ލ. ގަމުގެ އަތިރިމަތީގައި ވެލާތަކެއް މެރި މައްސަލަ އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)އިން ބަލަން ފަށައިފިއެވެ.

އީޕީއޭއިން ބުނީ ގަމުގައި ވެލާތަކެއް މެރި މައްސަލާގެ ރިޕޯޓު މިމަހުގެ 11 ވަނަ ދުވަހު ލިބިފައިވާ ކަމަށާއި، އެ މައްސަލަ ބަލަމުންދާ ކަމަށެވެ. ނަމަވެސް އެ މައްސަލައިގައި ތަހުގީގަށް އެކަށީގެންވާ މިންވަރަށް މައުލޫމާތު ލިބިފައިނުވާ ކަމަށް އީޕީއޭއިން ބުނެއެވެ.

އޮލިވް ރެޑްލީ ޕްރޮޖެކްޓުން ބުނެފައިވަނީ ގަމުގެ އަތިރިމަތީގައި ދެ ވެލާ މަރާލާފައިވާ ކަމަށެވެ. އޭގެ ބޮލާއި ތޮށިގަނޑުފިޔަވައި އެހެން ހުރިހާ މަހެއް ނަގާފައިވާ ކަމަށެވެ.

ލާމު އަތޮޅަކީ މިހާރު ވެލާ އެންމެ ގިނައިން ފެންނަ އެއް އަތޮޅު ކަމަށް އޮލިވް ރެޑްލީ ޕްރޮޖެކްޓުން ބުނެއެވެ.

ގަމުގެ އަތިރިމަތީގައި ވެލާތަކެއް މެރި މައްސަލާގެ ތަހުގީގު ފަށާފައިވާއިރު، ބ. ކެޔޮދޫގައި، ވެލާ ހިފައި އެ އެއްޗެހި މަރާލި ބަޔަކު ފެބްރުއަރީ މަހުގެ ތެރޭގައި އަތުލައިގަނެފައިވެއެވެ. އެ ގްރޫޕުގައި ހިމެނެނީ ކެންދޫގެ ފަސް ފިރިހެނުންނެވެ. އެ މީހުންގެ ބަޔާން ނެގުމަށްގަހު މިހާރު ދޫކޮށްލާފައިވާ ކަމަށްވެސް އީޕީއޭއިން ބުންޏެވެ. ފުލުހުން އެ ފަސް މީހުންގެ ބަޔާން ނެގުމަށްފަހު ދޫކޮށްލިނަމަވެސް ގާނޫނީގޮތުން އަޅަންޖެހޭ ފިޔަވަޅުތައް އަޅާނެކަމަށް އެ އިދާރާއިން ބުނެއެވެ.

ކެޔޮދޫގައި ވެލާތަކެއް ހިފައި މެރި ބަޔަކު އަތުލައިގަތީ، ފުލުހުންނަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގައެވެ. ފުލުހުން އެ އޮޕަރޭޝަން ހިންގާފައި ވަނީ ބ އަތޮޅު ބަޔޮސްފިއަރ ރިޒަރވްއާ ގުޅިގެންނެވެ.

ވެލައަކީ ރާއްޖޭގައި އަދި ދުނިޔޭގައިވެސް ނެތިދިޔުމުގެ ބިރުބޮޑުވެފައިވާ ޖަނަވާރެކެވެ. ވެލާ ދަރިމައިވާ އުމުރަށް ބޮޑުވާން 25-50 އަހަރު ނަގައެވެ. އަދި ވެލާ ރާއްޖެއަށް ބިސްއަޅާ މިންވަރު 1980ގެ އަހަރުތަކާއި އަޅާކިޔާއިރު ދަށްވެފައިވާކަން ފާހަގަކުރެވެއެވެ. ވެލާގެ ބިސްނެގުމާއި، މަސްކެއުމަކީ ރާއްޖޭގެ ވެލާގެ އާބާދީ ދަށްވަމުންދާ ސަބަބެކެވެ. 2016 ވަނަ އަހަރުއްސުރެ ވެލާކަހަނބަށް ގާނޫނީ ގޮތުން ފުރިހަމަ ހިމާޔަތްކަން ދެވިފައިވެއެވެ.

ވެލާކަހަނބުގެ އާބާދީ ހިމާޔަތްކުރުމުގެ ގޮތުން ހޭލުންތެރިކަމުގެ ޕްރޮގްރާމްތައް އީޕީއޭއާ ގުޅިގެން އޮލިވް ރެޑްލީ ޕްރޮޖެކްޓުން ދަނީ ހިންގަމުންނެވެ.