ހަނަފީ ޖޭޕީން ވަކިވެއްޖެ
21 މާރިޗު 2023 | އަންގާރަ 12:24ގާސިމްގެ އެޑްވައިޒަރުގެ މަގާމު ހަނަފީ ގަބޫލުފުޅެއްނުކުރެއްވި
ހަނަފީ
އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ) ޖުމްހޫރީ ޕާޓީން ވަކިވެއްޖެއެވެ.
ހަނަފީ ޖުމްހޫރީ ޕާޓީން ވަކިވެފައިވަނީ އެޕާޓީގެ ލީޑަރު ގާސިމް އިބްރާހީމްގެ އެޑްވައިޒަރަކަށް ހަމަޖައްސަވާފައި ވަނިކޮށެވެ. ގާސިމްގެ އެޑްވައިޒަރުގެ މަގާމު ހަނަފީ ގަބޫލުފުޅުކުރައްވާފައެއް ނުވެއެވެ.
މިކަމާގުޅިގެން ރާއްޖެއެމްވީއަށް މައުލޫމާތުދެއްވަމުން ހަނަފީ ވިދާޅުވީ، ޖުމްހޫރީ ޕާޓީން ވަކިވެވަޑައިގަންނަވަން ނިންމެވި ނިންމެވުމަކީ، ގައުމަށާއި ރައްޔިތުންނަށް އެންމެ ފައިދާހުރި ގޮތް ކަމަށް ބައްލަވައި ނިންމެވި ނިންމެވުމެއް ކަމަށެވެ. އަދި ކުރިއަށްވަޑައިގަންނަވާނީ ގައުމަށް އެންމެ ފައިދާހުރި ގޮތަކަށް ކަމަށް ހަނަފީ ވިދާޅުވިއެވެ.
ހަނަފީ ޖޭޕީން ވަކިވެވަޑައިގަންނަވަން ނިންމަވައި ގާސިމަށް ވަނީ ސިޓީފުޅެއް ފޮނުއްވާފައެވެ. މި ސިޓީފުޅުގައި ވަނީ މިހާރު ޖޭޕީގެ ވިސްނުން ހުރީ ގައުމަށް އެންމެ ފައިދާހުރި ގޮތަށް ކަމަށް ގަބޫލުފުޅުނުކުރައްވާ ކަމަށް ވިދާޅުވެފައެވެ.
ޖުމްހޫރީ ޕާޓީން މިިދިޔަ ފެބްރުއަރީ މަހު ބޭއްވި އެ ޕާޓީގެ ކޮންގްރެސްގައިވެސް ހަނަފީ ބައިވެރިވެވަޑައިގެންނެވިއެވެ. އަދި ޕާޓީގެ ޑެޕިއުޓީ ލީޑަރުގެ މަގާމަށް ކުރިމަތިލެއްވިއެވެ. އެހެންނަމަވެސް އެ މަގާމަށް ހަނަފީ ހޮވިވަޑައިގެންފައެއް ނުވެއެވެ.
ޖޭޕީން ރިޔާސީ އިންތިޚާބުގައި ވަކިން ވާދަކުރުމަށް ނިންނި ނިންމުމާއެކު ސަރުކާރުގެ އެކި މަގާމުތަކުގައި ތިއްބެވި އެ ޕާޓީގެ މެމްބަރުން މަގާމުން އިސްތިއުފާދެއްވަން ޖެހިވަޑައިގަންނަވާކަމަށް، ރައީސް ސާލިހާއެކު ތިއްބެވި މެމްބަރުން ދަނީ ވިދާޅުވަމުންނެވެ. އެހެންނަމަވެސް މިހާތަނަށް ޖުމްހޫރީ ޕާޓީން ވަކިވެޑައިގެންފައިވަނީ ރައީސް އޮފީހުގެ މިނިސްޓަރ އަހުމަދު ސަމީރާއި ހަނަފީއެވެ.
