ސަރުކާރުގައި ދެ ކެންޑިޑޭޓުން ތިބެގެން ކުރިއަށް ދިއުމަށް ދަތިވާނެ ކަމަށާއި، ދެން ކަންތައް ކުރާނެ ގޮތަކާ މެދު މަޝްވަރާކުރާނެ ކަމަށް ރައީސް އޮފީހުން ބުނެފިއެވެ.
ސަރުކާރުން މިހެން ބުނެފައިމިވަނީ ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީން ވަކިން ވާދަ ކުރުމަށް ނިންމުމާއި ގުޅިގެންނެވެ. ސަރުކާރު ހިންގާ ކޯލިޝަނުގައި ޖުމްހޫރީ ޕާޓީ ހިމެނޭއިރު، ވަޒީރުންގެ މަޖިލީހުގެ އިތުރުން ދައުލަތުގެ އެކި އިދާރާތަކުގެ ސިޔާސީ މަގާމުތަކުގައި ޖޭޕީއަށް ނިސްބަތްވާ ބޭފުޅުން އެބަތިއްބެވި އެވެ.
މިނިންމުމާއި ގުޅިގެން ރާއްޖެއެމްވީއަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ކޯލިޝަން އެކުލަވާލުމަށް ރައީސް އިބްރާހީމް މުހައްމަދު ސާލިހު، ސަރުކާރުގެ ކޯލިޝަން ޕާޓްނަރުންނަށް ދައުވަތު ފޮނުއްވާފައިވާ ކަމަށެވެ. އަދި އެއަށް ޖުމްހޫރީ ޕާޓީއިން ޖަވާބު ދީފައިނުވާ ކަމަށް މިއުވާން ވިދާޅުވިއެވެ.
ރައީސް ސާލިހާއެކު ކުރިއަށްދާން އަދާލަތު ޕާޓީއާއި އެމްޑީއޭ އިން ވަނީ މިހާރު ނިންމާފައިވާކަން ފާހަގަކުރައްވައި މިއުވާން ވިދާޅުވީ ޖުމްހޫރީ ޕާޓީން ރިޔާސީ ކެންޑިޑޭޓަކު ނެރޭނަމަ، ސަރުކާރުގައި 2 ރިޔާސީ ކެންޑިޑޭޓުން ތިބެގެން ކުރިއަށް ދިއުމަށް ދަތިވާނެ ކަމަށެވެ. އަދި އެފަދަ ޙާލަތެއް އަތުވެއްޖެނަމަ، ދެން ކަންތައްކުރައްވާނެ ގޮތަކާމެދު ރައީސް ސާލިހު، ޖުމްހޫރީ ޕާޓީގެ ލީޑަރޝިޕާއި ގާސިމް އިބްރާހިމާއެކު މަޝްވަރާކުރައްވާނެ ކަމަށް މިއުވާން ވިދާޅުވިއެވެ.
ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން އެ ޕާޓީން ނިންމާފައިވަނީ މާޗް 14 ވީ އަންގާރަ ދުވަހުގެ ރޭ އެޕާޓީން ކުރިއަށް ގެންދިޔަ 151 ވަނަ ކައުންސިލް ބައްދަލުވުމުގައެވެ. މި ބައްދަލުވުމުގައި ހުރިހާ މެންބަރުން ވަނީ މި ނިންމުމަށް އިއްތިފާގުވެފައެވެ. އެ ޕާޓީގެ ރިޔާސީ ކެންޑިޑޭޓަކީ ޕާޓީގެ ލީޑަރު ގާސިމް އިބްރާހިމެވެ.
