އެފްއޭކަޕް ސެމީގައި ސިޓީއާއި ޝެފީލްޑް ޔުނައިޓެޑް

އިނގިރޭސި އެފްއޭކަޕް ސެމީފައިނަލްގައި މެންޗެސްޓަރ ސިޓީއަށް ޝެފީލްޑް ޔުނައިޓެޑާ ވާދަކުރަން ޖެހިއްޖެއެވެ.

ޝެފީލްޑް ޔުނައިޓެޑަކީ ކުރިން ޕްރިމިއަރ ލީގުގައި ވާދަކުރި ނަމަވެސް މިސީޒަންގައި ޗެމްޕިއަންޝިޕްގައި ވާދަކުރާ ޓީމެކެވެ. ޝެފީލްޑް ޔުނައިޓެޑް ސެމީފައިނަލުން ޖާގަހޯދީ ކުއާޓާ ފައިނަލްގައި 3-2 ން ބްލެކްބާން ރޯވާރސް ބަލިކޮށްގެންނެވެ. ސިޓީ ސެމީފައިނަލަށް ދަތުރުކުރީ ކުއާޓާ ފައިނަލްގައި 6-0 ން ބާންލީ ބަލިކޮށްގެންނެވެ.

ސެމީފައިނަލް ދެވަނަ މެޗުގައި މެންޗެސްޓަރ ޔުނައިޓެޑް ވާދަކުރާނީ ބްރައިޓަންއާއެވެ. ބްރައިޓަން ސެމީފައިނަލަށް ދަތުރުކުރީ ލީގު ޓޫގެ ގްރިމްސްބައި ޓައުން 5-0 ން ބަލިކޮށްގެންނެވެ. މެންޗެސްޓަރ ޔުނައިޓެޑް ސެމީގެ ޖާގަ ޔަޤީންކުރީ 3-1 ން ފުލަމް ބަލިކޮށްގެންނެވެ.

ސެމީފައިނަލް ދެ މެޗު ކުޅޭނީ އޭޕްރީލް 22 އަދި 23 ވަނަ ދުވަހު ވެމްބްލީ ސްޓޭޑިއަމްގައެވެ.