އިސްރާއިލްގެ ޝަރުއީ ނިޒާމު ބަދަލުކުރުމާ ދެކޮޅަށް އެންމެ ފަހުން ކުރި މުޒާހަރާގައި ބައި މިލިއަނެއްހާ މީހުން ބައިވެރިވެއްޖެއެވެ.
އިސްރާއީލުގެ ތާރީޚްގައިވެސް ބޭއްވުނު އެންމެ ބޮޑު މުޒާހަރާގައި ރައްޔިތުން ހޮނިހިރު ދުވަހުގެރޭ ވަނީ މަގުތައް ފުރާލާފައެވެ. ޝަރުއީ މިނިވަންކަމަށް ނުރައްކާވާ ކަމަށްބުނެ ފާޑުކިޔާ ފަރާތްތަކުން ދެކޭ ގޮތުގައި ޝަރުއީ ނިޒާމު ބަދަލުކުރަން އުޅެނީ ސުޕްރީމް ކޯޓުގެ ބާރުތައް ހުއްޓުވުމަށެވެ.
ދީނީ ގައުމިއްޔަތު ކޯލިޝަންގެ އެކުވެރިންނާއެކު ޕާލަމެންޓްގެ އަޣުލަބިއްޔަތު ވެސް އޮތް އެ ޤައުމުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވަނީ އެ ބަދަލު ގެންނަވަނީ ސަރުކާރުގެ ގޮފިތައް ބެލެންސް ކުރެއްވުމަށް ކަމަށެވެ. ނަމަވެސް އިދިކޮޅު ފަރާތްތަކުން ބުނަނީ އެއިސްލާހު ތަކުގެ ސަބަބުން ޑިމޮކްރަސީ ފުނޑިގެންދާނެ ކަމުގައެވެ.
އިސްލާހުތައް ތަސްދީގުކުރުމާ ދިމާއަށް ދަތުރުކުރަމުންދާއިރު، މުޒާހަރާތައް ވަނީ އިތުރުވެފައެވެ. އިސްރާއިލްގެ ފައިސާގެ އަގު ވެސް ވަނީ މިދަނޑިވަޅުގައި ދަށްވެފައެވެ. ބައެއް އަސްކަރީ ރިޒާވިސްޓުން ވަނީ ކޯލްއަޕް އަމުރުތަކަށް ބޯނުލަނބާނެ ކަމުގެ އިންޒާރު ދީފައެވެ. ރައީސް އައިސާކް ހަރްޒޮގް ވަނީ މުޒާހަރާތައް ފަސްކޮށް، މަޝްވަރާތަކަށް ގޮވާލައްވާފައެވެ.
މުޒާހަރާތައް ކުރިއަށް ދިޔައީ ސުލްހަވެރިކޮށް ނަމަވެސް ޓްރެފިކް ހުއްޓުވަން ކުރި މަސައްކަތްތަކާ ދެކޮޅަށް ފުލުހުން ވަދެ މުޒާހަރާގެ ބައިވެރިންގެ ތެރެއިން ބަޔަކު ޒަޚަމްވެ އަދި ބަޔަކު ހައްޔަރު ކުރިތަން ރޮއިޓާސް އަށް ފެނިފައިވެއެވެ.
ގައުމީ ފުލުހުންގެ ވެރިޔާ އިންސްޕެކްޓަރު ޖެނެރަލް ޔާކޯވް ޝަބްޓައި ވަނީ މިވަގުތަށް މަސައްކަތުން ފަހަތަށް ޖެހިވަޑައިގެން ޓެލް އަވީވްގެ ފުލުހުންގެ ވެރިޔާއާ އަލުން މަސައްކަތް ހަވާލުކުރަން ނިންމާފައިވާ ކަމަށް ވިދާޅުވެފައެވެ.
ގާނޫނީ އިމުގެ ތެރޭގައި ބާއްވާ މުޒާހަރާތައް ރައްކާތެރިކޮށް ފުލުހުން ކުރިއަށް ގެންދާނެ ކަމަށާއި "މި މައްސަލައިގައި އެއްވެސް ސިޔާސީ ޕްރެޝަރަކަށް ބޯނުލަނބާނެ" ކަމަށް ޔާކޯވް ޝަބްޓައި ވަނީ ވިދާޅުވެފައެވެ.
ޑިސެމްބަރު މަހުގެ ފަހުކޮޅު ހަ ވަނަ ދައުރަކަށް އެނބުރި ވެރިކަމަށް ވަޑައިގެންނެވި ނަތަންޔާހޫ ވިދާޅުވާ ގޮތުގައި މުޒާހަރާތަކުގެ މަގުސަދަކީ އޭނާ ވެރިކަމުން ވައްޓާލުމެވެ. ކޮރަޕްޝަންގެ ތިން މައްސަލައެއްގައި އޭނާގެ މައްޗަށް ޝަރީއަތް ކުރަމުންދާއިރު އެކަންތައްތަކަށް އޭނާ ވަނީ އިންކާރު ކުރައްވާފައެވެ.
