ޖުވާކުޅުމާއި ހަށިވިއްކުމުގެ ކުށަށް އަރައިގަންނަ ބިދޭސީން ގިނަވެއްޖެ: މިނިސްޓަރު

ކުރިން ބިދޭސީން ޝާމިލްވުން މަދު ކުށްތަކުގައްޔާއި ބޮޑެތި ކުށްތަކުގައި ބިދޭސީން ބައިވެރިވާ މިންވަރު އިތުރުވަމުންދާކަމަށާއި، އޭގެ ތެރޭގައި ހަށިވިއްކުމުގެ ކުށާއި ޖުވާގެ ކުށް ފާހަގަކުރެވޭ ކަމަށް މިނިސްޓަރ އޮފް ހޯމް އެފެއާޒް އައްޝައިޚް ޢިމްރާން ޢަބްދުالله ވިދާޅުވެއްޖެއެވެ.

މިނިސްޓަރު އެފަދައިން ފާހަގަކުރައްވާފައި ވަނީ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ)، މިނިސްޓަރ އޮފް ހޯމް އެފެއާޒަށް ލިޔުމުން ޖަވާބު ހޯއްދެވުމަށް ކުރައްވާފައިވާ ސުވާލަށް ޖަވާބުދެއްވަމުންނެވެ. އެ ޖަވާބު މަޖިލީހަށް އިއްވަވައި ދެއްވީ މަޖިލީހުގެ އަމީންއާމުގެ ނައިބެވެ. އޭނާ ސުވާލުކުރައްވާފައި ވަނީ މާލެ އާއި އަތޮޅުތެރޭގައި ވަރކްޕާމިޓާއި ވިސާ ނެތި ޤާނޫނާއި ގަވާއިދުތަކާ ޚިލާފަށް އުޅެމުންދާ ބިދޭސީންގެ ފަރާތުން ޢާންމު އިޖްތިމާޢީ މިންގަނޑުތަކީ ޚިލާފުވާ މައްސަލަތައް ހުއްޓުވުމަށާއި އަދި މިފަދަ ފަރާތްތަކުން ދިވެހިންނަށް ލިބިފައިވާ އިޖްތިމާޢީ އަދި އިޤްތިޞާދީ ޙައްޤުތަކަށް ހުރަސްއެޅޭ ގޮތަށް ކުރަމުންދާ ޤާނޫނާއި ޚިލާފު ކަންކަން ހުއްޓުވުމަށް ފާއިތުވި 3 އަހަރު ކުރައްވާފައިވާ މަސައްކަތަކީ ކޮބައިތޯ ސާފުކުރެއްވުމަށެވެ.

ކުރިން ބިދޭސީން ޝާމިލްވުން މަދު ކުށްތަކުގައި އާއި ބޮޑެތި ކުށްތަކުގައި ބިދޭސީން ބައިވެރިވާ މިންވަރު އިތުރުވަމުންދާ ކަން ފާހަގަކުރެވިފައިވުމާއި ގުޅިގެން ސިޔާސަތުތައް ކަނޑައެޅުމުގައި އާއި އޮޕަރޭޝަންތައް ކަނޑައެޅުމުގައި މިނިސްޓްރީންނާއި ދިވެހި ފުލުހުންގެ ޚިދުމަތުން ދަނީ އެކަމަށް އިތުރު ސަމާލުކަމެއް ދެމުން ކަމަށް މިނިސްޓަރު ވިދާޅުވިއެވެ. މީގެ އިތުރުން ބިދޭސީން އެ ކުށެއްގައި ޝާމިލްވާ މިންވަރު ދެނެގަނެ އިތުރުކަމަށް ފާހަގަވާ ކުށްތައް ކަމަށްވާ ހަށިވިއްކުމުގެ ކުށާއި، ޖުވާކުރުމުގެ ކުށާއި ދެކޮޅަށް ފާއިތުވި 3 އަހަރު ފުލުހުން ވަނީ ޚާއްސަ އޮޕަރޭޝަންތައް ހިންގާފައި ކަމަށް ވެސް މިނިސްޓަރު ވިދާޅުވިއެވެ. އަދި ޖިނާއީ ކުށްތަކަށް ނުވި ނަމަވެސް އާއްމުންނަށް އުނދަނގޫވާގޮތަށް ހިނގާކަންކަން ބަލައި ހުއްޓުވަން ފުލުހުން މަސައްކަތް ކުރާ ކަމަށް މިނިސްޓަރު ފާހަގަކުރެއްވިއެވެ. އެގޮތުން އާއްމުންނަށް އުނދަނގުވާގޮތަށް އުޅަނދުތައް ސާފުކުރުމާއި، ގަވާއިދާޢި ޚިލާފަށް މަގުމަތީގައި މުދާ ބަހައްޓައިގެން ވިޔަފާރިކުރާ ބިދޭސީންނާއި ދިވެހިންގެ މައުލޫމާތު އެއްކުރަމުންދާކަމަށް މިނިސްޓަރު ވިދާޅުވިއެވެ. އަދި އެ މައުލޫމާތުގެ އަލީގައި ސިޓީ ކައުންސިލާއެކު ގުޅިގެން މަސައްކަތް ކުރަމުންދާ ކަމަށް މިނިސްޓަރުގެ ޖަވާބުގައި ވިދާޅުވިއެވެ.

