މި ދަންނަވަނީ ވަރަށް ސާފުކޮށްނެވެ. މާލޭގެ މަގުތައް ތަރުތީބު ކުރާން ފުލުހުން ނުކުމެ ބަރިބަރިއަށް ސްޓިކާ ޖެހިޔަސް ތޮއްޖެހިފައި މި އޮތް މާލޭގެ މަގުތަކެއް ތަރުތީބެއް ނުވާނެއެވެ!

މީގެ ހަތަރު އަހަރު ކުރިއަށް ޖެހިލާއިރު 2019 ވަނަ އަހަރު ޓްރާންސްޕޯޓް މިނިސްޓްރީން ހާމަކުރީ ސިއްސައިގެންދާފަދަ ތަފާސްހިސާބުތަކެކެވެ. މާލޭގައި ދިރިއުޅޭ ކޮންމެ ދެ މީހަކަށް އުޅަނދެއް ހުރި ކަމަށެވެ. މަހެއްގެ މައްޗަށް 600އަށްވުރެ ގިނަ ސައިކަލު ރަޖިސްޓްރީ ކުރާއިރު މާލޭގެ 50 އިންސައްތައަށްވުރެ ބޮޑު ސަރަހައްދެއް އެއްގަމު އުޅަނދުތަކަށް ހިއްސާކުރާ ކަމަށެވެ. އޭރު ވެސް މާލޭގައި އެކަނި 68،000އަށްވުރެ ގިނަ ސައިކަލު ރަޖިސްޓްރީ ކޮށްފައިވާ ކަމަށެވެ. ހަތަރު ފުރޮޅުލީ އުޅަނދުތަކުގެ އަދަދު 3،000އަށް ވުރެ މަތި ކަމަށެވެ.

މި ވަރުން މަންޒަަރު ސާފެވެ. ކިތަންމެ ވަރަކަށް ސްޓިކާ ޖެހިޔަސް މާލޭގައި މި ގެންގުޅޭހާ އުޅަނދެއް ޕާކުކުރާނެހާ ޖާގައެއް މި ތާކު ނެތެވެ. އެއީ ދެ ބަސް ވެވެން ނެތް ހަގީގަތެކެވެ.

މީގެ މަހެއްހާ ދުވަސް ކުރިން ވެސް ވީ ހަމަ އެކަހަލަ ގޮތެކެވެ. ފުލުހުން ނުކުމެ ވެލާނާގޭ ކައިރީގައި ހުރި ވެހިކަލްތަކުގައި ސްޓިކާ ޖަހައިލުމުން އާންމުންގެ ރުޅިގަނޑު ކެކެން ފެށީއެވެ. ސްޓިކާ ޖެހުމުން މައިތިރި ވެސް ވިއެވެ. އެކަމަކު، އެއީ ދެތިން ދުވަހެއްގެ ކަމެކެވެ. އަނެއްކާ ވެސް ހަމަ އެ ތަނުގައި އެ ގޮތަށް ޕާކު ކުރަން ފަށައިފައެވެ. އިތުރު ގޮތެއް ހަމަ ނެތީއެވެ. ޕާކިން ޒޯނެއް ނެތީއެވެ.

ދެހާސްނަވާރަ ވަނަ އަހަރު ނޫސްވެރިންނާ ބައްދަލުކުރައްވާ ޓްރާންސްޕޯޓް މިނިސްޓްރީގެ އެސިސްޓެންޓް ޑިރެކްޓަރު ހުސައިން ނަޒީރު ވިދާޅުވީ ވެހިކަލް ކޮންޓްރޯލް ކުރުމުގެ ދުރު ރާސްތާ ޕްލޭންއެއް މިނިސްޓްރީން ގެންގުޅުއްވާ ކަމަށެވެ. ނަމަވެސް ވެހިކަލްތައް ކޮންޓްރޯލް ކުރުމުގެ ކުރިން މާލޭގެ ޕަބްލިކް ޓްރާންސްޕޯރޓްގެ ޚިދުމަތް އިތުރަށް ފުޅާކުރަންޖެހޭ ކަމަށާއި، މިނީބަސް ތައާރަފް ކުރެވި، އެ ހިދުމަތް ތަރައްގީވާން ޖެހޭ ކަމަށެވެ. އަދި އުޅަނދުތަކުގެ "އޭޖް ލިމިޓް" އެއްވެސް ކަނޑައެޅިގެން ދާނެކަމަށާއި، ވަކި މުއްދަތަކަށްވުރެ ގިނަ ދުވަސް ވެއްޖެނަމަ މަގުތަކުގައި އެ އުޅަނދެއް ބޭނުން ނުކުރެވޭ ގޮތް ހެދުމަށް ވިސްނަވާކަމަށް ވެސް ވިދާޅުވިއެވެ.

އެ ދުވަސް މާޒީވެ، މިއަދު މާލެއަށް މިނީބަސް ވެސް ތައާރަފް ކުރެވިއްޖެއެވެ. އެކަމަކު، ވެހިކަލް ކޯޓާގެ ވާހަކައެއް މިއަދު ދައްކާނެ މީހަކު ނެތެވެ. ފަހަރުގައި، އެއީ މާ މުހިންމު ކަމަކަށް ވެސް ނުވަނީއެވެ. އެކަމަކު، މާލޭގެ ތޮއްޖެހުން ހުއްޓުވަން ބޭނުންނަމަ، މި ތަނަށް ވެހިކަލް އެތެރެކުރާވަރު މަދުކުރަން ޖެހެއެވެ. އެތެރެކުރާވަރުން އެތެރެކުރާނަމަ ދުވަހަކަށްވުރެ ދުވަހެއް މާލޭގެ ތޮއްޖެހުން ވާނީ އިތުރެެވެ.

