ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅުމުގައި މަޖިލީހުގެ މެމްބަރުންނަށް ރިޝްވަތުދިން ކަމުގެ ފުރިހަމަ ހެއްކާއި ގަރީނާ އެބަހުރި ކަމަށް ބުނެ، ފާރިސް މައުމޫނު ހައްޔަރު ކޮށްފާނެ ކަމުގެ އިޝާރާތެއް ފުލުހުން ދީފި އެވެ.
އަންގާރަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ސްޕްރިންޑެންޓެންޓް އޮފް ޕޮލިސް އަދި ފޮލިސް ސާރވިސްގެ ތަރުޖަމާނު އަހުމަދު ޝިފާނު ވިދާޅުވީ ރައްޔިތުންގެ މަޖިލީހުގެ ބައެއް މެމްބަރުންނަށް ރިޝްވަތު ދިނުމަށް މަސައްކަތްކުރަމުންދާ ކަމަށް ތުހުމަތު ކުރެވޭ މައްސަލަތަކެއް ތަހުގީގު ކުރަމުންދާ ކަމަށެވެ.
"ރައްޔިތުންގެ މަޖިލީހުގެ ބައެއް މެމްބަރުންނަށް ރިޝަވަތު ދޭން ބައެއް ފަރާތްތަކުން މަސައްކަތް ކުރަމުންދާކަމަށްބުނެ، އެމައްސަލަތައް ބަލާ ތަހުގީގުކޮށްދިނުމަށް އެދި ފުލުހުންނަށް ވަނީ ހުށަހަޅާފަ. އަދި މިފަދަ ބައެއް މައްސަލަތައް މިހާރުވެސް ފުލުހުންދަނީ ތަހުގީގު ކުރަމުން. ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ މައްޗަށް ހުށަހެޅުނު އިތުބާރު ނެތްކަމުގެ މައްސަލައަށް ނުފޫޒު ފޯރުވުމުގެ ގޮތުން، ނުވަތަ ވަކި ނަތީޖާއެއް ހާސިލުކުރުމުގެ ގޮތުން ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން ރައްޔިތުންގެ މަޖިލީހުގެ ބައެއް މެމްބަރުންނަށް ރިޝްވަތުދިން ކަމަށް ތުހުމަތު ކުރެވޭ މައްސަލަތަކެއްގެ ހެއްކާއި ގަރީނާ ފުލުހުންނަށް ލިބިފައިވާ ކަމަށް ވެސް މިފުރުސަތުގައި ދަންނަވަން،" ޝިފާން ވިދާޅުވި އެވެ.
މީގެ އިތުރުން ޝިފާނު ވިދާޅުވީ، ހޯމަ ދުވަހުގެ ރޭ ވެސް ރިޝްވަތު މައްސަލައެއް ފުލުހުންނަށް ހުށަހެޅި، އެ މައްސަލައިގައި ތުހުމަތު ކުރެވޭ ފަރާތް ކަމަށްވާ ލ. ފޮނަދޫ، ސްވީޓްފްލާވާރ އަހުމަދު ޝާފިއު ހައްޔަރު ކުރެވިފައިވާ ކަމަށެވެ. އަދި މިފަދަ އެހެން މައްސަލައެއްގައި ތުހުމަތުކުރެވޭ އެހެން ފަރާތެއް ކަމަށްވާ ކުރީގެ ރައީސް މައުމޫން އަބްދުﷲ ގައްޔޫމްގެ ޕާސަނަލް އެސިސްޓެންޓް އަހުމަދު ސޮފްވާން ތަހުގީގަށް ހާޒިރުވުމަށް އެތައް ފަހަރެއްގެ މަތިން އެންގުމުން ވެސް ހާޒިރުނުވެ، ރާއްޖޭން ބޭރުގައި ފިލައިގެން އުޅޭ ކަމަށް ޝިފާން ވިދާޅުވި އެވެ.
ފާރިސްގެ މައްޗަށް ކޮރަޕްޝަންގެ ތުހުމަތުތަކެއް ފުލުހުން ކުރަމުންދާއިރު، ޕީޕީއެމްގެ ދިދަ ބޭނުންކުރި ކަމަށް ބުނެ، ސަހްސު އޮޅުވާލި ކަމުގެ ތުހުމަތުގައި ކްރިމިނަލް ކޯޓުގައި ވަނީ ފާރިސްގެ މައްޗަށް ދައުވާ ވެސް ކޮށްފަ އެވެ. އަދިވެސް އިތުރު ތުހުމަތުތަކެއް ފާރިސްގެ މައްޗަށް ކުރަމުންދާއިރު ދޭތެރެއިން ފާރިސް ފުލުހުންގެ އިދާރާއަށް ހާޒިރު ކޮށް، އެންޓި ކޮރަޕްޝަން ކޮމިޝަނަށް ވެސް ފާރިސް ހާޒިރު ކޮށްފައިވެއެވެ.
