އެމްޑީޕީ، އަދާލަތު އަދި އެމްޑީއޭ ކޯލިޝަނުން ފަސޭހަކަމާއެކު ރައީސަށް އިންތިޚާބު ކާމިޔާބުކުރެވޭނެ: އަލީ ޒާހިރު
ރައީސް ޞާލިހުގެ ލީޑަރޝިޕްގެ ދަށުގައި އެމްޑީޕީ އިސްވެއޮވެ އަދާލަތާއި އެމްޑީއޭ ކޯލިޝަނަށް ފަސޭހަކަމާއެކު މިއަހަރުގެ އިންތިޚާބު ކާމިޔާބުކުރެވޭނެކަން ޔަގީންކަމަށް ވިދާޅުވި
ރައީސް އޮފީހުގެ ޗީފް އޮފް ސްޓާފް އަލީ ޒާހިރު
އެމްޑީޕީ އިސްވެ އޮވެ އަދާލަތު ޕާޓީ އަދި އެމްޑީއޭއާ އެކު ހަދާފައިވާ ކޯލިޝަނުން މި އަހަރުގެ ރިޔާސީ އިންތިހާބު ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް ފަސޭހަކަމާއެކު ކާމިޔާބު ކުރެވޭނެ ކަމަށް، ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.
ރައީސާއެކު މިއަހަރުގެ އިންތިޚާބަށް ކޯލިޝަން ހެދުމަށް ދައުވަތު ދީފައިވަނިކޮށް ސަރުކާރުގެ ކޯލިޝަނުގައި ހިމެނޭ ޖުމްހޫރީ ޕާޓީން ވަނީ ރިޔާސީ އިންތިހާބުގައި ވަކިން ވާދަކުރަން ނިންމާފައެވެ. ޖުމްހޫރީ ޕާޓީން ބޭއްވި ކައުންސިލު ބައްދަލުވުމެއްގައި އެ ޕާޓިން ނިންމާފައިވަނީ ރިޔާސީ އިންތިޚާބުގައި، ޖުމްހޫރީ ޕާޓީން އިސްވެ އުފައްދާ ކޯލިޝަނަކުން ވާދަކުރުމަށެވެ.
އެނިންމުން ނިންމިކަން ޖޭޕީން އިއުލާންކުރިފަހުން އަދާލަތު ޕާޓީގެ ސްލޮޓެއްގައި ރައީސް އޮފީހުގެ ޗީފް އޮފް ސްޓާފްގެ މަގާމު ފުރުއްވަމުން ގެންދަވާ އަލީ ޒާހިރު ކުރެއްވި ޓްވީޓެއްގައި ވިދާޅުވީ ރައީސް ޞާލިހުގެ ލީޑަރޝިޕްގެ ދަށުގައި އެމްޑީޕީ އިސްވެއޮވެ އަދާލަތާއި އެމްޑީއޭ ކޯލިޝަނަށް ފަސޭހަކަމާއެކު މިއަހަރުގެ އިންތިޚާބު ކާމިޔާބުކުރެވޭނެކަން ޔަގީންކަމަށެވެ.
ރައީސް ޞާލިހުގެ ކޯލިޝަނަށް ޖޭޕީ ގެނައުމަށް ރައީސް ޞާލިހު އާއި އަދާލަތުގެ ރައީސް އިމްރާން އަބްދުﷲ އާއި ޖޭޕީގެ ސްލޮޓެއްގައި ނައިބު ރައީސްކަމުގައި ހުންނެވި ފައިސަލް ނަސީމްވެސް ވަނީ ގާސިމްއާ ބައްދަލުކުރައްވާފައެވެ. އެމްއާރުއެމްގެ ރައީސް ފާރިސް މައުމޫންވެސް ވަނީ ގާސިމްއާ ބައްދަލުކުރައްވާފައެވެ.
ޖޭޕީން ވަކިން ވާދަކުރަން ނިންމުމުން ޖޭޕީގެ ސްލޮޓެއްގައި ރައީސް އޮފީހުގެ މިނިސްޓަރުކަމުގައި ހުންނެވި އަހުމަދު ސަމީރު ވަނީ ޕާޓީން އިސްތިއުފާދެއްވާފައެވެ.
ޖޭޕީގެ ކައުންސިލުން އިންތިޚާބުގައި ވަކިން ވާދަކުރަން ނިންމާފައިވާއިރު މިދިޔަ މަހު ބޭއްވި އެޕާޓީގެ ޤައުމީ ކޮންފަރެންސްގައި ވަނީ ވަކިން ވާދަކުރަން ކައުންސިލަށް ލަފާދިނުމަށްވެސް ފާސްކޮށްފައެވެ.
