ވެމްކޯއިން ސަރުކާރު ކުންފުނިތަކާއި ޕްރައިވެޓް ކަލެކްޓަރުން އަތުން ނަގާ ފީ ބޮޑުކޮށްފި
އަގަށް އައި ބަދަލު ތަންފީޒުކުރަން ފަށާނީ މި މަހުގެ 20 ވަނަ ދުވަހުން ފެށިގެން
ވެމްކޯއިން ކުނި ނަގަނީ
ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)އިން ސަރުކާރު ކުންފުނިތަކާއި ޕްރައިވެޓް ކަލެކްޓާސްގެ (ކުނި އުކައިދޭ އަމިއްލަ ވިޔަފާރިތަކުގެ) ކުނި އުކައިދޭ ފީ ބޮޑުކޮށްފިއެވެ.
ވެމްކޯއިން މީގެ ކުރިން ސަރުކާރު ކުންފުނިތަކުން އުކައިދޭ ކޮންމެ ޓަނަކަށް ނަގަމުންދިޔައީ 212 ރުފިޔާއެވެ. ޕްރައިވެޓް ކަލެކްޓާސްގެ އަތުން ނެގީ 750 ރުފިޔާ އެވެ. އަގަށް ގެނައި ބަދަލާއެކު ދެން މިއިން ކޮންމެ ބަޔެއްގެ އަތުން ވެސް ކުނި އުކައިދޭން ޓަނަކަށް ނަގާނީ 2660 ރުފިޔާއެވެ.
މި ތަންތަނުން ނަގާ ކުނީގެ އިތުރުން، ވެމްކޯއިން ވަނީ ޓްރާންސްފާ ސްޓޭޝަންތަކަށް ގެންދާ ކުނި އުކައިދޭން ނަގާ އަގު ވެސް 212 ރުފިޔާ އިން 1060 ރުފިޔާއަށް ބޮޑުކޮށްފައެވެ.
ކުނި އުކާލުމުގެ ބައެއް ޚިދުމަތްތަކުގެ އަގުތަކަށް ބަދަލު ގެނައި ނަމަވެސް ގޭބީސީތަކުންނާއި، ވިޔަފާރިތަކާއި ކޮމާޝަލް ތަންތަނުން އަދި ކޯލް އެންޑް ޕިކަޕްގެ (ކެޕްސް) ޚިދުމަތްތަކަށް މިހާރު ނަގާ އަގުތަކަށް އެއްވެސް ބަދަލެއް ނާންނާނެކަމަށް ވެމްކޯއިން ބުނެއެވެ.
މީގެ އިތުރުން ގަވާއިދުގައި އޮންނަ ގޮތަށް ބާވަތްތައް ވަކިނުކޮށް ޓްރާންސްފަ ސްޓޭޝަނަށް ކުނި ގެންދާނަމަ ކޮންމެ ފަހަރަކު މަތީގައި ބަޔާންކުރެވުނު އަގަށް 1000 ރުފިޔާ އިތުރުކުރާނެއެވެ.
ވެމްކޯއިން ބުނީ އަގަށް ބަދަލު ގެންނަން ޖެހުނީ މާލެ ސަރަހައްދުގައި ފޯރުކޮށްދޭ ޚިދުމަތް ދެމެހެއްޓެނިވި އުސޫލަކުން ކުރިއަށް ގެންދިޔުމަށްޓަކައި ވެމްކޯއާއި އެންވަޔަރަމަންޓް މިނިސްޓްރީއާއި އިކޮނޮމިކް ކައުންސިލާ އެކު ކުރެވުނު މަޝްވަރާތަކަށް ފަހު ކަމަށެވެ. އެގޮތުން މި ބަދަލު ގެންނަން ޔުޓިލިޓީ ރެގިއުލޭޓަރީ އޮތޯރިޓީން ހުއްދަ ދީފައިވާ ކަމަށް ވެމްކޯއިން ބުނެއެވެ.
ވެމްކޯގެ ޙިދުމަތްތަކުގެ އަގަށް އައި ބަދަލު ތަންފީޒުކުރަން ފަށާނީ މި މަހުގެ 20 ވަނަ ދުވަހުން ފެށިގެންނެވެ.