އިތުރަށް މިނިސްޓަރު ވިދާޅުވީ ހުޅުމާލޭ ޕްރިޒަން ކޮމްޕްލެކްސް މަޝްރޫޢުގެ ދަށުން ގަވާއިދާއި ޚިލާފަށް އުޅޭ ބިދޭސީން ބައިތިއްބާ ޑިޓެންޝަން ސެންޓަރުގެ ޖާގަ އިތުރުކުރުމަށް މަސައްކަތްކުރަމުންދާ ކަމަށެވެ. ނަމަވެސް ކުށުގެ ވެށިން ހައްޔަރުކުރާ ބިދޭސީން ޑީޕޯޓްކޮށްލުމުގައި އެމްބަސީތަކުން ލިބެން ޖެހޭ އެއްބާރުލުން ނުލިބުމަކީ ގޮންޖެހުމެއް ކަމަށް މިނިސްޓަރު ވިދާޅުވިއެވެ.

މީގެއިތުރުން އާއްމު އިޖުތިމާއީ މިންގަނޑާއި ޚިލާފު އަމަލުތަކަށް ހުއްޓުވުމަށާއި، އަދި ދިވެހިރާއްޖޭގެ ޤާނޫނުތަކަށް ދިރިއުޅޭ އަދި ޒިޔާރަތްކުރާ އެންމެހާ ފަރާތްތަކަށް ލިބިދީފައިވާ އިޖުތިމާއީ އަދި އިގްތިސާދީ ހައްގަކަށް އުނިކަން އަންނަ ގޮތަށް ހިންގާ ޖިނާއީ ކުށްތައް ހުއްޓުވުމުގައި އެކަންކަމުގައި ޝާމިލްވާ ބިދޭސީންނާއި ދިވެހިންނަށް ފާއިތުވި 3 އަހަރު ތެރޭގައި ފިޔަވަޅު އެޅިފައިވާ ކަމަށް މިނިސްޓަރު ވިދާޅުވިއެވެ. އެހެންނަމަވެސް ޤަވާއިދާއި ޚިލާފަށް ވަރކް ޕަރމިޓާ ނުލައި އަދި ވިސާ ނެތި މަސައްކަތް ކުރާ މައްސަލަ އާއި ޤާނޫނަކުން ނުވަތަ ޤަވާއިދަކުން ދިވެހިންނަށް ޚާއްސަވާ މަސައްކަތްތަކުގައި ބިދޭސީން ޝާމިލްވާ މައްސަލައަކީ އިކޮނޮމިކް މިނިސްޓްރީ އާއި އިމިގްރޭޝަންގެ ބެލުމުގެ ދަށުން ހައްލު ހޯދަން ޖެހޭ މައްސަލަ އެއްކަމަށް މިނިސްޓަރު ވިދާޅުވިއެވެ. އެހެންކަމުން އެފަދަ މައްސަލަތަކަށް ހައްލު ހޯދުމަށް އެ އިދާރާތަކާ އެކު މަސައްކަތްކޮށް ބައްދަލުވުންތައް ބާއްވަވާފައިވާ ކަމަށް ވެސް މިނިސްޓަރު ވިދާޅުވިއެވެ.

މިނިސްޓަރުގެ ޖަވާބުގައި އިތުރަށް ވިދާޅުވީ އެފަދަ މައްސަލަތަކާއި ގުޅޭ މައްސަލަތައް ހައްލުކުރުމުގެ ގޮތުން ދިވެހި ފުލުހުންގެ ސީދާ އޮޕަރޭޝަނެއް ކުރިއަށް ގެންގޮސްފައި ނުވާ ކަަމަށެވެ. އެހެންނަމަވެސް އިމިގްރޭޝަނާއެކު ޚާއްސަ އޮޕަރޭޝަނެއް ކުރިއަށް ގެންގޮސް ސްމަގްލިން ނުވަތަ ހިއުމަން ޓްރެފިކިންގެ ޝިކާރައަކަށްވާ ފަރާތްތައް ދެނެގަނެ ކުށް ހިނގުމުގެ ކުރިން އެކަންކަން ހުއްޓުވާފައިވާ ކަމަށެވެ.