ޔުނައިޓެޑް މާމޮޅު، ދެ ވަނަ ގޯލާއެކު މެޗު ނިމިއްޖެ: ޕެލެގްރީނީ

ވާދަކޮށްލެވޭ ވަރަށްވުރެ ފަހު ހާފުގައި މެންޗެސްޓާ ޔުނައިޓެޑް މޮޅު ކަމަށް ސްޕޭނުގެ ރެއާލް ބެޓިސްގެ ކޯޗު މެނުއަލް ޕެލެގްރީނީ ބުނެފި އެވެ.

އޭނާ މިހެން ބުނީ ޔޫރޮޕާ ލީގުގައި ރޭ ޔުނައިޓެޑް އަތުން ބެޓިސް 4-1އިން ބަލިވުމުންނެވެ. މެޗުގައި ޔުނައިޓެޑުން ޖެހި ފަހު ތިން ލަނޑު ޖެހީ ފަހުހާފުގަ އެވެ. މެޗުގެ ފުރަތަމަ ލަނޑު ޖެހީ ހަ ވަނަ މިނެޓުގައި ޔުނައިޓެޑްގެ މާކަސް ރަޝްފޯޑެވެ. ބެޓިސްއިން ފުރަތަމަ ހާފު ނިމުމުގެ ކުރިން ނަތީޖާ ހަމަހަމަކުރީ އަލްވާރޯ ޕެރޭޒް ޖެހި ގޯލުންނެވެ. ޔުނައިޓެޑަށް ލީޑު ނަގައިދިނީ ފަހު ހާފުގައި ބްރެޒިލްގެ ފޯވަޑް އެންތަނީ އެވެ. އަދި ބުރޫނޯ ފެނާންޑޭޒް އާއި ވެގްހޯސްޓް ނަތީޖާ ފުޅާކޮށްދިނެވެ.

އޭނާ އަދި ބުނީ ގަދަ އަށަކަށް ދިއުމަށް ބާކީ އެއް މެޗު އޮތްނަމަވެސް އެކަން ކުރަން ބަލާއިރު ނަތީޖާގެ ފަރަގު ބޮޑުކަމަށެވެ. އެކަމަކު އެއީ ނެތް ފުރުސަތެއް ކަމަށް ނުބަލައި އޭނާގެ ޓީމުން މަސައްކަތް ކުރާނެ ކަމަށެވެ.

މެޗަށް ފަހު ޔުނައިޓެޑްގެ ކޯޗު އެރިކް ޓެން ހާގް ބުނީ ޔުނައިޓެޑް އެންމެ ފަހުން ކުޅުނު މެޗުގައި ޕްރެމިއާ ލީގުގައި ލިވަޕޫލް އަތުން 7-0އިން ބަލިވުމުން މި މެޗަށް ކުޅުންތެރިން ވަރަށް ރަނގަޅަށް ތައްޔާރުވި ކަމަށެވެ. އަދި އެކަމުގެ ހޮޔެ އަސަރު މެޗުން ފެނިގެންދިޔަ ކަމަށާއި ކުޅުން ވަރަށް ފުރިހަމަ ކަމަށެވެ.

މި މެޗުގައި ޔުނައިޓެޑްގެ ފޯވަޑް މާކަސް ރަޝްފޯޑް ޖެހި ގޯލަކީ މި ސީޒަނުގައި އޭނާ ޖެހި 26 ވަނަ ގޯލެވެ. މިއަށްވުރެ އިތުރަށް ޔޫރަޕުގައި ގޯލު ޖަހާފައިވަނީ ޕީއެސްޖީގެ ކީލިއަން އެމްބާޕޭ އާއި މެންޗެސްޓާ ސިޓީގެ އާލިން ހާލާންޑެވެ. މެޗަށް ފަހު ރަޝްފޯޑް ބުނީ ލިވަޕޫލް އަތުން ބޮޑުތަފާތަކުން ބަލިވުމުން މި މެޗަށް ކުޅުންތެރިން ވަރަށް ރަނގަޅަށް ތައްޔާރުވި ކަމަށެވެ.