ގިނަ ދުވަސްތަކެއް ވަންދެން ޓްރެފިކް ބެލެހެއްޓުމުގައި މާލޭގައި މަސައްކަތްކޮށްފައިވާ ފުލުހަކު ފާހަގަ ކުރެއްވީ މި މައްސަލައެވެ. އޭނާ ވިދާޅުވި ގޮތުގައި އެއްގަމު އުޅަނދު ޕާކުކުރުމުގެ ގަވާއިދުގައި ވާ ގޮތުން ޕާކުކުރުމަށް ކަނޑައަޅައިފައިވާ ތަނެއްގައި، މެދުކެނޑުމެއްނެތި އުޅަނދު ބޭއްވޭނީ، ގިނަވެގެން ހަތް ދުވަހުއެވެ. އެ މުއްދަތު ހަމަވުމުން އެ ފުލުހުން ބޭނުންތާކަށް އެ އުޅަނދެއް ގެންދިއުމުގެ އިހްތިޔާރު ފުލުހުންނަށް ލިބިގެން ވެއެވެ؛ މިއީ ގާނޫނުގައި އޮތް ގޮތެވެ.

އެހެން ނަމަވެސް، އޭނާ ވިދާޅުވި ގޮތުގައި މި ގޮތަށް މި ކަން ކުރަން އެ ގޮތަށް ހުންނަ ސައިކަލުތަކަށް ފުލުހުން ގަވާއިދުން "ފާރަލާން" ޖެހެއެވެ. އަދި އެ ގޮތަށް އެ ސައިކަލުތައް މޮނީޓާކޮށް އެ ފަދަ ކަމެއް ފާހަގަ ވެއްޖެނަމަ ރިޕޯޓެއް ހަދަން ޖެހެއެވެ. އެހެންކަމުން، އޭނާ ވިދާޅުވި ގޮތުގައި އެއީ އުނދަގޫ ޕްރޮސެސްއެކެވެ. ފުލުހުން އެ ގޮތަށް އެ ކަން ނުކުރަނީ ވެސް އެހެންވެއެވެ.

މާލޭގެ ޕާކިންޒޯނުތަކުގައި ހަންފަޅައިގެން ގޮސް، ބާވެ މުސްކުޅިވެފައިވާ ސައިކަލުތައް ވަރަށް ގިނައިން އެބަހުއްޓެވެ. އޭގެ ބަލަދު އަރާ މީހަކީ ކޮބާކަމެއް ނޭނގެއެވެ. ފުލުހުން ވެސް އެޔަކާ އަަޅައެއް ނުލައެވެ. ސަބަބަކީ އެ ކަމުގެ އުނދަގޫ ޕްރޮސެސްކަމަށް ވެދާނެއެވެ.

ސްޓިކާ މާ ގިނައިން ޖެހުމުން ފުލުހުން މިދިޔަ މަހު ނެރުނު ބަޔާނެއްގައި ބުނިގޮތުގައި، ހިނގައިބިނގާވެ އުޅޭ މީހުންނާއި ވެހިކަލް ދުއްވާ މީހުންނަށް ރައްކާތެރި މާހައުލެއް ކަށަވަރު ކުރުމަށް މާލޭގެ މަގުތައް ތަރުތީބު ކުރުމާއި ޓްރެފިކް ފްލޯ އަށް ދިމާވެފައިވާ ދަތިތައް ހައްލުކުރުމަށް، ކަނޑައެޅޭ ވަކި ސަރަހައްދުތަކެއްގައި ޓްރެފިކް އަދި ޕާކިން ހަމަޖެއްސުމުގެ މަސައްކަތް އަންނަނީ ކުރަމުންނެވެ. އަދި އެ މަސައްކަތުގެ ތެރެއިން، އެ ސަރަހައްދުތަކުގައި ފުލުހުން ހަރަކާތްތެރިވާ މިންވަރު އިތުރުވެގެން ދާނެކަމަށް އެ ބަޔާނުގައި ބުންޏެވެ.

މިހާރު ވެސް އެ ބުނާ މަސައްކަތެއް ދަނީ ކުރިއަށެވެ. ގާނޫނުގައި ބުނެފައިވާ ގޮތަށް ފުލުހުން އެ ކުރަނީ އެ ގާނޫނު ތަންފީޒުކުރުމުގެ މަސައްކަތެވެ. އެކަމަކު މިހާރު ސްޓިކާ ޖަހަނީ ބަސް ރޫޓަށް އުނދަގޫވާ ގޮތަށް ހުންނަ އުޅަނދުތަކާއި ސްކޫލްތަކަށް އުނދަގޫވާ ގޮތަށް ހުންނަ އުޅަނދުތަކުގައެވެ.

ސްޓިކާ ޖަހަންވީއެވެ. އެކަމަކު އެ ޖަހައިގެން މާލެ ތަރުތީބއް ނުވިއެވެ. ވެހިކަލް ކޯޓާ ކަނޑަނާޅައި، ދުވަސްވީ އުޅަނދުތައް ނައްތައިނުލައި މާލޭގެ މަގުތައް ތަރުތީބެއް ނުވެސް ވާނެއެވެ.