވެވޭނެ ކަމަށެވެ. މީގެ ކުރިން ވެސް ވަނީ ބްރެޒިލްގެ ކޯޗުކަމަށް އަންޗެލޮޓީ ގެންދަން އުޅޭ ކަމުގެ އަޑުތައް ފެތުރިފަ އެވެ. ނަމަވެސް އަންޗެެލޮޓީ ވަނީ އެ ވާހަކަތައް ދޮގުކޮށްފަ އެވެ.