ގުރައިދޫ ދާއިރާއަށް އެމްޓީޑީންވެސް ވާދަކުރަނީ
10 މާރިޗު 2023 | ހުކުރު 02:20ވާދަކުރަން ބޭނުންވާ މެންބަރުންނަށް އެކަމަށް އެދުމުގެ ފުރުސަތު މާރޗް 11 ވާ ހޮނިހިރު ދުވަހުގެ ހަވީރު 5 ޖެހުމާ ހަމައަށް ވަނީ ހުޅުވާލާފައި
އެމްޓީޑީގެ އިފްތިތާހީ ޖަލްސާގެ ތެރެއިން
ރައްޔިތުންގެ މަޖިލީހުގެ ހުސްވެފައިވާ ގުރައިދޫ ދާއިރާގެ ގޮނޑިއަށް މެންބަރަކު އިންތިޚާބުކުރުމަށް ބާއްވާ ބައި އިލެކްޝަންގައި މޯލްޑިވްސް ތާޑް ވޭ ޑިމޮކްރަޓްސް (އެމްޓީޑީ)ން ވެސް ވާދަކުރާނެކަން އެޕާޓީން ހާމަކޮށްފިއެވެ.
އެމްޓީޑީން ވަނީ އެޕާޓީގެ ފަރާތުން ބައި އިލެކްޝަންގައި ވާދަކުރުމުގެ ފުރުސަތު ހުޅުވާލާފައެވެ. އެގޮތުން ބައި އިލެކްޝަނުގައި ވާދަކުރަން ބޭނުންވާ މެންބަރުންނަށް އެކަމަށް އެދުމުގެ ފުރުސަތު މާރޗް 11 ވާ ހޮނިހިރު ދުވަހުގެ ހަވީރު 5 ޖެހުމާ ހަމައަށް ވަނީ ހުޅުވާލާފައެވެ.
ގުރައިދޫ ދާއިރާގެ ބައި އިލެކްޝަންގައި ވެރިކަން ކުރާ މައި ޕާޓީ އެމްޑީޕީން ވާދަކުރާއިރު އެމްޑީޕީން ވާދަކުރާ ކެންޑިޑޭޓަކު ކަނޑައަޅާ ޕްރައިމަރީ މާރޗް 11 ގައި އޮންނާނެއެވެ. އެ ޕްރައިމަރީއަށްފަހު އެމްޑީޕީން ނުކުންނާނެ ކެންޑިޑޭޓަކު އެނގިގެންދާއިރު އިދިކޮޅު ޕާޓީ ޕީޕީއެމް އިން މި ބައި އިލެކްޝަންގައި ވާދަކުރަނީ ކުރިން އެގޮނޑި ފުރުއްވަމުން ގެންދެވި އިބްރާހީމް ރިޒާގެ ކޮއްކޯފުޅު ހުސައިން ރިޒާކަމަށް އެޕާޓީން ބުނެއެވެ.
ދެން ގުރައިދޫ ދާއިރާގެ ގޮނޑިއަށް ވާދަކުރާނެކަން ހާމަކޮށްފައިވަނީ އެމްއެންޕީންނެވެ. އެމްއެންޕީން ނުކުންނަނީ އަލީ އާރިފްއެވެ.
ގުރައިދޫ ދާއިރާގެ ގޮނޑި ހުސްވެފައިވަނީ އެގޮނޑި ތަމްސީލުކުރައްވަމުން ގެންދެވި ޕީޕީއެމްގެ މެންބަރު އިބްރާހީމް ރިޒާ ފެބްރުއަރީ މަހުގެ 23 ވަނަ ދުވަހު އަވަހާރަވުމާ ގުޅިގެންނެވެ.
މިދާއިރާގެ ބައި އިލެކްޝަން އޮންނާނީ އޭޕްރީލް މަހުގެ 15 ވަނަ ދުވަހުއެވެ.
