މުޒާހަރާ ކުރި ބިދޭސީންނަށް މުސާރަ ނުދޭ މައްސަލަ އިމިގްރޭޝަނުން ބަލަނީ
ހޮނިހިރު ދުވަހު ހެނދުނު މުލިއާގެ ސަރަހައްދަށް ގިނަ އަދަދެއްގެ ބިދޭސީން އެއްވެ، އަޑު އުފުލާފައިވޭ
މުސާރަ ނުދޭ މައްސަލާގައި މުޒާހަރާ ކުރި ގިނަ އަދަދެއްގެ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފި
ހޮނިހިރު ދުވަހު ގްރީން ޒޯނުގައި މުޒާހަރާ ކުރި 55 ބިދޭސީންނަށް މުސާރަ ނުދޭ މައްސަލަ އިމިގްރޭޝަނުން ބަލަމުންދާ ކަމަށް އެ އިދާރާއިން ބުނެފިއެވެ.
މުސާރަ ނުދޭ ކަމަށް ބުނެ ގިނަ އަދަދެއްގެ ބިދޭސީންތަކެއް މުޒާހަރާކޮށްފައި ވަނީ މުލިއާގެ ސަރަހައްދުގައެވެ. އެގޮތުން ހޮނިހިރު ދުވަހު ހެނދުނު މުލިއާގެ ސަރަހައްދަށް ގިނަ އަދަދެއްގެ ބިދޭސީން އެއްވެ، އަޑު އުފުލާފައިވެއެވެ. އެސަރަހައްދުން ފޮނުވާލުމުން ރައީސް އޮފީސް ސަރަހައްދަށް އެއްވުމަށް ވެސް މަސައްކަތް ކޮށްފައިވެއެވެ. ބިދޭސީން ވަނީ އޭގެ ފަހުން ހޮނިހިރު ދުވަހު މެންދުރު 11:00 ހާއިރު މަޖީދިއްޔާ ސްކޫލު ދޮރުމައްޗަށް އެއްވެ، އަޑު އުފުލާފައިވެއެވެ. ރާއްޖެއެމްވީއަށް މައުލޫމާތު ދިން ބިދޭސީން ބުނީ މުސާރަ ނުދީ މަސައްކަތް ކުރުވާތާ 6 މަހަށްވުރެ ގިނަ ދުވަސްވެފައިވާ ކަމަށާއި، މަސައްކަތް ކުރާ ކުންފުންޏާއި ވާހަކަދައްކައި، ހައްލު ކުރުމަށް މަސައްކަތް ކޮށްފައިވާ ކަމަށެވެ. އަދި ރާއްޖޭގައި ހުންނަ އިންޑިއާ އަދި ބަންގްލަދޭޝް އެމްބަސީއަށް ގޮސް މައްސަލަ ހައްލު ކުރުމަށް މަސައްކަތް ކުރި ނަމަވެސް އިޖާބަ ދީފައިނުވާ ކަމަށް އެމީހާ ބުނެފައިވެއެވެ.
ހޮނިހިރު ދުވަހު ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝައްމާން ވަހީދު އެކަމާއި ގުޅިގެން ވިދާޅުވީ މުޒާހަރާ ކޮށްގެން އިމިގްރޭޝަނާ ހަވާލު ކުރި 55 ބިދޭސީންގެ ހައްގުތަކެއް ގެއްލިފައިވާ ކަމަށް ބުނަމުންދާތީ އެކަން ބަލަމުންދާ ކަމަށެވެ. އަދި އެ މައްސަލައާ ގުޅިގެން ބަލަން ޖެހޭ ކަންތައްތައް މިވަގުތު ދަނީ ބަލަމުންކަން ފާހަގަކޮށް ޝައްމާން ވިދާޅުވީ އެ ބިދޭސީންނާ މެދު ފިޔަވަޅު އަޅާނީ މައްސަލަ ތަހުގީގުކޮށް ނިމުމުން ކަމަށެވެ.
މިމައްސަލައާ ގުޅިގެން ފުލުހުން ބުނީ މުސާރަ ނުލިބޭ ކަމަށް ބުނެ ބިދޭސީންތަކެއް މުލިޔާގެއާ ހިސާބުގައި ހިތްހަމަ ނުޖެހުން ފާޅުކުރަމުންދާ މައްސަލައާ ގުޅިގެން ފުލުހުން އެޓެންޑް ވެފައިވާ ކަމަށެވެ.
ފުލުހުން ބުނީ އެމީހުން މިހާރު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށެވެ. އެއީ އިންޑިއާގެ 38 މީހުންނާއި، ބަންގްލަދޭޝްގެ 17 މީހުން ކަމަށް ވެސް ފުލުހުން ބުނެއެވެ.
މީގެ އިތުރުން ހުކުރު ދުވަހުގެ އިރުއޮއްސި 6:22 ހާއިރު އާޓިފިޝަލް ބީޗް ސަރަހައްދުގައި ވެސް އިންޑިއާއަށް ނިސްބަތްވާ ބަޔަކު މާރާމާރީ ހިންގާފައިވެއެވެ. މިމައްސަލަ ފުލުހުން އިތުރަށް ތަހުގީގު ކުރަމުންދާއިރު، މިމައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައިނުވެއެވެ.
ބިދޭސީންގެ ހަރަކާތްތައް އިތުރުވަމުންދާއިރު، އިމިގްރޭޝަނުން ގެންދަނީ ގަވާއިދާ ހިލާފަށް ރާއްޖޭގައި އުޅޭ ބިދޭސީން ފޮނުވާލުމަށް ޚާއްސަ އިންސްޕެކްޝަންތައް ހިންގަމުންނެވެ.
